Loi e Tro Sa Ce Traqa Itrony Matre Troa Atrunyi Iehova
1. Nemen la taan la kovasio, nge pine nemen matre Iehova hmekuje hi la hne së hna troa atrun?
1 Kapucatin asë Iehova, thatrehmekun la inamacane i Nyidrë, ka pexej la meköti Nyidrë, nge Nyidrëti hi la ihnim. Qa ngöne laka Nyidrëti la Atre Ixup, me Atre Hamë Mel, me Atre Musi Ka Tru ne la hnengödrai me fen, haawe, Nyidrëti hmekuje hi la hne së hna troa thili kow. (Sal. 36:9; Hna ama. 4:11; 15:3, 4) Ame ngöne la ijine Kovasio Ne Distrik, hna hape “Atrunyi Akötresieti Jë,” kola troa acatren la aja së troa atrunyi Nyidrë lo Akötresie ka caas.—Sal. 86:8-10.
2, 3. Tune kaa la aqane tro sa kepe thangane ka loi la hne së hna hnëkë hnyawa?
2 Nyipi Ewekë Troa Hnëkë Hnyawa: Maine easë a ajan troa kepe thangane hnyawa la pui xeni ne la ua hna hamën, nyipi ewekë tro sa canga hnëkë. (Efe. 5:15, 16) Ase jë fe hë së hnëkë göi uma hna troa lapa ngön, me göi gojeny, me sipo ijine mano thei maseta? The hmitre kö troa kuca la itre ewekë cili. Maine hmitre së troa sipo ijine mano göi kovasio, maine jë tro pë hë së a trian la itre xaa götran ka lolo ne la porogaram. Nyipi ewekë tro asë hi së a sin la nöjei drai ne la kovasio.
3 Loi e tro sa thele troa canga traqa ngöne la nöjei drai kowe la hna kovasio. Ketre, matre troa canga öhnyi göhnë qëmeken la nyima ne nyitrepen, nge kolo mina fe a aijijë së troa hnëkë treqen troa kapa la ini hna troa cile fë. Troa fe la itre qëhnelö ngöne la nöjei drai ne kovasio e 8 h e hmakany. Kola sipon matre thaa tro kö a canga masuan la itre göhnë, ngo göne hmekuje hi la itre atren la hnepe lapa së, maine itre ka ce ti loto pena me easë.
4. Nemene la itre hna sipone tro sa kuca, nge nemene la kepine lai?
4 Hna amekötin laka ka loi e tro së a xome la itre göxen hna hnëkëne hë thatraqane la kovasio, maine tro pena a isa traqa fë kemej matre thaa tro kö a tro trije la hna kovasio troa itö xen hmekune lo lai kola troa pane mano. Maine tro sa metrötrën lai hna amekötine cili, eje hi lai laka easë a thele troa tingeting me pane hane porotrike memine la itre trejine me easë ngöne lai itre hawa ne mano. (Sal. 133:1-3) Kola sipon matre thaa tro kö a traqa fë trengene timi ver, me ka haitr kowe la hna kovasio.
5. Tune kaa la aqane tro sa hnëkëne la itre hni së thatraqane la kovasio?
5 Drenge Ju Nge Inine Jë: Hnei Ezera hna thithi me hnëkëne la hni angeic troa kapa la wesi ula i Akötresie. (Ezera 7:10) Hnei angeic hna fe la hni angeic kowe la itre ini qaathei Iehova. (Ite edomë 2:2) Atreine fe hi tro sa hane hnëkëne la itre hni së kowe la kovasio, qëmekene la tro sa nue la itre hnalapa së, ene la troa waimekune hnyawa ngöne la taan la kovasio me ce ithanatane ej memine la fami së.
6. Nemen la ka troa xatua së troa xötrethenge hnyawa la itre hna qaja ngöne la itre cainöj? (Wange ju la itre mekune hna eköhagen.)
6 Eje hi laka ame ngöne la itre gaa tru atr, maine jë troa nyimutre la itre hna troa goeën, nge nyimu mejene mina fe, matre kösë itre ewekë lai ka troa ajolë së troa drenge hnyawa. Canga tro hi a thapa la itre mekune së, matre thaa drenge hnyawa hë së la itre cainöj. Maine troa traqa tune lai, troa luuzi la itre xaa ithuemacanyi ka nyipi ewekë catr. Hane cahu itre mekune hna eköhagen nyine troa xatua së troa atreine drenge hnyawa la itre hna troa qaja.
7, 8. Tune kaa la aqane tro sa wangatrune la itre xaa atr?
7 Loi e Troa Wangatrune Fe La Itre Xaa Atr: Ijije hi troa foto me xomi kamera ngöne la itre ijine kovasio, ngo troa thupën matre thaa tro kö a ajolën la itre xan, nge ketre loi e troa foto hmekuje hi qa ngöne la göhnë hne së hna lapa ngön. Loi e troa thinge la itre mobilis me itre xaa ewekë ju kö ka tune lai, matre thaa tro kö ajolën la itre xan. Thaa tro kö a saan la itre ewekë së ngöne la tirisite, maine ikaho ne la iuma ne kovasio.
8 Eje hi laka easë asë hi a thele troa traqa itronyi matre troa atrunyi Iehova! Catre pi së troa atrunyi Nyidrë hnene la troa sin la nöjei drai ne kovasio, me drenge hnyawa, me trongën la itre hne së hna inin.—Deu. 31:12.
[Hna eköhagen götran 3]
Aqane Drenge Hnyawa Ngöne La Itre Ijine Kovasio
▪ Mekune hnyawa ju la itre taan la itre cainöj
▪ Xome jë la itre xötr ne la Tusi Hmitrötr
▪ Xomi note jë
▪ Cinyihane ju la itre mekun nyine troa trongën
▪ Wange hmaca ju la itre ini hna kapa