Nyipiewekë Catre Koi Së La Ekalesia
1 Hnene la itre nekö i Kora hna qaja amamane la madrine i angatre kowe la ekalesia i Iehova, celëhi matre angatr’a qaja ju ka hape: “Ke loi la drai ka casi hnine la ite hnahage i cilie hune la ite drai ka thausan [e kuhu trön] NW.” (Sal. 84:10) Ame koi angatr, thatreine kö troa öhne la aqane mele celë ngöne la fen. Qa ngöne lai, maine eje fe hi la mekune i epun, ke, loi e tro epuni a nyipiewekëne la ekalesia ngöne la mele i epun.
2 Hna mama hnyawa ngöne lo kola xötrei acile la ekalesia, laka hnei Iehova hna amanathithin’ej. (Ite Huliwa 16:4, 5) Tha loi kö tro së a inagala me wangacone la ekalesia, maine mekune pena ka hape hna hnëkëne lai matre troa iöhnyi hnene la itre atren. Ame la ekalesia ke, hnë tro la itre temoë i Iehova ne la nöjei nöj a kapa la itre ixatua me itre ithuecatr. Ej’a iacasinekeu së matre ijije troa ini së hnei Iehova, me troa hnëkë së thatraqane la huliwa ne Baselaia.—Isa. 2:2.
3 Ekalesia i keresiano hmekujehi la jëne ka ijije troa ini së la nyipici. (1 Tim. 3:15) Nyipiewekë kowe la itretre drei Iesu tro angatr’a “cas”—caasi me Akötresie, me Keriso, memine la itre xan. (Ioane 17:20, 21; Ce wange ju la Isaia 54:13.) Maine tro së a tro kowe la ketre götrane ne la fene hnengödrai, ke, tro së a iöhnyi memine la itre trejine me easë, angatr’a lapaune kowe la itre ini me itre trepene meköti qa hnine la Tusi Hmitrötr, nge angatre fe a xötrethengen’itr’ej.
4 Hna ini së, me eamo së matre troa aeatrëne la hnëqa së, ene la troa inine la nöjei atr. E nöjei treu, La Tour de Garde, me Réveillez-vous!, me Huliwa ne Baselaia a hamë ixatua matre atreine tro së a nyiqaane ithahnata Tusi Hmitrötr. Hna hnëkëne la itre icasikeu matre troa amamane la aqane troa öhne me akökötrene la aja ne la itre atr. Easë a öhne la kola elë trootro la etrune la itre hlue i Iehova e cailo fene hnengödrai, celëhi nyine anyipicine laka hna sajuë së qa koho hnengödrai ngöne la huliwa celë.—Mata. 28:18-20.
5 Jëne la ekalesia, easë a kapa la ixatua e nöjei drai matre kola ‘aciane the së la ihnimi me ite huliwa ka loi.’ (Heb. 10:24, 25) Kola acatrenyi së matre atreine së troa xomihnine la itre itupath. Kola xatua së ngöne la ihnimi hnene la itretre thupe troa cile kowe la itre jol, me itre hna kukehnin. (Ate Cai. 4:9-12) Kola hamë së la eamo ka ijije ngöne la easë a nyiqaane ananyine la lapaun. Hetre organizasio kö hnei epuni hna atre ka hane hamëne la hne së hna ajane ngöne la ihnim?—1 Thes. 5:14.
6 Aja i Iehova la tro së a lapa qale kowe la organzasio i Nyidrë matre tro palahi a cas. (Ioane 10:16) Ame la ketre aqane xatua së hnene la ekalesia troa caasi memine la hlue ka nyipici me ka inamacan, ke, ene la kola upe la itretre thupe ka wange trongëne la itre ekalesia göi troa ithuecatre koi së. E hne së hna nue troa eatrongë së ngöne la ihnim, ke, kolo lai a nyijë së kowe la caas, nge kolo fe a xatua së troa cile catre ngöne la ua.
7 Ka sisitria catre la ekalesia thatraqane la mele së ngöne la ua. Thatreine jë kö troa nyihluei Iehova hnyawa e trön’ej. Hawe, loi e tro së a lapa hnine la göhnë hnei Iehova hna hnëkën. Maine jë easë a huliwa thenge la itre ajan’ej, me drenge thenge ngöne la hni ka menyike la itre eamo hne së hna kapa qa ngön. Celë hmekujehi la aqane tro së a amamane la etrune la aliene la ekalesia koi së.—Sal. 27:4.