Hapeu Tro Kö a Sisitria Catre La Treu Ogas?
1 Ketre macatre ka sisitria catre la macatre 1963 kowe la nöje i Iehova. Nemene la kepine matre kola qaja tune lai? Pine laka kola e ngöne la macatre cili la wane milio la etrune la itretre anyipici Iehova ngöne la fene hnengödrai asë. Maine hnei epuni fe hna hane kapa la nyipici ngöne la ijine cili, drei jë la epuni a mekune hmaca lo madrine ka eje the së ngöne lo kola trofë hnene la ka ala nyimu la maca ne Baselaia! Ame hë enehila tru catre hë la itretre cainöje e Etazini hmekuj. Ngo kola mama laka, ame pala hi ngöne la nöjei treu, hetrenyi la itre trejine ka thaa hane kö hamë rapore ne hna cainöj. Hapeue fe së e celë e Kaledonia? Kola hane e fe la 120 la etrune la itre ka thaa hane hamë rapor.
2 Kapa Ju La Itupath: Hna ithuecatre koi së troa eatrëne ngöne la treu ogas, la 1650 lao ka cainöje e celë e Kaledonia. Maine troa hetre thangane la aqane catre huliwa së, eje hi laka, troa sisitria catre la treu ogas! Atreine hi tro së a eatrëne la mekune cili, e hne së isa ala caasi hna catre huliwa matre troa traqa kowe la hna mekune kow.
3 Ame koi itre ka mekune troa mano, loi e tro angatre a isine troa hane cainöje qëmekene troa tro. Loi e troa hane xometrongëne la itre tarak, me itre boroshür, maine itre zonal, matre troa hane cainöje kowe la itre atr hna troa iöhnyi memine ngöne la nöje hna troa tro kow. Ketre, hane ju fe epuni ce cainöje trootro, memine la itre trejine ka mele ngöne la götrane hnei epuni hna tro kow.
4 Maine epuni a wezipo, atreine pala hi troa hetre thangane ka loi la huliwa ne cainöje koi epun. Atreine hi tro epuni a cainöje kowe la itre droketre, memine lo itre ka ce huliwa me angatr, maine itre xaa atr pena ka troa hane wai epun. Maine pena, cainöje jë jëne tusi maine jëne telefon.
5 Tro nyimutre catre la itre ka troa madrine la ixatua hna hamën, thatraqane la huliwa ne cainöje e treu ogas. Loi e tro la itre qatre thup, me itre drikona, me itre ka xomiujine la itre Ini tusi a hnëkëne la aqane troa hamëne la ixatua cili. Nge thaa tro pi kö epuni a thëthëhmine troa canga hamëne la rapore ne hnei epuni hna cainöje trootro ngöne la pune treu, matre troa hane e epuni fe tune la ketre trejine ka cainöje ngöne la treu ogas.
6 Nyipi Ewekëne Jë La Hnëqa: Ame la huliwa ne cainöj, celë hi ketre “ewekë ka loi.” (2 Tim. 1:14) Easë a madrine la hnëqa hna hamëne koi së, ene la troa cainöjëne la maca ka loi. (1 Thes. 2:4) Maine tro së a goeëne la nöjei ewekë hnei Iehova hna hamëne koi së, haawe, tro hë së a catre kuca pala hi la huliwa celë ka nyipi ewekë catr, ngöne la macatre ka pexej. Pëkö ewekë ka troa thungi së troa cainöjëne pala hi la maca ka loi. Isa catre pi së troa xome la huliwa i Iehova, matre ketre treu ka sisitria la treu ogas, nge easë fe a thele troa sisedrëne la huliwa cili ngöne la nöjei treu thupen!—Sal. 34:1.