Xatuane Jë La Itre Ka Pë Lapaun
1 ngöne la itre hneijine enehila, hna wange aloine la itre atr ka mama ka hape ka inamacane me ka atreine kapa la nöjei pengöne mekun. Kola atrune la itre inamacane i atr, memine la itre hnei angatre hna catrefë, nge hna amë pë hë la itre ewekë ne ua. Ame la itre atr ka hni ka loi, me ka jelenyipicine la itre ka hetre enyipicine hmekujehi, nge hna nyitrepene hnene la itre nyipici hna atreine trotrohnin, ke, tro angatr’a ajane troa waipengöne la itus La vie: comment est-elle apparue? Évolution ou création? Ijije tro la itusi celë a xatuane la itre ka pëkö lapaun (Rom. 1:19, 20). Loi e tro së a bëeke troa wange la itre ka kapa la maca.
2 Ijije tro së a nyiqaane la porotrike tune la:
◼ “Tha sihngödri kö koi së laka alanyimu la angetre ini tune la itre monitör, maine porofesöre ka lapaune ka hape ame la atr, ke, ka xulu jëne la evolisio, nge pëkö atre xupe la nöjei ewekë asë, ngo ka traqa xane itr’ej. Tuneka fe la mekune i epun? [Nue pi troa sa.] Ame la mekune cili, ke, eje ngöne la ‘hna ithahnata ka traqa qa ngöne la aqane wai mekun, ngo paatre kö la enyipicin.’ Ngöne la itre hadredre lao macatre, hna mekune hnene la itre atr laka ka tëtë la fen; ame enehila, ke, atre hnyawa hi së laka ketre mekune lo lai ka tria. Nge, hapeu e ka caasi hi memine la ini ne evolisio? ” E jë la hna cinyihane ngöne la qaan, götrane 4, nge ithahnataane ju, me nyitrepene hnene la xötre Isaia 42:5.
3 Maine pena ijije tro së a nyiqaane ithahnata tune la:
◼ “Ame ngöne la hneijine së enehila, ke, alanyimu la itre atr hne së hna öhne ka tha lapaune kö koi Iehova. Ame ekö, ke, xalaithe hi. Hapeue la mekune i nyipë, pine nemene matre nyimutre la itre atr ka pë hë lapaun? [Nue pi troa sa.] Alanyimu la itre ka qaja ka hape hnene la iangazo, memine la pë ewekë, kola elë nyimenyime e celë fene hnengödrai. Angatr’a isa qaja ka hape e maine hetre Akötresie, ke, tro nyidrëti a apatrene trije la itre akötr. Pine laka tha hna sa kö la itre hnyinge i angatr, hawe, tha lapaune hë angatre koi Akötresie. Ngo ame pe, ke, nyimutre la itre ewekë nyine anyipicine laka hetre Akötresie, nge easenyi catre hë tro Nyidrëti a ujëne la fene matre ketre götrane hnë troa mele manathith, me tingeting.” Sisedrëne jë la porotrike memine la itre mekune hna xome qa hnine la paragarafe 19, götrane 196.
4 Loi e tro së xome me easë la Tusi Hmitrötr, me nyiqaane la porotrike tune la:
◼ “Eahuni a bëeke hmaca troa qejepengöne la kepine matre ka nyipiewekë catre la ini Tusi Hmitrötre ngöne la hneijine së enehila. Nyimutre la itre atr ka hetrenyi la Tusi Hmitrötr, ngo xalaithe hi la itre ka ami ijine troa e ej. Itre xan’a qaja ka hape tha mejiune hmaca kö angatre kowe ej. Tuneka fe la mekune i epun? [Nue pi troa sa.] Ame la ketre ewekë ka upi së troa qaja ka hape ame la Tusi Hmitrötr, ke, Wesiula i Akötresie qa thene la uati hmitrötr, ke, hnene laka hna aeatrëne la itre hna perofetaane hnen’ej.” Amamane ju la itre mekene tusi ne la paragarafe 6, götrane 234.
5 Tro fe a kapa hnyawaane la aqane trofë celë:
◼ “Easë a wangatrehmekune laka kola mama hnyawa la inamacane jëne la nöjei ka mele hune la ihnadro. Hanawange la ketre ceitun, ene la iatr celë a amamane la emingömingöne la kola lö la jö.” Amamane jë la iatr ne la itre götrane 12 me 13. Amamane hnyawaane ju la itre mekune hna eköhagene hna hape “Itre taane nyine mekun,” nge qaja ju la aqane sa la itre hnyinge ka nyipiewekë enehila hnene la itus.
6 Ijije tro së a jëne manathithi kowe la hnaiji së, e tro së a huliwaane la itus Création göi troa xatua angeice troa hetrenyi la lapaune ka catre kowe la Atre xupi angeic.