“Eni a Cile Hut! Eni a Cile Hut! Eni a Cile Hut!”
1 Kola amekunëne la aqane cile catre hnene la itre thauzane lao Temoë jëne la itre trenge ithahnata celë hna qaja hnene la ketre keresiano ka lapa nyipici qëmekene la Holocauste, ene la aqane humuthe la itre atr hnei eë—mele me mec—hnei angatre hna catre fë la itre ini hnei angatre hna lapaune kow ngacama atraqatre la iaxösisi ne la itre atre ne la parti Nazie. (Efe. 6:11, 13) Hna qaja la aqane catre me hune angatre qëmekene la itre iakötrë, ngöne lo video ka ketr la itre hni së hna hape, La fermeté des Témoins de Jéhovah face à la persécution nazie. Kola ithuecatre kowe la nöjei atrene la ekalesia troa göeëne ej, me ce ithahnatane la itre hnei angatre hna mekun, memine aliene hni angatr.
2 Hane cahu itre hnyinge ka troa xatua së troa atreine waimekun: (1) Nemene la itre kepine matre hna cile catre hnene la Itre Temoë i Iehova qëmekene la itre atre ne la parti Nazie? (2a) Nemene la itre mekune ka isazikeu göne la kola thili koi darapo, nge pine nemen? (2b) Nemene la thangane lai kowe la itre hnepe lapa ne la itre Temoë? (3) Hna iupi fë tune kaa la itre Temoë ka nyimutre ngöne la itre camps de concentration, hna wangatrehmekunyi angatre tune kaa, nge tune kaa la aqane qanangazo angatr? (4) Nemene la pune kowe la itre trejine së ka cile catre kowe la itre mekune i angatr? (5a) Tune kaa nge eue la kola qaja amamane hnene la itre Temoë i Iehova, la itre iangazo hna kuca fene la musi Hitler? (5b) Tune kaa la aqane ujë i Hitler? (6) Tune kaa la aqane thupëne la itre Temoë i Iehova ngöne la ngönetrei me ngöne la ua, hnene la aqane caasi angatr? (7) Nemene la uke nyima hna sile ngöne la camps de concentration ? (8) Drei la itre trahmanyi me föe me itre thöthi ka amamai tulu ka loi ngöne la aqane troa cile huti ngöne la iakötrë, ene pe angatre a ithuecatre koi nyipunie troa mele nyipici koi Iehova ngöne la kola traqa koi nyipunie la itre itupath? (Goeëne ju la Annuaire 1999, götrane 144-7.) (9) Nemene la aqane tro la video celë a xatua së itre Temoë i Iehova, matre thaa tro kö së a hane mele tune la itre atre ne fen?
3 Tro la tulu ka loi ne la itretre Temoë i Iehova hna qeje pengöne ngöne la video, La fermeté des Témoins de Jéhovah face à la persécution nazie, a xatuane la itre thöth, memine fe la itre atr ka thaa Temoë, troa hane cile kowe la itre jole katru, tune la thatreine ixomihnikeu, me itre iaxösisi, me mekuthetheu. Maine nyipunie ngöne la itre uma ne ini ka co, maine ka tru pena, ke, hapeu, ijije kö tro nyipunieti a nyijëne la ka ini nyipunie troa hane amamane la video celë kowe la itre sine ce ini me nyipunie? Maine jë ijije tro nyipunieti a hamëne la ketre video, me qeje pengöne eje ceitune me easë a qeje pengöne la ketre hna melëne hnene la ketre nöj, maine pena kösë ketre film nyine troa xomi ini qa ngön.
4 Ketre jia ne huliwa ka lolo catre la video, La fermeté des Témoins de Jéhovah face à la persécution nazie, ke eje a amamane la aqane hamë së la trenge catre ngöne la ua hnene la ini qaathei Akötresie, matre troa amadrinë Nyidrë ngöne la easa cile huti pine la meköt. (1 Kor. 16:13) Qaja trongëne jë la video celë, kowe la nöjei atr ka hni ne ajane kowe la nyipici.