Hetre Jiane Huliwa Së Ka Hnyipixe Thatraqan La Itre Etid!
1 Hetrenyi la ketre föe ne Amerika ka catre hmi ngöne la hmi i Katolik. Hnei nyidroti pala hi hna cilëgölin la itre ini ne la hmi. Hnei nyidroti fe hna hane kuci pèlerinage a tro Vatika. Ame ju hi la kola fenifeni qëhnelö hnene la ketre Atre Anyipici i Iehova, ene pe eahlo a kapa ju la trejin matre troa nyiqaane etid me angeic. Pine nemen? Pine laka aja i eahlo troa inin la hna qaja hnei Tusi Hmitrötr, nge ketre thaa hna hane kö sipo eahlo hnene la hmi i eahlo troa inin la Tusi Hmitrötr. Nemen la ini hne së hna xom qa ngöne la tulu celë? Thatreine kö tro sa atre la itre pengön la itre atr ka troa ajan troa etid.—Ate Cai. 11:6.
2 Hapeu ka luelue së troa qaja kowe la itre atr ka hape easë a ajan troa inin la Tusi Hmitrötr kowe la itre atr ka hni ka ajan? Atre fe kö la itre atr ne la nöje së ka hape thaa hna nyithupene kö la itre etid hne së hna kuca? Nemen la aqane tro sa atre laka tro angatr a hane traqa kowe lai? Hnene la troa xom la jiane huliwa ka hnyipixe! Celë hi ketre tarak ka sikisi lao götran, hna nyi taan ka hape, Aimeriez-vous en savoir plus sur la Bible ? Tupathe jë së troa atrepengöne hnyawa la alien la tarak cili, ene la itre mekune hna qejepengöne fene la itre taane ka co.
3 “Pine Nemen Matre Troa e La Tusi Hmitrötr?” Ka nyipi lolo catr la itre kepin hna hamën hnene la tarak. Eje a qejepengöne ka hape, eje e hnin la Tusi Hmitrötr la “ini göi ihnim qa thei Akötresie,” kola amaman la aqane troa easenyi Nyidrë jën la thith, matre troa sipo ixatua, memine fe la aqane troa kapa la ahnahna qaathei Nyidrë, ene la mele ka tha ase palua kö. (1 Thes. 2:13) Kola qaja mina fe hnene la tarak la “itre mekun ka nyipici ka hamën la lai,” ngöne la nöjei pengöne götran, tun la pengön la atr ngöne la angeic a mec, memin la kepin matre kola tru catr la itre jol e celë fen. Ej a qejepengöne fe la “itre trepene meköt i Akötresie hnin la Tusi Hmitrötr,” laka, maine tro sa trongën itre ej, ke troa hetre thangan ka loi ngöne la götran la ngönetrei, me hamë madrin koi së, me mejiun, me itre xaa thiina ju kö ka mingöming me lolo. Kola qaja mina fe la ketre sipu kepin matre nyipi ewekë catr troa e la Tusi Hmitrötr—kola amaman hnene la itre hna perofetan göne la itre drai elany, la itre ewekë ka troa traqa koi së laka calemi catre hë.—Hna ama. 21:3, 4.
4 “Ixatua Jë Matre Troa Trotrohnin La Tusi Hmitrötr”: Kola qaja hnene la tarak ka hape: “Easë asë hi a aja ixatua matre troa trotrohnin la Wesi Ula i Akötresie.” Kolo mina fe a qejepengön la aqane inine së la itre atr la Tusi Hmitrötr, kola hape: “Nyipi ewekë kö e troa inin trongën, me nyiqaane qa ngöne la itre ini ka nyitrepen la Tusi Hmitrötr.” Ame ngöne la kola kuca matre troa trotrohnin laka, “Tusi Hmitrötr la mus,” kola amaman hnyawa hnene la tarak la boroshür Thele ceitun me ketre ewekë ka troa xatuan la hnainin “troa trotrohnin la itre mekun qa hnin la Tusi Hmitrötr ngöne la nöjei pengöne topik.” Kola troa amaman hnyawa thupen, hnene la taan ka co, la ketre hnying ka nyipi ewekë catr.
