Inine Jë La Itre Xane La Hnei Akötresieti Hna Thele The Së
1 Nyimutre pala kö la itre atr ka mecijine ngöne la ua, ene laka, kola “jinë wesi ula i Iehova.” (Amosa 8:11) Ngacama alanyimu la itre atr ka lapaune laka, ka mele Akötresie, ngo thatre pengöne kö angatre la aja i Nyidrë, memine la itre hnei Nyidrëti hna amekötin. Qa ngöne lai, nyipi ewekë tro së a ini angatre la jëne iamele, ene la nyipici ne la Baselaia. Maine tro së a canga xome la itre jiane huliwa me hnëkë troa cainöje trootro ngöne la nöjei ijin, haawe, ijije hi tro së a öhne lo itre atr ka ajane troa atre la hnei Iehova hna thele thei angatr.
2 Ngöne la treu eiperem me mei, tro hë së a tro fë la itre zonale La Tour de Garde me Réveillez-vous!; lue zonale ka troa traqa ngöne la ijine ka ijij. Ketre, easë petre hi a troa tro fë trongëne la boroshüre Nemene La Hnei Akötresieti Hna Thele The Së? Tro la itre iatr ka lolo, me itre hnyinge nyine mekune hnyawa, a upe la itre atr troa hane e ej. Hane cahu itre xaa aqane tro së a tro fë la itre itusi së ka lolo, itre mekune nyine ixatua, matre hetre thangane la huliwa së.
3 Thele Jë La Itre Atr: Ngöne la itre xaa götran, ke, pëkö atrene la itre hnalapa ngöne la kola cainöje trootro; haawe, kola mama laka, hetre thangane catre kö la huliwa së e hne së hna thele angatre me ithahnata koi angatre ngöne la itre xaa götrane pena. Hna upi së hnene la sine trongene la Huliwa ne Baselaia ne semitrepa 1996, troa cainöjëne la maca ka loi ngöne la nöjei götran—e cahu itre gojeny, hnine la itre kar, me ngöne itre park, me itre hnë xeene la itre loto, me ngöne la itre hnë thele mani. Kolo lai a amamane koi së la enyipiewekëne la troa thele jëne troa cainöje ngöne la nöjei ijin. Hetrenyi la ketre ceitune hna hamëne hnene la ketre sör ka pionie, hnei nyidroti hna tro pi kowe la ketre hna ihamë lo hna hape “zoo,” nge hna xome trongëne la itre Réveillez-vous! ne 8 Ogas 1996, hna hape “Itre öni hna humuth—Pine nemene la troa hnengazone itre ej?” Caa hawa ne cainöje hi eahlo, nge 40 hë lao zonale ka qejepengöne lo lai itre öni ka mingöming, hnei eahlo hna hamën! Nemene la madrine hnei epuni hna kapa, qa ngöne la hnei epuni hna cainöjëne la maca ka loi, ngöne la nöjei götrane hnei epuni hna tro kow? Pëkö ejolene troa cainöje fë la itre zonal, La Tour de Garde me Réveillez-vous!, memine la boroshüre Thele, ngöne la nöjei pengöne aqane troa tro fë la maca ka loi, pine laka, itre eje a hamëne la itre ithuemacanyi ka ketr la mele ne la itre atr, me xatua angatre troa hane atreine waimekune ngöne la itre nyine troa kuca.
4 Itre Aqane Nyiqaane Ithahnata: Ngöne la pune la Huliwa ne Baselaia ne okotropa 1996, kola hamëne la nyimu mekune ngöne la aqane tro epuni a sipu hnëkëne la itre zonal, La Tour de Garde me Réveillez-vous! Ceitune hi la itre ixatua cili, maine epuni a troa huliwane itre ej, matre troa tro fë la boroshüre Thele. Atreine hi tro së a qaja la itre hnepe hnaewekë ka xoxopatr, maine tro pena a nango aqeane matre aijijë së troa hamëne la ketre mekune qa hnine la Tusi Hmitrötr. Nyipi ewekë troa iëne hnyawa la itre hnaewekë nyine troa qaja ngöne la easë a nyiqaane ithahnata, pine laka, itre eje a troa amamane koi së, maine ka troa drei së la atr hne së hna ithahnata memin. Hetre thangane ka loi hna öhne la itre xan ngöne la angatre a qaja ka hape: “Eni a e la ketre hna cinyihane ka hamë ithuecatre koi ni, nge eni a ajane troa hane ce thawa la itre mekune ne ej me epun.” Maine pena, troa amejëne la ketre hnyinge ka tru alien, ngöne la epuni a sisedrëne la porotrik.
