Trofë Trongëne Jë La Itus La connaissance qui mène à la vie éternelle
1 Atraqatre la madrine së ngöne la kola amamane la itusi ka hnyipixe, ene La connaissance qui mène à la vie éternelle! Hna hnëkën’ej nyine troa xatuane la itre atr, matre canga trotrohnine angatre la atrehmekune jëne la nyipici. Ame ngöne la treu Diseba, ke, xötrei ijine petrehi lai hna nue koi së troa trofë trongëne la itusi celë ngöne la teritoare së. Nemene la nyine tro së a qaja matre troa amejëne la aja?
2 Hane hi la ketre aqane trofë ka ijije troa ketr la itre atr ka tha nyipi lapaune catre kö koi Akötresie:
◼ “Alanyimu la itre atr ka tru hnine la hmi, matre angatr’a lapaune koi Akötresie, ngo angatr’a wangatrehmekune fe enehila laka tha catre hmaca kö la lapaune i angatre tune lo itre macatre ka ase hë. Hapeue la mekune i epun, nemene la kepine la ewekë celë? [Nue pi troa sa.] Kola acatrene la lapaune së koi Akötresie e hne së hna wangatrune la etrune memine la emingömingöne la hnengödrai memine la fen. [E jë la Salamo 19:1.] Nyidrëti hi lo ka musinëne la itre ewekë ne hnengödrai, nge hnei Nyidrëti fe hna hamëne me köjane la gojenyi ka loi nyine tro së a trongën. [E jë la Salamo 19:7-9.] Kola amamane hnene la itre xötre celë la enyipiewekëne la troa inin’asë la nöjei ewekë nyine tro së a atre göi Akötresie, memine la itre trepene mekune i Nyidrë. [Amamane ju la iatr ngöne la itre götrane 4 me 5, nge e jë fe la itre mekune hna cinyihan.] Maine ajane epuni troa kepe thangane ka loi qa ngöne la atrehmekune celë ka ketre pengön, atraqatre la madrinenge troa amë pe la itusi celë.”
3 Maine hetre nuvele ka ngazo, me ka hnyipi traqa, ke, loi e troa lapa mekun, me qaja ka hape:
◼ “Ma hnei epuni jë hna hane drenge göne [qaja ju la ewekë ka traqa]. Ase fe kö epuni isa thele ka hape ma hna ketri Akötresieti jë fe kö hnene la itre ewekë ka tha meköti kö hna kuca e celë fen, memine la akötre hne së goeën, maine hne së hna sipu melëne pena? [Nue pi troa sa.] Kola anyipicine koi së hnene la Tusi Hmitrötre ka hape Akötresieti a hnimi së, nge Nyidrëti a troa xatua së ngöne la itre ijine akötr.” E jë la hnepe xötre ngöne Salamo 72:12-17. Fe jë la itusi ngöne la götrane 70, nge amamane hnyawane ju ka hape ame la itusi celë, ene La connaissance qui mène à la vie éternelle, ke, kola sa la hnyinge hna lapa mekune hnene la itre milio lao atr, hna hape Hnauëne laka Akötresieti a nue la akötr? “Tro epuni a öhne la ekeukawane la aqane sa ne la Tusi hmitrötre la hnyinge cili. Eni a ajane troa hamëne la itusi celë koi epuni matre tro epuni a sipu e ej.”
4 Maine epuni qëmekene la ketre keme me thin, ma epuni jë a ajane troa qaja atrune la fami:
◼ “Drei la mekune ka ej thene la itre keme me thin, ngöne laka, jole catre troa tupathe troa eköthe la ketre fami ka manathith. Hetre jole fe hnei epuni hna öhn? [Nue pi troa sa.] Alanyimu the së la itre trejine ka thele jëne troa tro loi, ngo hne së palahi hna aja ixatua matre atreine së troa öhnyi thangane ka loi ngöne la itre hnëqa së. Tusi Hmitrötr’a hamë së la ketre eamo ka sisitria. [E jë la itre xötre ne Kolose 3:12, 18-21.] Tru la itre mekune hnei Tusi Hmitrötre hna qaja ngöne la götrane celë, tune la aqane amamane hnyawane ngöne la mekene 15 ne la itusi celë, hna nyitaane ka hape ‘Nemene la aqane troa eköthe la fami matre tro ej’a atrunyi Akötresie.’ Ej’a hamëne la eamo hna xome qa hnine la Tusi Hmitrötr, me amamane la aqane troa keukawa hnine la faipoipo, memine la aqane troa cile kowe la itre jole ne la itre nekönatr. Ka xeci koi ni laka tro nyipëti a madrine la nyipëti a e ej.”
5 Maine epuni a ajane la ketre aqane trofë ka tha qea kö, ke, tupathe ju la:
◼ “Hane fe kö epuni isa thele la kepine matre qatre ju hi së me mec? Kola qejepengöne ngöne la mekene 6 ne la itusi celë la qaane la mec, memine la aqane tro Akötresieti a apatren’ej. Tusi Hmitrötr’a qaja koi së ka hape hnei Akötresieti hna thingehnaeane la mele ka tha ase palua kö kowe la itre atr ka hnimi Nyidrë. [E jë la Ioane 17:3.] Maine hetre ajane i epuni troa hane e la hna thingehnaeane celë, ke, tro hë ej’a thinaa epuni me hamë epuni la inamacane ngöne la ua.”
6 Maine hne së hna hnëkë hnyawa, ke, atreine hi tro së a ‘shenge la ite hna cinyihan’ kowe la itre xane matre troa tru la madrine hnei angatre hna kapa!—Luka 24:32.