Itre Kovasio—Ijine Troa Madrin!

¹ Itre ijine madrin ka tru, la itre kovasio ne la itre Temoë i Iehova. Caa hadredre hë lao macatre nge sin enehila, kola kökötr la organizasio së jëne la itre icasikeu celë. Thaa ala nyimu kö angatr ngöne la qaan, ngo hne së hna öhn la aqane amanathithin hnei Iehova la huliwa së e cailo fene hnengödrai. Ame la pane kovasio ne la hneijine së, ke, hna kuca eje e Chicago, Illinois, lo macatre 1893, hna e la 360 lao ka sine ej, nge 70 lao ka xom la bapataiso. Hna e la 9 454 055 lao ka sin la itre kovasio hna hape “Kuca Thenge Jë La Wesi Ula” hna kuca e cailo fen lo macatre ka ase hë, nge ala 129 367 lao ka xom la bapataiso. Drei la ketre madrin ka tru koi së!

² Kola öhn ngöne la itre hneijine ne la Tusi Hmitrötr, laka, hna qeje pengön hnyawa la itre ini qathei Akötresie, jëne la ketre hna hnëkën ka sisitria, ene la itre icasikeu ne la nöje i Nyidrë. Ngöne la hneijine i Ezera me Nehemia, ke, kola dreng hnene la itre atr la kola e la Trenge Wathebo “qane la kaqane lai uti hë e hnaipajö.” (Neh. 8:2, 3) Hnene laka angatre a trotrohnine hnyawa la Trenge Wathebo ngöne la ijine cili, haawe, hetre “madine atraqat” hnei angatr hna kapa qa ngön. (Neh. 8:8, 12) Easë fe a madrin laka, jëne la itre kovasio easë a kapa la ini ka lolo, me xeni ne la ua “ngöne la nyipi ijin,” nge ka xulu eje qaathei Iehova jëne “la hlue ka nyipici me ka inamacan.” (Mat. 24:45) Jëne iamele koi së la itre kovasio, nge kola hamë egöcatr koi së ngöne la ua, ke, hnei Iesu hna qaja ka hape, nyipi ewekë tro la atr a mele “hnene la nöjei tenge ewekë asë ka xulu qa ngöne la ine ula i Akötesie.”—Mat. 4:4.

³ Sisitria La Manathith e Troa Catre Sin La Kovasio: Loi e tro asë hi së a hnëkë hnyawa, matre troa hane sin la itre drai asë ne la Kovasio Ne Distrik ne la macatre celë hna hape, “Itretre Inine La Wesi Ula i Akötresie.” Loi e tro fe sa mekun troa hane canga traqa e nöjei drai, me lapa uti hë la kola qaja ka hape, “Amen!” ngöne la thith ne nyipun. Ngo, maine easa ajan troa eatrëne lai, ke, nyipi ewekë tro sa saze la porogarame së. Maine jë troa nango hetre ejolen troa sipo ijine mano koi maseta, göi troa sine la kovasio. Nyipi ewekë tro sa cile huti kowe la aja së, nge thaa tro kö a nue la ketre ewekë troa ajolë së troa sine la ijine cili. Maine easa aja ka troa itrothei me iami, ke, loi e tro sa isa canga hnëkë göi loto. Drei la etrune la manathith hne së hna troa kapa, e hne së hna catre thele troa hane sine la kovasio!

⁴ Thaa hnene kö la nöje i Iehova hna e manie, ngöne la angatre a goeëne la itre manathith hna troa kapa qa ngöne la hna sine la itre icasikeu. Hanawange la itre tulu hna hamën hnene la itre xan ka sin lo Asabele ne la itre Temoë i Iehova e New York lo macatre 1958 hna hape, “Aja i Akötresie.” Ka xupi uma la ketre trejin, hnei nyidrëti hna pane thing la itre qëhnelö ne la hna huliwa i nyidrë koi lue wiik, matre troa hane ixatua me sine la asabele. Hnene la ketre trejine qaa Îles Vierges hna salemën la ketre hnepadro i angeic matre tro la fami asë, ala sikisi angatr a hane sin la asabele. Hna salemën hnene la lue trefën la sine bootre i nyidro ka hetre masinen, matre aijijë nyidro troa ce tro memine la köni nekö i nyidro kowe la asabele, caa ka lue treu uti hë la ka seven lao macatre. Hna qaja kowe la lue sipu trejin qaa Californie ka hape, maine tro nyidroti a paatre ngöne la hna huliwa, ke, thaa tro hmaca kö nyidro a öhn la huliwa i nyidro ngöne la kola bëek. Ngo eje hi laka, thaa hna acilë nyidroti kö troa tro kowe lai asabele cili, ketre asabele hna thatrein troa thëthëhmin.

⁵ Iehova a Amanathithin La Trenge Catr Hne Së Hna Kuca: Thaa sihngödre kö koi Iehova la itre trenge catr hna kuca hnene la nöje i Nyidrë, nge ketre Nyidrëti a amanathithine itre ej. (Heb. 6:10) Hanawang la ketre ceitun, ngöne la ijine asabele göne la aqane kökötr la musi qaathei Iehova, ke, hna dreng hnene la itre ka sine ej la cainöje ka tru alien hna hape, “Fene Ka Hnyipixe.” Hnei Frederick Franz hna ahlën la aja thene la itre atr ka sine lai asabele, me hnying ka hape: “Hapeu, hetre madrine kö the së ngöne la asabele ka tru celë, laka, hetrenyi the së ngöne la jidri celë, la itre hene ne lo fen ka hnyipixe elany?” Ame hë lo 50 lao macatre thupen, jëne la Salamo 45:16, easë pala hi a madrine laka, easa trotrohnin hnyawa la mekune cili.

⁶ Thupene la hna sin la kovasio ne distrik lo macatre hnapan, ke, hna cinyihan hnene la ketre hene fami ka hape: “Itre trejine fe, thatreine jë kö tro nyipunieti a atre la aqane iamele la kovasio celë. Hna tro hnene la fami i eni kowe la traone göi huliwa, ngo thaa pane wange pe la engazon ngöne la ua. . . . Hne huni hna pane amë la itre hnëqa huni ne keresiano. Ketre, thaa sine hë huni la itre icasikeu, me ce cainöje trootro. . . . Hnene la kovasio celë hna aegöcatrenyi hun, me aijijë huni hmaca troa axeciën la itre aja hun ngöne la ua nyine thel troa traqa kow, me ce wang la aqane troa eatrëne itre ej.”

⁷ Iehova a hamë së la xeni ne la ua, thatraqane la mele së. Nyidrëti a hamëne la xeni ka nyimutre, ngöne la itre kovasio së. Loi e tro la aqane kapa madrine së la xeni cili a aijijë së troa amexeje hmaca lo hna qaja la hnei Konelio ekö ngöne la kola wai angeic hnei Peteru aposetolo, kola hape: “Nge eëhuni asë hë la ngöne la xajawa i Akötesie, troa denge la nöjei ewekë asë hnei Joxu hna ahnith koi nyipë.” (Ite Huliwa 10:33) Epi tro sa eatrën la aja së troa cil “xajawa i Akötesie,” ene la troa sin lo nöjei drai ne Kovasio Ne Distrik ne la macatre celë hna hape, “Itretre Inin La Wesi Ula i Akötresie” me kapa madrine ej!