5 Maine ijije ngöne la götrane i epun, pane tupathe jë troa hnyinge tune cahu itre aqane nyiqaane ithahnata hna hnëkëne thatraqane la treu celë:
◼ “Ame enehila, kola cinyanyine me inyiathe menune la itre ngöne uma, kola tru catre hnei traxawa, ketre kola elë fe la man me apoizinë ihnadro. Nemene la nyine troa kuca matre nyihnyawane la ihnadro, nge matre ketre göhnë ka sisitria hna troa mele ngön?” Nue pi troa sa, nge thupene lai qaja jë ka hape, easë a mejiune kowe la ketre ithuemacany, ka anyipicine koi së la aqane me ijine tro la ihnadro a ketre gatrane ka tru. Hamëne jë la ketre mekune ka ihmeku memine lai, me ketre xötr, me ketre iatr ka lolo qa hnine la ketre zonal, maine qa hnine lo ini 6 ne la boroshüre Thele, nge thupene lai, hamë angeice ju troa hane e. Qëmekene tro epuni a nyipune la porotrik, isapui ju fe matre troa sisedrëne hmaca eje ngöne la ketre ijine kola troa iwai hmaca.
◼ “Tuneka la mekune i epun, aja i Akötresieti kö troa nue së, troa mele hnine la itre jole hne së hna qëmeke kow enehila?” Thupene la hna sa la hnyinge i epun, öni epuni jë hi ka hape: “Ma ka majemine fe epuni hane xötrethenge lo thithi Iesu hnei nyidrëti hna hamëne kowe la itretre drei i nyidrë nyine tulu, ngöne lo nyidrë a sipone troa hlepëti la Baselaia i Akötresieti e celë fen. Hapeu, atre fe hi epuni la pengöne la Baselaia cili?” Fe jë la boroshüre Thele ngöne la ini 6, nge e jë la itre hnyinge ka eje ngöne la qaane lai ini. Thupene lai, ame ngöne la epuni a e la paragarafe 1, amamane ju la itre mekune ka sa la pane hnying. Qaja ju ka hape, ame pë hë la itre xaa hnyinge ke, hna sa hnyawane itre ej ngöne la itre paragarafe thupen. Hamëne pi la boroshür, nge isapui hmaca ju matre hamë ithuemacanyi ngöne la Baselaia.
◼ “Nyimutre hë la itre atr ka nyiqaane goe, me öhne laka, thaa hmi kö la ka nyi nyin la itre jole ne la atr, ngo eje hnyawa hi la qaane la itre akötr. Nemene fe la hnei epuni hna mekun?” Thupene la hna drenge la mekuna ne la atr, amamane jë la ketre mekune qa hnine la ketre zonal, ka troa ahlëne la aja i angeice ngöne la aqane ngazone la hmi ka thoi, maine pine laka, easenyi hë matre paatre pi. Hnyingëne jë ka hape, ajane kö angeice troa hane e lai. Ihamënekeune ju la itre ëj, nge isapui ju matre tro hmaca epuni a bëeke troa qejepengöne laka, thaa hmi ka nyipici kö la ka athixötrëne la atr.
◼ “Pine laka, tru la itre jole hna cile kow hnene la itre fami enehila, hapeu, hane fe kö epuni thele la jëne madrine kowe la fami?” Treqene ju troa sa la hnying, nge qaja jë ka hape, Akötresieti a amamane la sipu jëne madrinene la fami. Maine jë tro epuni a e la Isaia 48:17. Thupene lai fe jë la boroshüre Thele ngöne la ini 8, nge amamane ju la itre xaa xötre hna fejane qa hnine la Tusi Hmitrötr, ka hamëne la nyipi gojenyi kowe la nöjei atrene la fami. E jë la itre hnyinge ngöne la qaane lai ini. Hnyingëne ju kowe lai atr ka hape, ajane jë fe kö angeice troa hane e la itre mekune nyine sa la itre hnyinge cili. Isapui hmaca ju matre, troa bëeke ngöne la ketre drai matre troa hamëne la itre xaa hna amekötine ka lolo hna qatrenge hnei Tusi Hmitrötre thatraqane la itre fami, matre manathithi angatr.
6 Hna ithuecatre koi së ngöne lo sinetrongene la Huliwa ne Baselaia ne maac 1997, troa catre troa iwai hmaca. Hna amekötine koi së troa xome la boroshüre Thele, matre troa nyiqaane la itre etid, maine thaa ngöne kö la kola xötrei iöhny, haawe, wange ju pena ngöne la kola iwai hmaca. Ame la ewekë ka sisitria catre kowe la nöjei atr asë, ke, ene la troa atre la hnei Akötresieti hna thele thei angatr, nge thupene lai troa kuca thenge la hna inin. (Kol. 1:9, 10) Maine tro së a nyiqaane inine la itre atr la hne së hna atre göne la itre hna amekötine hnei Iehova thatraqane la mel ngöne la treu eiperem me mei, haawe, tro ha hane kepe thangane fe hnene la itre xaa atr.—1 Kor. 9:23.