Hapeu Easë Kö a Kapa Madrine La Itre Ewekë Ka Hmitrötr?
1 Ame la kola hnyingëne koi së ka hape, easë kö a kapa madrine la itre ewekë ka hmitrötr, tro hi së lai a canga sa ka hape, eje hi! Nemene la itre ewekë i Akötresie ka hmitrötr, hne së hna kapa madrin?
2 Drei la ewekë ka sisitria kowe la mele së, ene la troa jialolone la aqane imelekeu së memine la Tretretro së e hnengödrai! Nyidrëti a qaja axeciëne koi së ka hape, maine tro së a “eashenyi koi Akötesie, tro Nyidëti a eashenyi koi së.” (Iako. 4:8) Maine paatre ju la mele hna hujëne hnei Iesu Keriso nyine thupene mel, ke, pëkö atr atreine troa kapa la mele ka thaa ase palua kö. (Ioane 3:16) Loi e tro së a hetre hni ne ole, me qaja lapaane odrai jëne la thith, la ejuine la madrine së kowe lai ahnahna i Akötresie cili.
3 Ceitune hi la Wesi ula i Akötresie, ene la Tusi Hmitrötr, memine la organizasio i Iehova e celë fen, laka, lue ewekë ka hmitrötre asë hi lue eje koi së. Easë a amamane laka, easë a madrine kowe la itre ewekë cili hna hamëne hnei Iehova, e tro së a melëne la itre trepene meköti qa hnine la Tusi Hmitrötr, me acatrene la ihnimi së me itre trejin, me ipië kowe la musi hna acile hnei Iehova, me ce huliwa memine la itre ka elemekene la organizasio.—1 Pet. 1:22.
4 Jëne la hlue ka nyipici me ka inamacan, kola mana la xeni hne së hna kapa, ngöne la götrane la ua. Troa mama hnyawa ngöne la kovasio ne distrik ne la macatre celë, hna hape “Kuca Thenge Jë La Wesi Ula.” Tro së a kapa la itre ewekë ka sisitria catre kowe la mele së, ene la ini ne iamele, memine la aqane tro sa ce mele keukawa memine la itre trejine me easë. Tune kaa la aqane tro sa amamane la madrine ka eje e kuhu hni së, kowe lai ewekë ka hmitrötre cili hna hnëkëne koi së?
5 The Tro Kö a Xome Ahmaloeëne La Ēnē i Iehova: Hnei Nehemia hna hmekëne ekö la itre ka catre acile hmaca la itre ngöne uma e Ierusalema, ka hape ‘tha tro kö a nue tije la ēnē ne la Akötesie i angatr.’ (Neh. 10:39) Hnei Iehova fe hna hnëkëne enehila la “ēnē” thatraqane la hmi. Ame fe la itre kovasio ne distrik, ke, celë hi ketre götrane ne la hmi lai. Thaa tro kö a xome ahmaloeëne la hna hnëkëne cili, kola hape nyipi ewekë tro së a sine la itre kovasio, me drenge hnyawa me amamane koi Iehova laka, ka sisitria koi së la itre hnei Nyidrëti hna hnëkëne koi së. (Heb. 10:24, 25) Nemene la nyine tro së a hnëkëne enehila matre troa amamane laka, easë a wangatrune la ewekë cili ka hmitrötr?
6 Loi e Tro Sa Sine La Köni Drai Asë: Loi e tro së isa ala caasi a hnëkë, matre troa sine asë la köni drai ne kovasio, e 15-17 maine pena e 22-24 semitrepa 2000. Hapeu, hnei epuni kö hna hane mekune me hnëkëne troa canga traqa e nöjei drai, me sine la kovasio uti hnyawa ha la thithi ne nyipune e sabath? Maine eje hi, ke, atraqatre la itre manathithi hne së hna troa kapa. Nyipici laka, hetrenyi pala hi la itre hnepe jole hna cile kow ngöne la easë a mekune troa sine la ketre kovasio. Thaa tro kö së a luelue ngöne la easë a axeciëne la mekuna së göi huliwa. Maine jë, hetre jole goi gojenyi ne tro kowe la hnë kovasio. Ngo, the nue kö la itre ewekë cili troa sewe së troa sine la kovasio.
7 Loi e Troa Wangatrune La Tulu Ka Lolo Celë: Ame ngöne lo macatre hnapan, kola tro hnene la itre xaa trejine qa Afrik troa hane sine la Kovasio ne Distrik, hnei angatre hna ixelë e kuhu gojenyi memine la itre sooc. Kola hnyinge kowe la itre trejine ka hape: “Itre drei epun, nge epuni a tro ië?” Öni angatre jë hi e sa ka hape: “Itretre Anyipici Iehova hun, nge eahuni a tro troa hane sine la kovasio ne distrik.” Kola qaja hnene la ketre sooci ka hape: “Ame epun itre Temoë i Iehova, pëkö hnei epuni hna xouen. Tro jë troa Kovasio, nge the ange xou kö. Caasi hi tro nyipunie a ixelë memine la itre sooc ka nyimutre. Loi e tro pala hi nyipunie a tro e nyipine la gojeny! maine epuni a öhne la itre atr a icacaxeny, the tro jë kö a jea!” Pine laka, hnei angatre hna trongëne hnyawa la hna ahnithe hnene lai sooc, haawe, lolo la trongei angatre uti hë la hnë kovasio. Hna amanathithine la itre trejine celë, pine laka hnei angatre hna amamane la ajane i angatre kowe la itre ewekë ka hmitrötr.
8 Tune la itre trejine me easë e Afrik, easë fe a hane cile kowe la itre jole ka tru. Ngo, atreine fe tro së a hane nyitipune la lapaune i angatre me catre fë la mekune së, troa sine la nöjei drai ne la kovasio ne distrik. Maine hetrenyi la itre ewekë hne së hna ajane troa kuca göi Kovasio, loi e troa qale koi Iehova matre troa eatrongë së, me lapa atre laka, tro Nyidrëti a amanathithine la aqane catre thele së troa sine apexejene la itre drai ne kovasio.
9 Kapa Ju La Itre Manathith: Easë a ajane catrëne la Wesi Ula i Akötresie, me atre laka, jëne ej, ijiji së troa kökötre ngöne la ua matre troa mel. (1 Pet. 2:2) Maine tro së a sine me drenge hnyawa la porogarame ne kovasio, ke tro ha acatrene hnyawa la lapaune së kowe la Wesi Ula cili, me hnëkë së troa cile catre kowe la itre ithupathi Satana. Maine tro sa tune lai, haawe, tro hë së a amamane koi Iehova me itre ka goeëtili së laka, easë a wangatrune la itre ewekë ka hmitrötr, nge ame së ke, “tha ite sine i angate kö lo angete hmacahmaca . . . ngo ite sine i angat’ angete lapaune uti hë la mele la u.”—Heb. 10:39; 12:16; Ite edomë 27:11.
10 Loi e tro sa lapa treqene tro Iehova Akötresie a fe la itre thingene ne hnengödrai, me nenge hui së asë la itre manathithi ngöne la ua. (Mal. 3:10) Loi e tro së a mekun, me eatrëne la aja the së troa sine la kovasio ne distrik, qaane la kola nyiqaane la porogarame e hmakanyi ne drai ka tru uti hë la thithi ne nyipune me “Amen!” e sabathi hnaipajö. Troa atraqatre la madrine së, e hne së hna kuca tune lai!