Thaa Loi Kö e Tro Së Hmekuje Hi a Itre Atr Ka Drenge—Ngo Sisitria La Ka Trongën
1 Kola wangatrune enehila hnene la itre nyipi keresiano la itre ithuecatre göi troa itre atr ka trongëne la wesiula, ngo tha itre atr ka drenge hmekuje kö. (Iak. 1:22) Qa ngöne lai, isapengöi angatre catre memine la itre atr ka hane qaja ka hape itre keresiano angatre ngo tha nyihluei Akötresieti pe hnene la hni ka meköt. (Isa. 29:13) Hnei Iesu hna qaja hnyawa ka hape tro hmekuje hi la itre ka kuca la aja i Akötresie a mel.—Mata. 7:21.
2 Gufa kö la hmi e pëkö huliwa i Akötresie hna kuca. (Iak. 2:26) Haawe, loi e tro së a isa hnyinge ka hape, ‘Nemene la aqane amamane hnene la itre huliwange ka hape ka catre la lapauneng? Nemene la ka amamane ka hape eni a mele thenge la lapauneng? Tuneka la aqane tro ni a nyitupu Iesu hnyawa?’ Maine hne së hna thele troa sa hnyawa la itre hnyinge celë, ke, tro hë itr’ej a xatua së troa ketre waipengöne la trengecatre hne së hna kuca ha maine hne së palakö hna ajane matre tro palahi a nyihluei Akötresie.
3 Tune la itretre drei i Iesu, nyipiewekë tro fe së a hane hetrenyi la aja ka caasi ngöne la mele së; celëhi mekune ka eje thene la atre cinyihane la tusi salamo, önii nyidrë ka hape: “Eëhuni a atrunyi Akötesie o drai, nge tro huni a qaja aloine la atesiwa i cilie uti hë epine palua.” (Sal. 44:8) Ame la hmi keresiano, ke, ej a mama ngöne la aqane mele së o drai, me ngöne la itre hne së hna kuca. Drei la madrine hne së hna kapa ngöne la easë a amamane la aja së troa atrunyi Iehova hnene la nöjei huliwa së!—Fil. 1:11.
4 Tru Kö La Aliene La Troa Atrunyi Iehova Hune Hi La Troa Hetrenyi La Mele Ka Meköt: Maine aqane ujë ka loi hmekuje hi la hnei Akötresieti hna ajane the së, ke, eje hi laka tro hi së amamai thiina ka loi. Ngo eje hi laka, ame la hmi së, ke, ene fe la troa qaja trongëne la itre thiina i Akötresie ka sisitria, me troa qaja trongëne la atresiwa i Nyidrë!—Heb. 13:15; 1 Pet. 2:9.
5 Ame la ketre huliwa ka sisitria nyine tro së a aeatrën, ke, ene la huliwa ne troa cainöjëne la maca ka loi. Hnei Iesu hna nue la melei nyidrëti kowe la huliwa celë pine laka, atre hi nyidrë ka hape, celëhi jëne tro la itre atr ka drei nyidrë a mele palua. (Ioane 17:3) Ame enehila, ke, nyipi ewekë catre “la huliwa ne la wesi ula;” ke, jëne mele hmekuje hi lai kowe la nöjei atr. (Ite Huliwa 6:4; Rom. 10:13) Maine hne së hna wangatrune la itre manathithi ka nyimutre hne së hna troa kapa, ke, atreine tro së a kapa madrine la ixatua hnei Paulo hna hamëne koi së, ene la troa “cainöjëne la wesi ula,” me troa “cat.”—2 Tim. 4:2.
6 Hapeu, hna nyi ifegone kö la itre ijine tro së a atrunyi Akötresie ngöne la mele së? Hnene la atre cinyihane la salamo hna qaja ka hape, hnei angeice hna lapa mekune kow o drai. Hapeu, hane fe kö së mekune tuun? Eje hi, nge tro së a xölehuje la nöjei ijine matre troa qaja la atresiwai Iehova. Tro së a thele la itre ijine ka ijije troa ithahnata me eatrongëne la itre atr kowe la itre mekune ne la ua. Tro palahi së a catre sine la itre icasikeu ne cainöje trootro. Ame kowe la itre trejine ka thele ijine troa xome la huliwa ne pionie ngacama tru la jol, ngo tro lai a xatua angaatre hnene la hna nyipiewekëne me amë panëne la huliwa ne cainöje ngöne la nöjei drai ne mele angaatr. Kola anyipicine koi së hnene la Wesiula i Akötresie ka hape, maine tro së a catre troa itre atr ka kuca la aja i Akötresie, ke, tro hë së a öhnyi loi qa ngön, me madrin.—Iak. 1:25.