Canga Hnëkë Jë!
1 Kolo pala hi a hamëne hnene la organizasio i Iehova, la ketre porogarame ne la itre huliwa qa thei Akötresie, matre troa xatua së ngöne la götrane la ua. Tro la madrine së kowe la itre hna amekötine cili, a upi së troa thele la nöjei aqane matre troa kepe thangane hnyawa la itre hna hnëkëne koi së, tune la vizite ne la atre thupëne la sirkoskripsio, itre asabele me kovasio, me itre xaa huliwa ju kö hna amekötine ngöne la ekalesia. (Mat. 5:3) Ngo ame itre xan, hetrenyi pe kö la itre xaa huliwa hnei angatre hna mekune troa kuca, matre angatre pë hë a wangacone la itre manathithi ka nyimutre hna troa kapa qa ngöne lo lai itre huliwa cili hna hnëkëne thatraqane la mele së ngöne la ua. Nemene la nyine tro së a kuca matre troa hmekëne lai? Tuneka la aqane tro së a kuca matre thaa tro kö a he hnene la itre xaa huliwa, lo “nöjei ewekë ka [“sisitria,” MN]”?—Fil. 1:10.
2 Nyipi Ewekë Troa Inamacane Ngöne La Kola Hnëkë: Kola ihaji ngöne Ite Edomë 21:5 ka hape: “Ame la ite mekune ne la ate cate huliwa, te, kola atenamon; nge ite mekune ne la ate sasaqe kola apë ewekën.” Maine easë a ajane tro së a itre hna “atenamon” ngöne la itre huliwa i Akötresieti ngöne la mele së, haawe, nyipi ewekë tro së a canga mekune me hnëkëne hnyawa pala hi itre ej. Loi e tro pë hë së a amë la itre xaa sipu huliwa së ngöne la ketre ijin, thaa kolo kö a ajolë së troa kapa la itre manathithi ngöne la götrane la ua. Maine tro së a canga sesë me hnëkëne amë la itre ewekë, aja së, hne së hna mekune troa kuca, nge thaa pane mekune hë lo itre huliwa qa thei Akötresie ka troa xulu, eje hi laka, tro ha “apë ewekë” së ngöne la götrane la ua.
3 Loi e Thaa Tro Kö a Trian: Easë asë hi a isa canga hnëkëne amë la itre ewekë nyine tro së a kuca ngöne la itre drai ka calemi; tune la itre drai ne mano, troa tro göi huliwa, troa iöhnyi me itre sinee, me itre xaa tronge së ju kö. Qëmekene tro së a kuca me aejëne la itre mekuna së, loi e tro së a wange la porogarame ne la itre huliwa ngöne la götrane la ua ka troa xulu. Maine easë a öhne laka, kola troa traqa hnene la atre thupëne la sirkoskripsio, maine caa ijine hi la ketre asabele memine la easë a troa tro, haawe, loi e troa hetrenyi the së la ajane troa waipengöne hmaca la itre mekuna së, matre ijije troa hane sine la itre ijine cili. Hna canga thuemacanyi së hnyawa pala hi göne la itre huliwa ka sisitria cili, nge hna sa draine hë me hnëkëne amë itre ej. Tro fe la itre qatre thupe a ithuemacanyine la itre huliwa hna hnëkëne amë hë, ngöne la ekalesia.
4 Maine tro së a canga hmekëne me canga hnëkëne amë la itre huliwa ka nyipi ewekë catr, haawe, tro hë së a “tiqa hnene la ite wene la thina ka meköt, . . . nyine atrune me qaja aloinyi Akötesie.”—Fil. 1:11.