Huliwaane Hnyawaane Ju La Traeme i Epun
1 Atre hnyawa hi Iehova la pengöne la traem. Nyidrëti a ajane tro fe së a nyipiewekën’ej. Nyidrëti a xatua së jëne la organizasio i Nyidrë matre loi e ka tru koi së la traem. Kola upi së tro palahi a “cate troa huliwa i Joxu.” (1 Kor. 15:58) Qa ngöne lai, tro hë së a öhnyi loi ngöne la huliwa i Iehova.
2 Ceitune hi la etrune la traeme e nöjei wiike kowe la nöjei atr asë—ene 168 lao hawa. Hapeu, huliwaane hnyawaane kö së la traeme së? Easë kö a amamane laka atrehmekune hnyawa së la hneijine hne së hna melëne thenge la mekune i Iehova? Hna ajolë së kö hnene la itre huliwa ka tha nyipiewekë kö?
3 Nyipiewekë catre tro së a hetre porogarame së. Alanyimu la angetre tupathe troa fejane la itre ewekë nyine troa kuca panën. Hna fejane xötrëne la nöjei ewekë nyine kuca thenge la isa enyipiewekën’itr’ej. Tro së a catre tuneka? Tusi Hmitrötr’a qaja ka hape tro la atr “a madine la loi ngöne la nöjei huliwa i angeic’asë.” (Ate Cai. 3:13) Ame la itre xaa huliwa hna kuca, ke, ka tru catre kö la thangane ka loi qa ngöne hune la itre xan. Pane mekune ju la itre thangane ka ijije troa kapa hnene la isa alacas. Hapeu, tro kö së a kepe thangane ka loi qa ngöne la ketre huliwa hne së hna kuca? Tro kö së a “madine la loi” qa ngöne la hne së hna catre huliwa? E maine tha eje kö, ke, tha nyipi huliwa kö lai.
4 Ngöne La Huliwa Ne Cainöje Trootro Së: Easë a madrine lai, ngöne la kola traqa hnei itre xane ngöne la itre icasikeu göi troa cainöje trootro ngöne la traem, nge angatr’a drenge hnyawaane la itre hna amekötiin, nge kolo fe a canga tro kowe la teritoare hna athipe koi angatr. Easë a ajane troa catre cainöj, ngo tha tro kö a hmiitr. Atre catre Paulo la enyipiewekëne la troa kuca amekötine la nöjei ewekë, ngöne la nyidrëti a cinyihane ka hape: “Loi pe kuca alolone jë me amekötine la nöjei ewekë asë.”—1 Kor. 14:40.
5 Ame ngöne la easë a cainöje trootro, ke, ma pëkö ijine së troa iji kofi. Ejehi laka, e ngazo drai, ke, ka loi e tro së a pane mano, me hetre hna ij, matre hetre trengecatre hmaca jë troa sisedrëne la huliwa së. Ngo, alanyimu la ka ajane troa catre cainöje kowe la itre atr, matre angatr’a mekune laka loi e tha tro kö angatr’a iji kofi memine la itre trejine me angatre ngöne la ijine cainöje trootro. Loi e troa hmeke ngöne la götrane cili.
6 “Nge ate hë la kasida . . . la ijine i nyën” troa tro, nge ame la xejë, ke, “ate hnëkëne la a i nyëne ngöne la hnaön” göi troa hnëkë thatraqane la ijine hnötr, önine la Tusi Hmitrötr. (Iere. 8:7; Ite Edo. 6:6-8) Celëhi la kii ne la aqane troa huliwaane hnyawaane la traeme së. Nyipiewekë fe tro së a ‘ate la ijine’ hna sa koi së.’ Loi e tro së a trongëne hnyawaane la porogarame së, me troa atrehmekune hnyawa la traeme së. Nyipiewekë koi së troa atre la nyine tro së a kuca, me ijine troa kuca. Loi e tro së a majemine troa acile la porogarame së, me lapa mekune fe la itre jole ka ijije troa traqa. Ame itre xaa ijin, ke, loi e troa hetre aja qa kuhu hni së troa nue la itre xaa huliwa së matre troa kuca la ketre huliwa ka nyipiewekë kö, tune la troa hnëkëne la itre icasikeu së, troa cainöje trootro, me itre xaa huliwa qa thei Akötresie.
7 Easë a ajane troa nyitupune la Tretretro së e koho hnengödrai, Iehova Akötresie, ka ini së laka “hete pui ne la nöjei ewekë asë.” (Ate Cai. 3:1) E easë a huliwaane hnyawaane la traeme së, ke, ijije tro së a ‘kuca asë la qa së.’—2 Tim. 4:5.