Xatuane Jë Së La Itre Atr Troa Atrehmekune La Nyipici
1 Hna traqa hnei Iesu e celë fene matre troa anyipicine la nyipici. Hnei nyidrëti hna inine la angetre drenge la aqane inin, matre tro angatr’a cainöjëne la nyipici kowe la itre atr. Hnei nyidrë hna hë angatre ka hape “angetre cinyihanyi,” pine laka, ka mama koi nyidrë laka tro angatr’a huliwaane hnyawane la hnëqa i angatr. (Mat. 13:52.) Hnei nyidrë hna aceitunëne la isa alacasi memine la ketre atr ka trene atrehmekun, ka hetrenyi la ketre trengamo ka sisitria thatraqai angeic. Ame enehila, ke, kola huliwaane la itre itusi nyine troa asaqene la huliwa ne cainöjëne la Baselaia. Ketre ceitun, hetrenyi thene la nöjei ekalesia la nöjei boroshür, matre xatuane la itre atr troa xötrethenge Iesu. Nemene la aqane troa huliwaane la itre jia celë ka sisitria?
2 E maine easë a thelejëne troa ithahnata matre nyijë së troa amamane la boroshür “Quel est le but de la vie? — Comment le découvrir?”, ke, loi e tro së a hnyinge ka hape:
◼ “Ase fe kö nyipë pane hnyingëne ka hape pine nemene matre alanyimu la itre atr ka thele troa atrepengöne la aliene la mel? [Nue pi troa sa.] Alanyimu la itre ka mekune ka hape ame la aliene la mel, ke, ene la troa hnaho, me madrin, me mec. Ngo ame pe, ke, Tusi Hmitrötr’a qejepengöne hnyawane koi së.” E jë la Genese 1:26. Thupene la hna ce ithahnata memine lai atr ngöne la itre mekune qa hnine la itre götrane 20 utihë 21 ne lai boroshür, ke, hnyingë nyidrëti jë ka hape: “Eu la ijine tro Akötresie a aeatrëne la hnei nyidrëti hna thingehnaean?” Qanyine kö la hna sa hnene lai atr, ngo loi pe tro së a ithahnataane la itre xaa mekune ka ijije qa hnine la mekene 7 ne lai boroshür, maine pena troa isapui koi ketre iwaihmaca matre ce wange hnyawan.
3 Hane la ketre aqane trofë la boroshüre “Dieu se soucie-t-il vraiment de nous? ”:
◼ “Alanyimu la itre atr ka hnying, thenge la taane ne la boroshüre celë. [E jë la lue hnyinge e kuhu fene la götrane hnapane ne lai boroshür, nge nue pi lai atr troa sa.] Pine laka thatreine kö la Akötresie ka ihnimi troa hamëne la loi memine fe la ngazo, nemene la mekune i nyipë göne la hna thingehnaeane hnei nyidrë ngöne Isaia 65:21-24? ”, thupene lai, easë pë hë a ithahnataane jë la itre mekune ne la mekene 10, kola qejepengöne la itre ewekë hna troa kuca hnene la Baselaia.
4 E maine easë a trofë la boroshür “Itre ua ne la itre ka meci hë — Hapeu, atreine kö angatre troa xatua epun, maine troa akötrë epuni pena? Ketre, itre ka mele kö angatr?”, ke, tro së a pane qaja jë ka hape:
◼ “Alanyimu la itre atr ka mekune ka hape kola tro hnene la itre ka meci kowe la nöje ne la itre ua. Hapeu la mekune i epun, nyipici kö lai? Hapeu, ka mele kö la itre ka mec? [Nue pi troa sa.] Kola sa la itre hnyinge celë hnene la Tusi Hmitrötr. Pane goeëne ju la hna qaja ngöne Genese 3:19.” Thupene lai, ke, loi e tro së a qejepengöne la itre xaa mekune qa hnine la itre götrane 4 me 5 ne lai boroshür.
5 Ngöne la kola trofë la boroshür “Vivez éternellement heureux sur la terre!,” ke, atreine hi la ketre atre cainöje thöth a hnyinge ka hape:
◼ “Ajane kö nyipë troa hane mele ngöne la paradraiso e celë fen, tune la? [Amamane jë la icetröne memine la götrane 32, nge nue pi lai atr troa sa.] Eni memine la faming a mejiune kowe la aqane mele celë, pine laka hna qaja lai hnei Tusi Hmitrötre ngöne Ioane 17:3.” Thupene la hna e lai xötr, ke, hamëne pi lai boroshüre matre tro nyidrëti a e.
6 E maine easë a trofë la itre xaa boroshüre kö la treu celë ngöne la huliwa ne cainöje trootro, ke, loi fe hi e tro së a xomi tulu ne aqane nyiqaan, thenge la itre mekune hne së hna ce wange enehila. Tro palahi së a mekune ka hape tha tro kö a qea la itre mekune hne së hna qaja, nge tro fe itr’ej’a hamë ixatua me ithuecatr, matre amejëne la aja ne la atr.
7 Hnei Iehova hna amamane koi së la nyipici. Nyipiewekë tro së a thupëne la nöjei ijine matre ahlemun’ej, jëne la itre itus, maine pena jëne la itre porotrike memine la itre atr hne së hna öhn. Qa ngöne lai, easë a amamane laka angetre cinyihanyi së thatraqane la mele ne la itre atr enehila, me epine palua. — Mata. 28:19, 20.