5 “Hapeu Aja i Epuni Kö Troa Thele Ijin Troa Trotrohnin La Tusi Hmitrötr Ngöne La Nöjei Wiik?” Kola qejepengön hnene la tarak ka hape, atreine hi troa hnëkën la ijin me hnen la etid thenge la ka ijij kowe la hnainin, maine ngöne la hnalapa i angeic, maine jëne telefon. Drei la ka ijij troa sin la etid? Kola sa hnene la tarak ka hape: “Fami asë. Itre xaa sinee hnei nyipunie hna iën troa hane sine la porotrik. Ngo maine thaa ajane kö epun tro itre xan a hane sin la etid, tre qanyi nyipunieti kö.” Tune kaa la eqean la etid? Kola qejepengöne ka hape: “Nyimutre la itre ka xom la caa hawa ngöne la nöjei wiik matre troa etid. Maine atreine hi tro epuni a xom ngöne la nöjei wiik la nyimu traem, maine co pena hi, atreine hi tro la Itretre Anyipici i Iehova a xatua epun.” Hetreny la ketre mekun ka tru catr! Loi e aja the së troa huliwa hmekun la hna atrein me aqane mele ne la isa hnainin.
6 “Kola Ihë Troa Inin”: Hna hnëkën la ketre götran ngöne la tarak, jën troa sipon la boroshür Thele maine göi troa iwai matre troa qejepengöne la aqane trongen la etid. Hna nyihan hnyawa la icetrön la boroshür Thele. Hapeu trotrohnine hi së la aqane tro la tarak celë a ithuecatr kowe la itre atr ka hni ka menyik matre tro angatr a kapa la ixatua qa the së? Ame enehila, nemen la aqane tro së a huliwan hnyawa la jiane huliwa cili ka hnyipixe?
7 Troa Hamën Koi Drei La Tarak? Troa sipu hamëne ej kowe la itre atr, maine amë pe ngöne la itre hnalapa ka pë atren. Atreine fe troa tro fë trongën ngöne la itre hnalapa trootro, me e cahu gojeny, me ngöne la itre hna salem. Hamëne jë kowe la itre atr, ngacama tro angatr a kapa maine thipën la itre itusi së. Amë ju itre ej hnine la itre zonal, maine hnine la itre itus hne së hna tro fë. Ce iupi fë ju itre ej memin la itre tus hne së hna cinyanyin. Iupi fë jë fe kowe la itre atr hne së hna telefone kow. Loi e tro pala hi a xometrongën itre ej, matre troa hamën ngöne la kola itö, maine ngöne la kola ti loto maine avio me bootr, me ngöne la kola cainöj ngöne la nöjei ijin. Hamëne ju fe kowe la itre atr ka traqa kowe la hnalapa së. Hamëne jë fe kowe la itre sinee së, itre ka lapa ezi së, me itre sine huliwa së, me itre sine ce ini me easë, me itre xane ju kö hne së hna atre. Thele jë së troa hamën la tarak celë kowe la itre atr hne së hna troa iöhnyi memin! Nge thupene lai, nemene la nyine troa kuca?
8 Maine Kola Canga Kapa: Ame itre xaa atr, tre tro angatr a canga kapa me amaman la aja i angatr troa etid. Qa ngöne lai, ame ngöne la easë a cainöje trootro, loi e tro pala hi së a tro xom la lue boroshür Thele—caas kowe la hnainin, nge caas thatraqai së. Canga xejë jë la etid, e kola ajan la atr. Fe pi kowe la pane götran, nge e jë la hna hape, “Troa Inine Tune Ka La Boroshüre Celë.” Thupene lai, fe jë kowe la ini 1, nge amamane jë la aqane trongen la etid. Hapeu thaa ka jole kö la aqane kuca celë?
9 Maine Kola Ajan Hnene La Atr Troa Pane Mekun: Thaa tro kö a nue aqean lai atr troa mekun, ngo canga wai angeice hmaca ju. Ame ngöne la easë a troa iwai hmaca, thaa tro kö a thëthëhmin la boroshür Thele. Amamane jë la itre alien ej. Nue angeice pi troa iën la topik hnei angeic hna ajan troa ithanatan. Fe jë kowe lai ini cili, nge ce ithanatane jë.
