Iehova La Nyine Troa Nyipi Atrun

Troa Atrune La Jidri Ne Pui Ne Xeni Ne La Joxu e Drai 16 Eiperem

¹ Kola atraqatre la madrine së ngöne la easë a easenyi trootro kowe la drai 16 Eiperem 2003. Ngöne la heji cili, easë a troa amekunën la drai ne meci Iesu, me ce atrun la ëje i Iehova memine la ka ala nyim, ene la itre milio lao trejin me easë e cailo fen. Meköti e tro sa atrunyi Iehova pine la hna amekötin hnei Nyidrë ka lolo, ene la thupene mel. Jëne la hna hnëkëne cili, tro hë Nyidrë a neng la itre manathith ka mingöming kowe la nöjei atr asë ka drengethenge Nyidrë. Easë a caasi qa kuhu hni së memine la atre cinyihan la salamo, kola u catr ka hape: “Atraqate Iehova, nge troa nyipi atrun.”​—Sal. 145:3.

² Ketre ijine lai hna hnëkën matre troa waipengöne me mekune hnyawa la loi hna kuca hnei Akötresie, memine la ejuin la ihnimi së koi Iehova qa ngöne la hnei Nyidrë hna upe “la Hupuna i nyidëti ka cas, mate melepi shë hnei nyidë.” (1 Ioane 4:9, 10) Maine tro sa drengethenge me atrun la Jidri Ne Pui Ne Xeni Ne La Joxu, tre, troa eje hnyawa e kuhu itre hni së laka “Ka ihnimi me ka utipine Iehova . . . nge atraqate la ihnim.” (Sal. 145:8) Eje hi laka, ame la mel hna hujën hnei Iesu, tre, celë hi hatren ka tru ne la ihnimi Iehova lai, kowe la nöjei atr asë. (Ioane 3:16) Ame la easë a pane mekun la ihnimi Akötresie memine la aqane mele nyipici Iesu, ene pe kola upi së troa atrunyi Iehova. Tro së elanyi a atrunyi Nyidrë uti hë epine palua pine la ihnimi Nyidrë ka sisitria, ene laka hnei Nyidrë hna aijijë së troa kapa hmaca la mele ka thaa ase palua kö.​—Sal. 145:1, 2.

³ Xatuane Jë La Itre Xane Troa Atrunyi Iehova: Tro la aqane kapa madrine së la ahnahna i Akötresie ka tru hune la nöjei ahnahna asë, a upi së troa könën la itre xaa atr troa hane ce atrunyi Iehova me easë. Hna amexej hnene la atre cinyihan la salamo jëne la uati hmitrötr ka hape: “Tro angat’ a nengepi la hna mekune la loi atraqate i cilie, me nyimane la thina ka meköti cilie.” (Sal. 145:7) Ame lo macatre hnapan, tre, hna acaa kuca la itre milio lao hawa ngöne la huliwa ne cainöje hnene la Itretre Anyipici Iehova. Nemen la thangan la trenge catre hna kuca? Kösë ame ngöne nöjei wiik, hna e la 5 100 la etrun la itre ka xom la bapataiso me nyihatren la aja i angatr troa nue la mele i angatr koi Iehova. Hna e la 15 597 746 la etrun la ka sine la Drai Ne Amekunën, nge ame thene la itre atr cili, tre 9 milio lao itre ka thaa hane pala kö atrunyi Iehova, tune la itretre cainöjën la maca ka loi, haawe nyimutre catr petre kö la itre atr ka ajan troa nyihlue i Iehova! Easë a madrine atraqatr la hnëqa së, itretre tro fë la Baselaia, ene la troa qaja la maca ka loi, me ea la itre hni ne la itre atr koi Iehova, me kowe la Hupuna i Nyidrë, me kowe la Baselaia.

⁴ Ame la ketre aqane troa xatuan la itre xan matre troa atrunyi Iehova, tre, troa könë angatr matre troa hane ce sin me easë la Jidri Ne Pui Ne Xeni Ne La Joxu. Hane kö epuni amë wengën ngöne la ketre pepa la ëje ne la itre atr hnei epuni hna ajan troa könën, memin la itre xan hna troa amekunëne kow, la drai me hawa ne nyiqaan. Hane kö epuni hamën la pepa ne ihë kowe la nöjei atr hnei epuni hna fejan hnine la ipepa? Maine thaa ase kö kuca, tre, canga wai angatre jë ngöne la itre drai qëmeken troa sin lai icasikeu. Xatua angatre jë troa kapa madrine me trotrohnine hnyawa la aliene la drai cili. Hnëkëne jë troa ikep ngöne la ijine cili. Loi e tro angatre a madrine la aqane kepe angatr hne së, me qaja koi angatr la madrine së ngöne la angatr a traqa.

⁵ Atreine hi troa thuecatrene la itre ka xötrei atre la nyipici troa kökötr hnei angatr ngöne la ua, hnene laka hna sine la Drai Ne Amekunën. Ame la ketre hnainin ka meci fë xou, tre, jole catre koi angeic troa hane tro kowe la gaa tru atr me traqa kowe la Drai Ne Amekunën. Ame la kola hnyingë angeic la hnei angeic hna mekun göne la icasikeu, tre angeic a qaja ka hape: “Celë hi ketre atr hmekuje nyine troa atrun, nge hnenge fe hna hane atrunyi nyidrë.” Qaane ju hi lai, angeic a nyiqaane sin la itre icasikeu.

⁶ Thupene La Drai Ne Amekunën: Nemene la nyine troa kuca matre troa xatuan la itre ka xötrei atre la nyipici, matre tro angatr a hane itretre nyihluei Iehova? Loi e tro la itre qatre thup a fejan la ëje ne la itre ka xötrei atre la nyipici, me ka sine la Drai Ne Amekunën, nge wange matre tro la itretre cainöj a canga wai angatr, me ce ithanatan me angatr la itre mekun ka ithuecatr hnei angatr hna trotrohnin, me öhn. Maine jë itre xan a ajan troa inin la Tusi Hmitrötr ngöne la itre hnalapa i angatr. Loi e troa könë angatr matre troa sine la nöjei icasikeu ne la ekalesia ngöne la wiik, pine laka tro ha kökötr la atrehmekune i angatr qa hnine la Tusi Hmitrötr e hna sine lapaane itre ej.

⁷ Loi e troa thele troa xatuan la itre trejine ka thaa cainöje lapaa kö, me itre ka nanazij troa sin pala hi la itre icasikeu. Maine kola sipo epuni hnene la itre qatre thup matre troa xatuan la ketre atr ka nanazij troa xome hmaca la huliwa ne cainöj, canga kapa ju. Easë hi lai a amaman la ihnimi së kowe la itre trejin me easë, me trongën la hna ithuecatr hnei Paulo aposetolo, kola hape: “Tro sha kuca la loi kowe la nöjei ate asëjëihë e hete ijine shë, ngo sisitia kowe la nöjei ate ne la lapa i angete lapaun.”​—Gal. 6:10.

⁸ Epi tro së asë a catre thel troa hane sin la Drai Ne Amekunën e drai 16 Eiperem. Thaa ajane kö së troa paatr ngöne la ijine cili ka hmitrötr, matre troa atrunyi Iehova. Nyipici, atrunyi Iehova jë së, enehila me epine palua, pine la itre huliwa i Nyidrë ka draië!​—Sal. 145:21.