Porogaram Ne Asabele Ne Sirkoskripsio Ka Hnyipixe
1 Nyipi ewekë tro sa catre mejiun koi Iehova, matre troa cile catr ngöne la lapaun, ngöne la fene ka iajojezi. Nemen la aqane tro sa amaman ngöne la nöjei drai ne mele së, laka, easë a mejiun koi Iehova? Tune kaa la aqane troa mama lai, ngöne la isa mele së, me e hnine mina fe la hnepe lapa së? Nemen la aqane tro la mejiune cili, a xatua së troa cile kowe la iajojezi ne la fene i Satana? Kola sa la itre hnyinge celë hnene la porogaram ne asabele ne sirkoskripsio ne la macatre ne huliwa 2003. Ame la taan la asabele cili, tre, “Lapaune Jë Koi Iehova Nge Kuca Jë La Loi.”—Sal. 37:3.
2 Ame la lapaun maine mejiune së koi Iehova, tre, thaa easë kö a amaman hmekuje hi ngöne la itre ijine ka tru, maine ngöne la itre ijin kola traqa koi së la itre jol. Loi e troa mama la mejiune së koi Iehova, ngöne la nöjei drai ne mele së. Hna tro lai a ithanatan ngöne la cainöj nyine nyitrepen la asabele, kola hape, “Mejiune Jë Koi Iehova Ngöne La Nöjei Ijine Asë.” (Sal. 62:8) Kola troa amamane fe hnene la cainöj hna troa thawa foan, hna hape, “Loi e Tro Së a Mejiune Koi Iehova,” la aqane troa thel me trongën la itre ithuemacanyi qa hnine la Tusi Hmitrötr, ka xatua së troa eköthe hnyawa la faipoipo së, me troa cil kowe la itre jol hna qëmeke kow hnene la itre atrene la hnepe lapa, me troa hane aejën la itre aja së ngöne la götrane la ngönetrei.
3 Kola uku së hnene la fene i Satana, matre tro së a xom la ketre aqane waiewekë ka menu, ngöne la loi me ngazo, me ajolën la mekune së, matre tro sa imenun la ka nyipi ewekë memine la ka thaa nyipi ewekë kö. (Is. 5:20) Hetrenyi mina fe la lue xaa cainöj, hna hape, “Thupëne Kö La Itre Ewekë Ka Gufa,” me “Kötrene Pi La Ngazo—Kuca Jë Së La Loi,” lue cainöje lai ka troa acatren la aja së troa ahmitrötrën la itre wathebo i Iehova ka draië.—Amosa 5:14.
4 Nyipi ewekë tro la itre hlue i Akötresieti a mejiune catr koi Iehova, ngöne la Nyidrëti elanyi a troa apaatren la fene ka ngazo celë. Itre mekune la hna troa hamën, jëne la cainöj kowe la ka ala nyim, hna hape, “Easenyi Hë Troa Thepe Së Qa Ngöne La Fene Ka Iakötrë Celë.” Thupene lai, kola troa könë së pena tro së a isa waipengö së, jëne la cainöj hna hape, “Tro Kö a Hane e Nyipunie Elanyi Troa Ketre Atren La Baselaia i Akötresie?” Kola nyipun la porogaram hnene la ketre ithuecatr, hna hape, “Mejiune Jë Kowe La Itre Hnei Iehova Hna thingehnaean.”
5 Ame la ketre ewekë hne së hna lapa treqen ngöne la itre ijine asabele, tre, ene la cainöj ne Bapataiso. Ame koi itre ka ajan troa xom la bapataiso, tre, loi e tro angatr a canga thuemacan la qatre thup perezida, matre tro nyidrë a hnëkën la itre nyine troa kuca.
6 Iehova hmekuje hi la nyine tro sa mejiune kow, me fedre kow, ngöne la itre hneijin ka ngazo hne së hna melën enehila. (Sal. 118:8, 9) Loi e tro asë hi së a sin la porogaram ne asabele ne sirkoskripsio, matre acatren la mejiune së koi Iehova.