Atrunyi Iehova Jë Hnene La Itre Huliwa Ka Loi
1 Drei la eloine e troa hetre hnë zae, ngöne la kola asesëkötrë së hnene la ketre enyi ne mani! Maine keukawa, nge pëkö ethane la enyi kowe la mele i nyipunieti e cili, nge kola kepe nyipunieti hnyawa fe hnene la itre atrene lai uma, haawe tro hë nyipunie a madrine troa lapa me zae manie e cili. Jëne la huliwa ne cainöjëne la Baselaia, kola kötrene hnene la itre atr la fene i Satana me zae hnine la hnapo cili. Hapeue la thiina së o drai, atreine kö tro eje a xatuane la itre xane troa öhne la emingömingöne la hnapo cili? Eje hi, ke, öni Iesu ka hape, tro la itre atr a ‘goeëne la huliwa ka loi së; ame hna atrune la Tetetro së e koho hnengödrai.’—Mat. 5:16.
2 Nemene la nyine tro sa kuca matre troa hetre thangane ka loi la itre huliwa së thene la itre atr, ene hane ju fe angatre thele Iehova me tro kowe la organizasio i Nyidrë? Loi e tro sa melëne o drai la itre trenge ewekë i Iesu hna qaja ngöne Luka 6:31 me 10:27. Tro la aqane kuca cëlë a upi së troa hane hnehengazone la itre atr, celë hi ewekë lai ka aisapengö së memine la fene celë ka pë ihnimin.
3 Ame la ketre ijine hune he, ke, kola goeëne hnene la ketre söre la ketre föe ka tru pala ha la mec, matre thatreine hë eahlo thupëne la nekö i eahlo ka co. Haawe, kola sipone jë hnene la söre troa thupëne lai nekönatr. Ame la kola hnyinge hnene la föe la aqane tro eahlo a olene la loi hna kuca koi eahlo, önine lai söre ka hape: ‘Eni a sipo nyipo matre tro nyipoti a drenge la itre Temoë i Iehova e traqa pi angatre a wai nyipo.’ Celë hi hna kuca hnene lai föe, nge ame hë enehila, ke, ketre Temoë fe hë eahlo me föi eahlo. Jëne la itre huliwa ka loi, hna kapa la maca ne la Baselaia hnene la itre atr.
4 Sisitria Catre La Nöjei Götrane La Mele Së: Nyipi ewekë catre la thiina së ngöne la götrane hne së hna mele ngön, me ngöne la hna huliwa, maine ngöne la hna ini pena, me ngöne la itre ijine mano, pine laka, tro la itre atr a qaja la pengö së memine la hmi së, qa ngöne la hnei angatre hna öhne the së. Qa ngöne lai, loi e tro sa isa hnyinge ka hape: ‘Tune kaa la aqane waipengöi eni hnei itre xan, me hnene la fami i eni? Tune kaa la aqane goeëne la itre atr la hnalapang, hna hane kö nyidrawane ej, me thelëne hnyawa pala hi xötreith? Tune kaa mina fe la aqane goeë së ngöne la hna huliwa me ngöne la hna ini, ka canga traqa pala hi së ngöne la traem? Tune kaa së kowe la itre xan, ketre atr ka qahmihmi së, me ka metrötr?’ Maine nyipici laka, celë hi itre ewekë lai hne së hna kuca, haawe tro hë la itre huliwa së ka loi a amingömingöne la hmi Iehova.
5 Hna thuemacane la itre keresiano hnei Peteru ka hape, troa jele ngazo angatr. (1 Pet. 4:4) Nyipi ewekë troa xecie pala hi koi së laka, thaa hna qaja angazone kö la thiina së. (1 Pet. 2:12) Maine tro la itre huliwa së a atrune ngöne la nöjei drai la Akötresie hne së hna hmi kow, haawe, tro hë së a ceitu me itre lamepa hna acile draië, kola hudrume kowe la itre atr me ee angatre kowe la hnapo ne mele hnei Iehova hna hamën.—Mat. 5:14-16.