Kovasio Ne Distrik Ne La Itretre Anyipici Iehova 2005 “Loi e Troa Drengethenge Akötresie”
1 Pine laka Nyidrëti la Atre Ini Ka Tru, Iehova Akötresie a kuca matre tro sa ce traqa itronyi matre troa inin la itre jë i Nyidrë. (Is. 30:20, 21; 54:13) Nyidrëti a jëne la hlue ka nyipici nge ka inamacan, matre troa hnëkën la itre icasikeu cili, tune la kovasio ne distrik ngöne la nöjei macatre. (Mat. 24:45-47) Caasi hi la itre mekuna së memine la atre cinyihan la salamo, ene Davita, hnei nyidrë hna nyimane ka hape: “Tro ni a atrunyi Iehova ngöne la ite icasikeu.” (Sal. 26:12) Trotrohnine hnyawa hi Davita la elolon la troa ini së hnei Iehova, nge angeic a catre thele troa cememine la nöje i Nyidrë ngöne la ijine angatr a ce traqa itrony.
2 Hapeu, tro kö epuni elanyi a ce memine la itre atr ka traqa itronyi kowe la “ite icasikeu” nge ka troa hane sin la Kovasio Ne Distrik ne la macatre celë hna hape “Loi e Tro Drengethenge Akötresie”? Maine eje hi, tro cahu itre ithuemacany a xatua epuni ngöne la epuni a troa hnëkë troa sin la kovasio.
3 Hnëkë Jë Enehila Matre Troa Hane Sin La Nöjei Drai Ne Icasikeu: Ame ngöne la teritoar ne la filiale së, tre, troa nyiqaan la kovasio ne distrik e Tas e 26-28 Ogas, thupene lai e Kaledonia e 16 koi 18 me 23 koi 25 Semitrepa, nge thupene lai e Walis ngöne la 1 koi 2 Okotropa. “Ame la ite mekune ne la ate cate huliwa, te, kola atena mon.” (Ite edomë 21:5) Hapeu, thaa mama hnyawa kö ngöne la itre trenge ewekë celë ka hape nyipi ewekë tro epuni a canga hnëkë matre troa hane sin la kovasio? Maine epuni a ajan matre thaa tro kö a trian la porogaram nyine keukawa koi së ngöne la ua, haawe, loi e troa canga nyiqaane hnëkë enehila matre troa hane sin lai köni drai ne asabele. Maine epuni a troa sipo drai ne mano koi maseta, canga wange jë, the hmitre kö. Maine epuni a ajan troa ce ithanatan la hnei epuni hna mekun troa kuca memine la föi epun ka thaa hmi kö, the treqene kö la ijine asabele, canga thuemacanyi angeice jë. Ngacama hetrenyi la itre jol hnei epuni hna troa qëmeke kow, thithi fë jë itre ej koi Iehova, me mejiune laka, tro Nyidrëti a xatua epun troa “acatene la nöjei mekune i [epun].” (Ite edomë 16:3) Ketre, ka loi troa hane xatuane fe la itre ka etidi me epun, matre tro angatr a hane hnëkë kowe lai köni drai ne asabele.
4 Itre Aja Ka Ketrepengöne Kö: Hnei Paulo aposetolo hna qaja la aqane ujë ne la itre xaa trejin, ene laka hnei angatr hna “amadi” nyidrë. (Kol. 4:7-11) Ame la ketre aqane xatua Paulo hnei angatr, tre, ene la hna aejën la itre sipu aja i nyidrë. Tune kaa la aqane tro epuni a “amadi” itre xan ngöne la kola qëmeke kowe la kovasio? Maine jë troa aja ixatua göi loto maine göi uma hnene la itre trejine ka qatre hë, me itre sine wezipo, me itre ka cainöj ngöne la drai ka pexej, me itre xane ju kö. Ame la pane hnëqa ne la itre sinee, tre, ene la troa thupëne la itre atr ka tune lai. (1 Tim. 5:4) Ngo maine thaa ijije kö troa kuca lai, maine jë tro la itre trejin a thele troa ixatua. (Iako. 1:27) Loi e tro la itre itre trejin ka xomiujine la itre Ini Tus a ce wang memine la gurupe i angatr la itre ka aja ixatua, matre troa xecie hnyawa laka, hna canga hnëkë hnyawa ha thatraqane la kovasio.
5 Kola Aja Ka Ixatua Kowe La Ijine Kovasio: Hnei Iesu hna hamën la ketre tulu ka pexej, ngöne la troa wangatrun cememine la ipië la aja ne la itre xaa atr. (Luka 9:12-17; Ioane 13:5, 14-16) Kola xome la aqane ujë i Iesu hnene la itre ka saene troa huliwa ngöne la ijine kovasio. Easenyi hë matre hëne jë hnene la Kometr Ne Kovasio ngöne la nöj, la itre xaa trejin troa ce huliwa me angatr matre troa cile kowe la itre aja ka eje ngöne la itre serevisi ne la asabele. Kola aja qatre thupe mina fe troa ixatua me troa kapa la itre xaa hnëqa. Tro la hni ne ajan ka eje thei angatr a ketre tulu ka lolo catr kowe la nöjei atrene la ekalesia.—1 Pet. 5:2, 3.
6 Nemene La Hna Öhne Hnene La Itre Xan: Hnene la ketre föe ka cilë otel hna qaja ka hape: “Epuni la gurup hnei eahuni hna pi ajan. Lolo catre kö la aqane ujë i epuni hune la itre xaa gurup. Kola qaja aloine hnene la itre ka huliwa hnine la otel la elolone la aqane ujë koi angatr memine aqane kapa angatr la itre ahnahna, itre uti ne la hna xen. Angatr asë hi a ajan troa huliwa ngöne la itre mecixeni me sabathi ne epuni e celë hnine otel!” Hna qaja mina fe hnene la ketre trahmanyi ka cilë otel, ka hape: “Hmaloi catr troa ce huliwa memine la Itretre Anyipici Iehova.” Pane mekune ju la madrine i Iehova, ngöne la Nyidrëti a goeë së e huliwa thenge la aja i Nyidrë, ene pe kola atrunyi Nyidrë hnene la itre atr!—1 Pet. 2:12.
7 Jëne la “ate thupe nyipici,” hnei Iehova hna amekötine kowe la nöje i Nyidrë troa ce traqa itronyi matre troa drenge la ini qaathei Nyidrë ngöne la hneijine së. (Luka 12:42) Maine nyipici laka thaa ka hmaloi kö troa sine asë lai köni drai ne asabele, ngo troa hetre thangane ka loi koi së. Ame ngöne la macatre celë, tro la Kovasio Ne Distrik hna hape “Loi e Troa Drengethenge Akötresie” a acatrene hnyawa la aja së troa nyihlue i Iehova enehila uti hë epine palua. Catre pi së troa tune la atre cinyihan la salamo, ngöne lo kola hmekë së ka hape: “Atrunyi Akötesieti jë la Joxu ngöne la ite icasikeu.”—Sal. 68:26.
[Iatr ne la götran 4]
Itre Hawa
Drai Ka Tru Me Mecixen
9:30 - 17:05
Sabath
9:30 - 16:10