Hapeu Easë Kö a Hane Cainöjëne Pala Hi La Baselaia?
1 Easë asë hi a madrine la aqane elëne la etrune la itretre cainöje e Kaledonia, laka, 1 688 ngöne la treu ogas 1997, nge 46 e Walis me Futuna ngöne la treu ogas 1999. Drei la aqane catrene la itre trejine qa ngöne la caas i angatr! Kola mama e Kaledonia, ka hape, ame hë ngöne la itre treu thupen, nango jole kowe la itre xaa trejine troa cainöjëne pala hi la Baselaia; matre hna e ju pe hi la 1 515 la etrune la itretre cainöje ka thaa cile kö tro fë la maca ka loi. Kösë 10 koi 100 la etrune la itre ka thaa hane hmaca kö thele troa cainöje ngöne la nöjei treu. Easë a mejiune laka, tro la itre hnepe ixatua celë a xatua së troa cile kowe la jole cili.
2 Madrine Jë Së La Hnëqa Së: Easë a olene atraqatre la hnëqa së, ene la troa tro fë la maca ka loi kowe la itre xaa atr. Huliwa lai ka amadrinëne la hni Iehova, me xatuane la itre atr ka menyike troa atre la gojenyi ne tro kowe la mel. (Ite edomë 27:11; 1 Tim. 4:16) Maine tro pala hi së a cainöj, haawe, tro hë së a atreine xome hnyawa la huliwa cili, nge troa hetrenyi the së la madrin, me manathithi.
3 Troa Hamëne La Rapore Ne Hna Cainöj: Kola wangacone hnene la itre xaa trejine troa canga hamëne la hnei angatre hna cainöje ngöne la treu. Thaa tro pi kö së a mekune ka hape, ka gufa la trenge catre hne së hna kuca. (Wange ju la Mareko 12:41-44.) Qa ngöne lai, loi e tro së a qaja me cinyihane la hne së hna kuca! Nyipi ewekë troa hnëkëne la ketre aqane troa kuca ngöne la hnalapa, maine jëne la calendrier; eje hi laka, maine tro së a cinyihane pala hi hnine la calendrier la itre hawa hna kuca ngöne la hna cainöj, thatreine kö tro sa thëthëhmine la ketre, ngöne la easë a troa hamëne la hne së hna cainöje e nöjei pune treu.
4 Hamëne Jë La Ixatua Ka Ijij: Troa hetre thangane ka loi la itre hna amekötine hnine la ekalesia, thatraqane la itre ka ajane troa catre cainöjëne la maca ka loi. Loi e tro la seketere memine la itre ka xomiujine la itre Ini Tus, a ce wange memine la itre trejine ka macaj, matre tro angatre a hane hamë ixatua. Maine hetre nekö së, maine itre hnainine pena ka cainöje hë ngo thaa hna bapataisone petre kö, ini angatre jë troa hamëne pala hi e nöjei treu la hnei angatre hna cainöj.
5 Mekune ju së lo pengöi Ottilie Mydland hna cinyihane ngöne lo zonal, La Tour de Garde ne 1 okotropa 1997, hna hape “Reconnaissante à Jéhovah pour une longue vie à son service.” Pa i eahlo kö canga hane cainöjëne lapane la maca ka loi, nge pine pë hë bapataiso eahlo ngöne la macatre 1921. Thupene sikisitre sikisi lao macatre, kösë kola traqa kowe la 99 lao macatre i eahlo, öni eahlo ka hape: “Eni a madrine laka, ijiji eni pala kö troa hane cainöjëne lapaane la maca ka loi.” Drei la ketre tulu ka lolo catr, nyine troa xome hnene la nöjei hlue i Iehova asë!