Atrunyi Akötresieti Jë o Drai
1 Atre Xupe ka sheminge me lolo, nge ka tru ihnimin la Akötresi së, ene Iehova; Nyidrëti la qeqe ne mele me manathith. E tro së a mekune la edraië i Nyidrë, ke, nyipici laka nyipiewekë tro asë hi la itre hnei Nyidrëti hna xup’a atrunyi Nyidrë. Easë isa alacaasi a ajane troa qaja tune la atr cinyihane la tusi salamo ka hape: “Tro palakö ni a atrunyi cilie o drai. Tro la qeng’a qaja xötrën o drai la thina ka meköti cilie, memine la iamele i cilie.” (Sal. 71:14, 15) E ajane së troa kuca lai, ke, nyipiewekë tro së a thelejëne troa atrunyi Iehova ngöne la nöjei drai, nge loi e troa hetre ka upi së, ene la kepine ka tro qa kuhu hni së ka upi së troa qaja aloinyi Nyidrë, me qaja la emeköti Nyidrë, memine itre ewekë hnei Nyidrëti hna hnëkëne thatraqane la iamele.
2 Hnene la itre pane keresiano hna amë la ketre tulu ka loi göi troa atrunyi Iehova. Ame la ijine penetekos, ngöne lo kola bapataisone lo ala 3 000 lao atr, kola qaja ngöne Ite Huliwa 2:46, 47 ka hape: “Nge angate pala hi a lapa ce hni ngöne la ēnē o drai, . . . me atrunyi Akötesie, nge hna hnimi angate hnene la nöjei ate asë. . . . [Nge] Hnei Joxu hna nyi xane koi angat o drai la ite ka troa mel.” Angatr’a inine la itre nyipici ka sheminge göi Iehova, memine la Mesia i Nyidrë. Ka ixötrekeu la madrine i angatr, hna xötre kowe la itre xane matre tro angatr’a hane dreng, me inin, me atrunyi Iehova.
3 Hetrenyi La Itre Ijine Ka Ijije e Nöjei Drai: Ame enehila, ke, nyimutre la itre ka öhne laka ijije tro angatr’a atrunyi Iehova e nöjei drai, jëne la huliwa ne cainöje e nöjei ijin. Ejehi laka maine hnei angatre hna canga hnëkë, ke, tro ha sisitria la thangane hnei angatre hna kapa qangöne la huliwa cili. Hnene la ketre söre ka mekune troa xölehuje la hnepe ijine troa cainöj, hna öhne la lue maalamala ka kaqa, memine la loto hna thë. Eahlo a hëne jë la ketre atr troa kuca la loto i eahlo, nge eahlo fe a canga hnëkë matre troa cainöje koi nyidrë. Ngöne la eahlo a hnëkë, ke, hnei eahlo fe hna sipo Iehova troa eatrongë eahlo. Ame la kola ase, ke, ca hawa ne cainöje eahlo kowe lai trahmany, nge hna amë pe la itus Vivre éternellement.
4 Hnene la ketre söre hna majemine ixelë memine la föe ka lapa easenyi eahlo, kola troagöfë la itre kuli. Ngöne la ketre iöhnyi nyidro, ke, hnei nyidroti hna pane ithahnatane la itre ejolene la mel, matre kola thuejëne kowe la itre xaa taane mekune hna ithahnataan. Ame ju fe kö la ijine cili, ke, hna nyiqaane ini Tusi Hmitrötre me eahlo. Hnene laka kola kökötre trootro la aja i eahlo matre qaja amamane jë eahlo ka hape maine ju, ke, tha tro palahi eahlo a drenge la itre Temoë i Iehova e tro angatr’a fenafena la qënehlö i eahlo, pine laka tha ka lapaune kö eahlo koi Akötresie, me kowe la Tusi Hmitrötr.
5 Itre xan’a öhne laka ijije troa cainöje kowe la itre ka salem, maine itre xane ju kö ka fenafena la qënehlö i angatr. Hnene la ketre söre qa Irelaad hna kapa la ketre atr ka salemë asiras thatraqai mel, ene la troa hamëne la mekune göi aqane troa thupëne la itre ewekë i eahlo, ngo hna nyithupene pe. Hnei eahlo hna qaja ka hape eahlo a treqene madrine troa mele ka tha ase palua kö. Ketre mekune ka hnyipixe kowe lai atr, hna hiane ngöne la hmi katolik ne Roma. Hnei nyidrëti hna kapa la itus Vivre éternellement, me sine la icasikeu ngöne la wiike thupen, nge hane ju fe kö nyidrë nyiqaane inine la Tusi Hmitrötr. Ame enehila, ke, ase hë bapataiso nyidrë matre ketre trejine hë me easë.
6 Loi e tro asë hi së a xölehuje la nöjei ijine troa atrunyi Iehova o drai. Ketre ixatua koi së troa xom’amamane la itre zonal, maine itre tarak, me thele palahi troa canga hamëne kowe la itre ka iwai. Ngöne la itre xaa götran, ke, ijije tro la hnepe hawa hne së hna lapa ngöne park a thue ijine së troa cainöje kowe la itre xaa atr ka pane cile troa mano. Ame itre xaa thöthi Temoë ka ini, ke, hnei angatre hna thë troa amë hune la itre laulau i angatre la itre xaa itusi matre jëne porotrike i angatre memine la ketre ka troa wangatrehmekun’itr’ej, me thele troa atrepengön’itr’ej. Loi e troa lapa mekune la caasi maine lue mekene tusi ka ijije troa ithahnatan. Sipo Iehova jë troa xatua epun. Tro epuni a öhnyi manathithi qa ngöne la hna dreng.—1 Ioane 5:14.