“Ce Tro Jë Me Akötresie” Kovasio Ne Distrik Ne La Itretre Anyipici Iehova 2004
1 Nemene la ka aketrepengönën koi nyipunie la itre kovasio ne distrik hna hnen ngöne la nöjei macatre? Hapeu, itre cainöj nyine troa eköth la lapaune së, maine daram pena hna hnëkëne koi së hnene la “hlue ka nyipici me ka inamacan”? (Mat. 24:45-47) Hapeu, itre itusi ka hnyipixe ka qatreng la xeni ne la ua ka ijij kowe la hneijine së? Itre ewekë hna qaja hnene la itre trejine trahmanyi me föe ngöne la elolone la aqane saze la mele i angatr hnene la Tusi Hmitrötr? Itre rapor ngöne la aqane kökötre ne la huliwa ne cainöjën la maca ne Baselaia ngöne la itre xaa nöj? Hapeu kola ketrepengön hnene laka kola ce traqa itronyi hnene la itre atr asë qaane ju hi la ka co uti hë la ka tru? Eje hi, easë a ajan me lapa treqen la itre kovasio së göne hi la itre ewekë cili, me itre xaa kepine ju kö ka nyimutre! Ame ngöne la teritoar ne la filiale së, tre, troa kuca la pane kovasio ne distrik e Tas e 27-29 Ogas, thupene lai e Kaledonia e 10-12 Semitrepa, nge ame koi Walis me Futuna tre, 2-3 Okotropa.
2 Loi e Troa Sine Asë La Köni Drai: Hnei Iehova hna ahnith jëne Mose ka hape: “Troa icasinekeune la nöj . . . mate deng, me inin.” (Deu. 31:12) Jëne la hlue ka nyipici me ka inamacan, hnei Iehova hna hnëkëne la ketre porogaram ne ini ka ketrepengön thatraqa së ngöne la nöjei drai ne kovasio. Pine laka Nyidrëti a ini së matre tro sa ‘isa kepe thangan,’ haawe, loi e tro sa hane traqa troa kapa asë lai itre ini qaathei Nyidrë. (Is. 48:17) Maine epuni a ajan troa sipo drai ne mano kowe la maseta i epun, haawe, thithi jë koi Iehova me xötrethenge lo tulu i Nehemia me aqane catre i angeic, ngöne la epuni a troa sipo drai ne mano. (Neh. 1:11; 2:4) Ketre, loi e troa canga thuemacane e ijij la itre atren la hnepe lapa i epun ka thaa hmi kö, la itre hnei epuni hna mekune göne la kovasio.
3 Itre Xaa Nyine Troa Nyipiewekëne Hnyawa: Hnei Paulo aposetolo hna amekunëne la itre ekalesia ne Galatia troa “kuca la loi kowe la nöjei ate asëjëihë e hete ijine shë, ngo sisitia kowe la nöjei ate ne la lapa i angete lapaun.” (Gal. 6:10) Maine jë thaa tro kö a sipo ixatua hnene la itre trejine qatr me qatre föe, me itre sine atr, me itre föe maine trahmanyi ka hetrune caasine pë hë la itre nekönatr, maine itre ka cainöj ngöne la drai ka pexej; ngo maine jë hetrenyi la itre itupath hnei angatr hna cile kow, matre troa hane sin la kovasio. Hapeu, ijije kö tro nyipunie a “kuca la loi” koi angatr me hane xatua angatr? Loi e tro la itre sinee Keresiano memine la itre qatre thup a atrehmekune hnyawa la aqane mele memine la pengöne la itre atr cili.
4 Ame ngöne lo ijine kovasio ne la nöje i Iehova ekö, kolo ha troa 2 500 lao macatre enehila, tre, hnei Ezera memine la itre sine ce huliwa i angeic itretre Levi hna e la Wesi Ula i Akötresie me qejepengöne ej kowe la itre atr ka traqa itrony. Nemene hë la thangane lai? Kola qaja koi së ngöne Nehemia 8:12 ka hape, “hna tro hnene la nöj’ asë troa . . . madine ataqat ; ke hnei angate hna ate hmekune la tenge ewekë hna amamane koi angat.” Hapeu, easë kö a hane madrine me olene laka hnene la hlue hna iën hna xome la Wesi Ula i Akötresie me qejepengöne ej, me amamane koi së la aqane tro sa trongëne eje ngöne la mele së, tune lo hna kuca ekö hnei Ezera memine la itretre Levi? Ame ngöne la kola kuca tune lai hnene la hlue cili, eje hi lai a amamane la ihnimi nyipici Iehova memine la aqane wangatrune i Nyidrëti la nöje i Nyidrë. Loi troa xecie hnyawa koi së laka, thaa tro kö së a triane la caa drai ne la Kovasio Ne Distrik hna hape “Ce Tro Jë Me Akötresie”!
[Hna eköhagen götran 3]
Itre Hawa
Drai Ka Tru me Mecixen
9:30 - 17:10
Sabath
9:30 - 16:05