Atraqatre La Thangane Ka Loi Hna Kapa Hnene La Aqane Ithahnata Ka Hmaloi Troa Trotrohnin
1 Pine nemene matre kola canga drenge la itretre cainöje thöth, hnene la itre atr hnei angatre hna cainöje kow? Ame la ketre kepin, ke, hnene laka, ame la aqane ithahnata i angatr, ke, thaa jole kö troa trotrohnin. Maine jë kola mekune hnene la itre xaa ka cainöje ka hape, nyipi ewekë troa thele atrune la itre trenge ithahnata nyine troa qaja, matre troa hetre thangane la hna cainöj. Ngo ame pe, ke, kola mama hnene la hna melëne hnene la itre trejine laka, hetre thangane ju kö la itre aqane nyiqaane ithahnata ka hmaloi troa trotrohnin, nge ka thaa qea menu kö.
2 Hnei Iesu hna cainöjëne la Baselaia i Akötresie, nge thaa jole kö la aqane ithahnata i nyidrë, nge nyidrëti a qaja mekötine la aliene la trongei nyidrë, thupene lai nyidrëti a inine la itretre drei nyidrë troa hane kuca tune lai. (Mat. 4:17; 10:5-7; Luka 10:1, 9) Hnei nyidrëti hna xome la itre aqane nyiqaane ithahnata, me itre hnying, me itre ceitune ka thaa jole kö troa trotrohnin, matre troa hetre hni ne ajane la itre atr troa drei nyidrë, nge troa hane ketr la itre hni angatr. (Ioane 4:7-14) Loi e tro fe sa hane xome la tulu i nyidrë, me thele la itre aqane nyiqaane ithahnata ka hmaloi troa trotrohnin.
3 Ame la ithuemacanyi nyine tro sa cainöjën, ke, ene la “maca ka loi ne la baselaia.” (Mat. 24:14) Maine tro nyipunie a xome la Baselaia nyine nyi taane la porotrike i nyipunie, ke, thaa tro pi kö a jole kowe la itre atr troa trotrohnine la itre aqane nyiqaane ithahnata i nyipunie. Ithahnatane jë la itre ewekë ka ketr la mele ne la itre ka troa drei së. Tru catre kö la aja ne la itre foë troa ithahnatane la pengöne la hnepe lapa, hune la troa qeje politik. Ame koi keme ke, huliwa me aqane troa mele ka loi la itre ewekë hnei angeice hna hna pi ajane troa porotrikën. Itre thöthi a nyiqaane mekune la mele i angatre elany, nge itre qatre a kukehnine la egöcatre ne la mele i angatr, me mele xetietë. Hna majemine hnehengazone hnene la itre atr, la itre ewekë ka traqa ngöne la nöje i angatr, hune la itre ewekë ka traqa ngöne la itre götrane gaa nany. Thupene la hna ce ithahnatane la itre ewekë ka ketri angatr, ke, eatrongë angatre jë kowe la itre manathithi hna troa kapa hnene la nöjei atr ka drengethenge Akötresie, ka troa mele fene la musi ne la Baselaia i Nyidrë. Atreine hi tro së a ahlëne la aja ne la itre ka drei së, e hne së hna iëne hnyawane la itre trenge ithahnata ka thaa jole kö troa trotrohnin, me xome fe la caa mekene tusi ka ihmeku memine la itre mekune hna qaja.
4 Atreine Tro Nyipunie a Nyiqaane Qaja Ka Hape:
◼ “Ma caasi jë hi la mekune so, laka, kola jole menu la fene enehila, pine laka, nyimutre la itre meci ka pëkö nyin. Ngo, atre fe hi nyipunie la hnei Akötresieti hna thingehnaean, ene laka, easenyi catre hë tro Nyidrëti a apaatrene la nöjei pengöne mec, memine la mec?” Nue pi troa sa, nge thupene lai e jë la Hna Amamane 21:3, 4.
5 Maine tro së a thele la itre aqane nyiqaane ithahnata ka thaa jole kö troa trotrohnin, eje hi lai laka, tro hë së a ketr la mekune me hni ne la itre atr ka nyimutre ngöne la teritoare së, me hane xatua angatre troa atrepengöi Iehova me hane mejiune kowe la mele ka thaa ase palua kö.—Ioane 17:3.