10 Wange Hmaca Ju La Itre Atr Ka Kapa La Itre Zonal: Maine hne së hna amë pe la ketre tarak then la ketre atr ka kapa pala hi la itre zonal, wai angeice hmaca ju me qaja ka hape: “Ame lo traqa ni hnapan, madrine catre ni troa amë pe la ketre zonal La Tour de Garde. Maine jë öhne fe hi epuni laka ame la taan ka tru ne la zonal, tre kola hape, La Tour de Garde annonce le Royaume de Jéhovah. Enehila, eni a ajan troa qaja la pengön la Baselaia cili, memin la enyipi ewekën ej koi epun me fami i epun.” Thupene lai, fe jë la boroshür Thele kowe la ini 6. Nyiqaane jë hnene la pane paragaraf, nge e jë me ce ithanatan la itre mekun thenge la traeme ne lai atr. Thupene lai, ce axeciëne ju me angeic, göi troa iwai hmaca ngöne la ketre drai, me troa afenesin la ini hna xejë hë.
11 Loi e Thaa Tro Kö a Pë Tarak: Tro la itretre thupën la Huliwa ne cainöj, memin la itre trejin ka cilën la itre itus, a komaadën la itre tarak la nyimutre, Aimeriez-vous en savoir plus sur la Bible ? matre troa hetrenyi pala hi e hnine la ekalesia. Aline ju hnine la poos ne trauziz maine hnine trengene manie, me hnine loto, maine ngöne la hna huliwa, maine ngöne la hna ini, me hune la qëhnelö—ngöne la nöjei götran ka hmaloi koi së troa canga xom me hamën kowe la itre atr. Ketre, xome jë fe la itre xan ngöne la watreng ne cainöje i epun, matre troa hane hamën kowe la itre atr hnei epuni hna troa ithanata Tusi Hmitrötr memin.
12 Epi Tro Iehova a Amanathithi Së: Ame la aja ka tru ka eje thene la itre Keresiano asë, tre ene la troa inin la nyipici kowe la itre xaa atr. (Mat. 28:19, 20) Hapeu easë kö a hane etid memine la itre atr? Maine eje hi, haawe, ijij tro kö së a thele ijin troa kuca pena la ketre ngöne la porogarame së ne la wiik? Maine pëkö etidi së enehila, maine jë hetre hni ne ajane së troa xomiujin la ketre etid. Thithi jë koi Iehova matre tro Nyidrëti a amanathithi së me xatua së troa öhne la itre atr ka pi etid. Thupene lai, trongën thenge jë la itre hne së hna sipon ngöne la thith.—1 Ioane 5:14, 15.
13 Eje the së la ketre jiane huliwa ka hnyipixe, jëne troa nyiqaane etid memin la itre atr! Thele jë troa atrepengöne hnyawa ej. Tro fë jë. Epi tro asë hi së a thel “troa kuca la loi, me mana ngöne la nöjei huliwa ka loi, me troa ham, me loi qanathane” la hne së hna inine hë hnin la Wesi ula i Akötresie.—1 Tim. 6:18.
[Hna eköhagen götrane 4]
Itre Ijin Troa Tro Fë La Tarak
◼ Ngöne la nöjei drai ne porotrike së
◼ Ngöne la kola kapa hnene la ketre atr la itre itus së
◼ E pë kö atren la hnalapa
◼ Ngöne la easë a iwai hmaca
◼ Ngöne la easë a cainöj e cahu gojeny
◼ Ngöne easë a cainöj ngöne itre magazë
◼ Ngöne la kola cainöj ngöne la nöjei ijin
◼ Ngöne la easë a cinyany
◼ Ngöne la kola ti kar me avio me bootr
◼ Ngöne la kola traqa koi së hnene la ketre atr
◼ Ngöne la easë a ithanata memin la itre sinee së, itre ka lapa ezi së, itre sine huliwa së, itre sine ini së, me itre xaa atr ju kö hne së hna atre