Kovasio Ne Distrik Ne La Itretre Anyipici Iehova 2007 “Xötrethenge Keriso Jë!”
1, 2. (a) Tune kaa la aqane xatuane Mose la angetre Isaraela matre troa kepe thangane hnyawa la hna ce traqa itronyi troa icasikeu? (b) Nemene la itre nyine tro sa canga nyiqaane hnëkëne enehila?
1 Hnei Mose hna amekötine koi angetre Isaraela asë me itre trehnyiwa ka nyihluei Iehova troa ce traqa itronyi me icasikeu ngöne la thupene la nöjei sevene lao macatre, matre troa dreng la kola e koi angatr la Wathebo. Hnauëne la kola amekötine tune lai? Göne matre tro angatr a “deng, me inin.” (Deu. 31:10-12) Easenyi matre icasikeu mina jë la nöjei Iehova, ngöne la köni drai ne Kovasio Ne Distrik, hna hape, “Xötrethenge Keriso Jë!” Ame e Tas, tre, caasi hi la Kovasio Ne Distrik; troa hnen e Luganville e 24 koi 26 Ogas maine 31 Ogas koi 2 Semitrepa 2007. Ame e Numea, tre, köni Kovasio, e 7 koi 9, me 14 koi 16 me 21 koi 23. Ame Walis, tre, lue drai ne Kovasio e drai 6 me 7 maine 13 me 14 Okotropa.
2 Hapeu, epuni kö a canga hane wai maseta matre troa sipo drai ne mano? Tro kö epuni a hane xatuane la itre hnainin maine itre atrene la lapa i epun matre troa hane ce sin me epuni la itre drai ne kovasio? Kola troa xatua epuni hnene cahu itre ithuemacanyi troa hnëkë.
3. (a) Nemene la aqane eatre enehila la hna qaja ngöne Isaia 25:6? (b) Nemene la hna wanga atrehmekune ngöne la pane drai ne kovasio, ene lo Drai Ka Tru, nge nemene la nyine tro sa isa kuca?
3 Loi e Troa Sine Asë La Köni Drai: Tru catre la xeni hnei Iehova hna hamëne kowe la nöje i Nyidrë, ngöne la götrane la ua. (Is. 25:6) Kola qaja la pui ne xeni ngöne la götrane la ua hna hamën ngöne la itre kovasio së e nöjei macatre. Kola wanga atrehmekune laka, thaa tru menu kö hnei atr ka sine lo Drai Ka Tru, hune lo lue xaa drai. Loi e eje la aja së troa madrine troa sine lo lai köni drai asë ne kovasio! Maine epuni a sipo ijine mano koi maseta, amexeje jë ngöne la thith. Thupene lai, ‘thele jë’ troa canga ce ithanatane lai memine la maseta i epun, ngöne la kola hamëne la drai ne kovasio. (1 Thes. 2:2; Neh. 2:4, 5) Maine jë ketre ixatua la troa qeje pengöne koi angeic laka, ame la itre kovasio së ngöne la nöjei macatre, tre, celë hi ketre igötranene la hmi së lai. Maine tro sa canga kuca la ewekë cili, hmaloi hi kowe la maseta së troa hnëkë me kapa la sipo së.
4. Nemene la aqane tro sa hnëkëne la itre hnainin memine la itre atrene la fami së ka thaa hmi kö troa hane sine la kovasio?
4 Loi e Tro Sa Hnëkëne La Itre Hnainin Memine La Itre Fami Së: Drei la ketre madrin elanyi la kola ce sine me easë la kovasio hnene la itre hnainin, nge angatr a hane xötrei öhne la aqane idreuthi ne la ihnimi ne la itre trejin “ngöne la icasikeu atraqat”! (Sal. 22:25) Canga thuemacanyi angatre jë matre tro angatr a ami ijine troa sine la kovasio. Ce thawa jë me angatr la itre kepin matre epuni a madrine troa sine pala hi la itre kovasio. Ka loi mina fe tro epuni a amamane kowe la itre hnainin la itre video ngöne lo itre kovasio ka ase hë, tune lo video hna hape, Unis grâce à l’enseignement divin matre troa hnëkë angatre kowe la itre ijine cili. Loi e tro mina fe la itre atrene la fami i epuni ka thaa hmi kö a hane atre la itre hna hnëkëne göi kovasio. Maine jë ijije hi tro angatr a hane hnëkë matre troa goeën la daram, maine troa ce sine me epuni la caa drai ne kovasio.
5. (a) Pine nemene matre nyipi ewekë catr enehila ngöne la hneijine së la itre icasikeu ne la nöje i Iehova? (b) Nemene la nyine tro së isa ala caasi a kuca enehila?
5 Easa “goeëne la drai a easenyi hë,” nge kola nyipi ewekë catre kowe la nöje i Akötresie troa ce icasikeu. (Heb. 10:25) Nyiqaane jë enehila troa canga hnëkë matre troa sine la köni drai ne kovasio, hna hape, “Xötrethenge Keriso Jë!”