Hapeu, Epuni Kö a Hane e La Itre Zonal?
1 Hna qaja aloine la itre zonale hnene la ketre trefëne ka mesinare e Afirik, öni nyidroti ka hape: “Kola xatua së hnene la zonal, La Tour de Garde, troa hmeke me thupëne pala hi la aqane mele së ngöne la ua, ngöne la teritoare së. Hetre ithuecatre me trenge catre hne së hna kapa qa ngöne la nöjei zonal.” Hapeu, hetrenyi fe kö thei epuni la hni ne ole ka tune lai kowe la itre zonale së? Nge hane kö epuni thele troa canga hane e itre ej?
2 Maine nyipici laka, ijije hi troa e la itre hna cinyihane hnine la itre zonale ngöne la itre hnepe menetr, ngo tro kö a nyimutre la itre hawa ne troa hnëkëne itre ej. Matre tuneka, epuni hi a canga goeëne nyimenyimëne la itre hna cinyihane memine la itre iatr, maine e hmekuje hi la ketre mekune hnei epuni hna ajane hnine la zonal? Maine ka inamacane së, ke, loi e tro sa thele troa kepe thangane qa ngöne la itre zonale së; maine troa thele traeme ne troa e me waitulune hnyawa la itre hna cinyihane asë hnine la lue zonale së. Ame la zonal, La Tour de Garde, celë hi zonale lai ka nyipi ewekë catre koi së, pine laka, kola hamëne la xeni ne la ua thatraqane la hneijine së. Ame Réveillez-vous! ke eje a hamëne la itre mekune ka lolo nge nyine ithuemacanyi koi së, ngöne la itre topike ka isa pengön. Thaa kolo hmekuje kö a acatrene la lapaune së, hnene la itre mekune hne së hna e hnine la itre zonal, ngo itre eje fe a hnëkë së matre troa hetre thangane hnyawa la huliwa ne cainöje së. Maine tro së a catre troa e pala hi la itre zonale së, haawe, tro hë a tru la madrine së troa tro fë itre eje kowe la itre xaa atr.
3 Nemene La Aqane Troa Aloine Trongëne La Aqane e Tusi Lapaa Së: Hapeu, ijiji epuni kö troa e pala hi la itre zonal? Nyimutre hë la itre trejine ka madrine la eloine la lue mekune celë nyine ixatua. (1) Troa hnëkëne la ketre porogarame ne e tus, nyine troa kuca e nöjei drai. Maine tro së a xome la 10 maine 15 lao menetre ngöne la nöjei drai, troa e tus, haawe, tro hë së a sesëkötre la etrune la itre hne së hna e ngöne la wiik. (2) Troa nyihatrene la itre götrane hnei epuni hna e hë; maine jë ngöne la qaane la nöjei hna cinyihane hne së hna e hë. Maine thaa hne së kö hna kuca tune lai, atreine hi tro pë hë së a thëthëhmine e la itre xaa hna cinyihan, maine zonale asë. Nyipi ewekë troa hnëkëne la ketre tulu ne huliwa ka lolo koi së, göi troa e tusi pala hi, nge loi e troa eatrëne hnyawa.—Wange ju la Filipi 3:16.
4 Hna hnëkëne hnyawa la xeni hnene la “hlue ka nyipici me ka inamacan,” hmekune la itre drai ka jole hne së hna melëne enehila; eje a hamëne la itre mekune ka ihmeku hnyawa memine la itre aja ne la itre atr ka nyipi ewekëne la mel. (Mat. 24:45) Nyipici, hetre thangane ka loi e qa ngöne la itre zonal, ngöne la mele së. Troa kökötre hnyawa la mele së ngöne la götrane la ua, e hne së hna thele troa aloine trongëne la aqane e lapaane së la itre itusi qa thei Akötresie. Hetrenyi la ketre manathithi ka tru ngöne la ua hna hnëkëne kowe la itre atr ka ami ijine ne troa e asë la itre zonal.