Kovasio Ne Distrik Ne La Itretre Anyipici Iehova 2003, “Atrunyi Iehova Jë”
1 Hnei Iehova hna qaja jëne la hlue i Nyidrë ka mele nyipici, ene Isaia perofeta ka hape: “Nöjenge fe, dei ni ju; nöjei atenge fe, hnangenyëneju koi ni.” (Is. 51:4) Qa ngöne laka kola jole catre trootro pala hi la itre ijine ne la pun, hapeu, nyipici kö laka, nyipiewekë catre tro sa wangatrune hnyawa la itre wathebo i Iehova? Ame la ketre aqane tro sa “hnangenyë” Iehova, tre, ene la troa drengethenge la hnei Nyidrëti hna amekötin, laka troa caas matre troa ce traqa itronyi troa ce hmi. Drei la ketre ijin tro sa ce hmi, hna aijijë së hnei Iehova jëne la itre kovasio ne distrik hna ami trepen e nöjei macatre! Ame ngöne la itre teritoar hna elemeken hnene la Bethela ne Kaledonia, tre, troa pane kuca e Tas la kovasio e 22-24 Ogas, thupene lai e Kaledonia e 12-14 me 19-21 Semitrepa, nge ame e Walis me Futuna tre, 4-5 Okotropa.
2 Tune la hna amamane hë ngöne la zonal La Tour de Garde ne 1 Julai 2002, hetrenyi fe la itre nöje ka tru hna iën matre troa hnen la itre kovasio thatraqan la itre nöj asë, nge troa sin itre ej hnene la itre trejin ne la fene hnengödrai asë. Maine jë thaa ijiji së fe kö troa hane sin la ite kovaso ka tru cili. Ngo caasi hi la aqane trongene itre eje memine la itre kovasio ne distrik asë. Nemen la aqane tro sa kuca matre tro sa kepe thangane hnyawa la itre hna amekötine enehila hna hnëkën thatraqane lai itre kovasio cili?
3 Loi e Tro Sa Sin La Nöjei Drai Ne Kovasio: Maine easë a ajan troa kepe thangane hnyawa la ini hna hamën hnene la hlue ka nyipici me ka inamacan, haawe loi e troa xecie hnyawa koi së tro sa sin asë la porogaram ne kovasio. (Mat. 24:45) Hapeu epuni kö a troa hane sipon kowe la maseta i epun troa mano matre troa hane sin la nöjei drai ne kovasio? Qëmeken troa sipon hnei Nehemia koi Aretaseta joxu troa xupe hmaca e Ierusalema, hnei angeic hna “thithi koi Akötesi ne hnengodrai.” (Neh. 2:4) Loi e tro fe së a hane thithi tune lai koi Iehova matre troa hetre trengecatre së troa sipon kowe la maseta së troa hane sin la köni drai asë hna amekötin thatraqan la kovasio. Nge tune kaa ju hë e thaa hmala kö la maseta së troa nue drai ne mano? Maine jë troa qejepengön ka hape ame la ini hne së hna kapa ngöne la itre ijine kovasio, tre, kola xatua së troa inyipicikeu, me troa huliwa hnyawa, haawe ma tro jë hë a xatuane lai maseta troa nue drai ne mano së. Ketre, maine hetrenyi la itre atren la fami së ka thaa hmi kö, loi e troa hane thuemacanyi angatr matre tro angatr a canga hane hnëkë troa sin lai kovasio.
4 Xatuane Jë La Itre Ka Ajan La Ketre Hnepe Ixatua: Hetrenyi kö e hnine la ekalesia së la itre ka aja ixatua göi troa sin la kovasio? Eje hi laka hetrenyi kö la itre nyipi ixatua hna hamën hnene la itre trejin kowe la itre sinee i angatr ka qatre hë, maine ka sine atr, ngo loi e tro fe la itre qatre thup me itre xane ju kö a hane atrepengön la itre trejine cili matre troa hane ihnimi me xatua angatr.
5 Loi e tro la seketere ne la ekalesia a wange hmaca la nöjei Pepa Ne Sipo Göi Aja Uma hna hamën hnene la itre trejin. Troa sijihatren hnene la seketere me iupi fë kowe la atrekë hnëqane la serevis ne hamë hnalapa. Ame la hna amekötine celë, tre, thatraqane hmekuje hi la itre trejine ka hlemu loi ngöne la ua nge ka trene kuku ka lolo thiina. Maine kola nango jol pine la aqane ujë ne la ketre trejin, maine ketre atrene pena la fami, haawe, loi e troa pane hamë eamo koi angatr isa ala caas hnene la lue atren la kometr ne la huliwa, matre troa ithanatane lai jol ka eje thei angatr.
6 Kola Alamekë Së Hnene La Itre Atr: Hapeu öhne kö la itre atr la eisapengö së Itretre Anyipici Iehova memine la itre atr ne la fene celë? Eje hi! Hna hamëne pala hi la itre mekune ngöne la aqane ce huliwa ne la itre temoë memine la elolon la aqane ujë i angatr ngöne la itre ijine kovasio ne distrik. Kola xatua së hnene la itre mekune cili troa atrehmekune hnyawa la pengöne la “inamacan qa koho,” laka lolo la thangane ej kowe la mele së. (Iako. 3:17) Pine laka hna celohmë së “nyine waduo kowe la fene hnengödrai,” haawe, loi e tro pala hi la aqane ujë së a amaman ngöne la nöjei drai la ehmitrötren memine la elolone la Akötresi së ene Iehova.—1 Kor. 4:9.
7 Pine laka “kola patre la pengöne la fen,” nge kola nyipi ewekë catr la itre kovasio ne distrik, ke itre ej a xatua së troa egöcatr ngöne la götrane la ua. (1 Kor. 7:31) Eje hi laka, thaa ewekë ka hmaloi kö la troa hnëkë troa sin asë la itre drai ne kovasio, ngo hetre manathithi ka tru hna troa kapa qa ngöne lai. Hna hnëkëne la Kovasio Ne Distrik ne la macatre celë hna hape, “Atrunyi Iehova Jë,” matre troa xatua së troa catre pala hi ngöne la lapaun nge easë a treqen la tro Iehova a amekötin la fene i Satana. Epi thaa tro pi kö së a nue la ketre ewekë troa sewe së troa kapa la ini hna hnëkën hnei Iehova thatraqa së.—Is. 51:4, 5.
[Iatr ne la götran 3]
Itre Hawa
Drai Ka Tru Me Mecixen
9:30 - 17:00
Sabath
9:30 - 16:05