“Tenge Ewekë Hna Qaja Ngöne La Ijin’ Ej”
1 Hapeu, ma ketre itupathi koi nyipunie la troa tro fë la maca ne mel? Maine jë nyipunie a mekune ka hape, troa qaja la ketre ewekë nyine troa haine hnene la itre ka drei epun? Ame lo Iesu a upe la itretre drei nyidrë troa cainöj, hnei nyidrë hna qaja ka hape: “Troja cainöj, me hape, Easenyi hë la baselaia ne hnengödrai.” (Mat. 10:7) Thaa ka jole pi kö troa trotrohnine la maca, nge hmaloi pena e troa ce thawa. Ketre tune mina fe enehila.
2 Thaa nyipi ewekë kö troa nyimu trenge ewekë menu pala ha göi troa nyiqaane ithahnata. Ame ngöne la Filipo a iöhnyi memine lo eunuka ne Aithiope, hnei nyidrë hna hnyinge koi angeice ka hape: “Trotrohnine hë nyipëti la hnei nyipëti hna e?” (Ite Huliwa 8:30) Drei la ketre porotrike ka loi la thangan, qa ngöne laka, “tenge ewekë hna qaja ngöne la ijin’ ej”!—Ite edomë 25:11.
3 Aqane tro fe hi së lai a kuca, ngöne easë a cainöj. Troa tune kaa? Troa atreine goe, me iëne la itre hnëewekë ka ihmeku memine la aja ka eje thene la itre atr. Hnyinge jë, nge drenge hnyawa ju la kola ithahnata hnene la itre atr.
4 Itre Hnyinge Ka Sisitria: Maine easë a thele troa porotrike memine la itre atr, pane tupathe ju la itre hnyinge celë:
◼ “Hapeu, epuni kö a hane xome lo thithi ne la joxu (maine, Tretretroti) ngöne la hmi nyipunie?” (Mat. 6:9, 10) Pane e gufane jë la itre xaa hnep, nge thupene lai, qaja ju ka hape: “Itre xaa atr a hnyinge ka hape, ‘Nemene la ëje i Akötresie, lo hnei Iesu hna qaja ka hape, troa ahmitrötrën?’ Itre xane a qaja ka hape, ‘Nemene la Baselaia hnei Iesu hna upi së troa thithi kow?’ Hane kö epuni madrine la itre mekune ka sa la itre hnyinge celë?”
◼ “Hane kö epuni thele ka hape: ‘Nemene la aliene la mel?’” Amamane jë ka hape, hetre itretrengekeu eje memine la atrehmekune i Akötresie.—Ate Cai. 12:13; Ioane 17:3.
◼ “Hapeue la mekune i nyipunie, tro kö a paatre elanyi la mec?” Xome jë la Isaia 25:8 me Hna Amamane 21:4 matre troa qaja la nyipici ngöne la mekune cili.
◼ “Hetre nyin kö la gomegome e celë fen?” Amamane jë ka hape, Akötresie a ini së ka hape, troa “hnime la ate lapa easenyi ’ö.”—Mat. 22:39.
◼ “Hapeu, troa apaatrene elanyi la ihnadro hnene la ketre ewekë ka mala qaa hnengödrai?” Tro fë jë la hna thingehnaeane hnei Tusi Hmitrötr, laka, troa cile huti la ihnadro epine palua.—Sal. 104:5.
5 Loi e troa hmaloi me troa tro fë menyikëne hne së la maca ka loi. Tro hë Iehova a amanathithi së matre tro pala hi së a catre ce thawa memine la itre xaa atr, la “tenge ewekë” ne la nyipici.