“Loi e Tro Sa Ce Atrune La Ëje i Nyidrë”
1. Nemene la ketre ijine tro sa ce atrune la ëje i Akötresie, nge nemene la nyine tro sa nyiqaane kuca enehila?
1 Hna nyimane hnene la atre cinyihan la tusi salamo ka hape: “Ce me ini ju troa atrunyi Iehova ; nge tro sha cengöne adraiëne la atesiwa i nyidë.” (Sal. 34:3) Ame la Kovasio ne Distrik ka troa xulu, hna hape, “Ce Tro Jë Me Akötresie,” kola troa aijijë së tro sa hane ce atrune la ëje i Iehova cememine la itre trejine me easë trahmanyi me föe ne la itre ekalesia ka nyimutre. Hnei nyipunieti kö hna hnëkë göi uma, me göi loto, me göi troa sipo ijine mano thei maseta? Loi e tro sa canga hnëkëne amë la itre ewekë cili.—Ite edomë 21:5.
2. Pine nemen matre ka lolo catr la troa canga hnëkë matre troa canga traqa kowe la hnë kovasio?
2 Loi e Troa Canga Traqa Ngöne La Hnë Icasikeu: Nyimutre la itre ewekë nyine troa kuca ngöne la easë a sine la kovasio. Maine tro sa canga traqa kowe la hnë kovasio, eje hi lai laka troa hetre ijine tro sa thele göhnë së, nge atreine hi tro sa hane ce nyima me thithi memine la iatrene la icasikeu. (Sal. 69:30) Troa fe la itre qëhnelö e 8 h e hmakany. Kola sipone matre troa trongëne hnyawa la hna qaja hnene la itre ka troa ixatua göi hnë acile la itre loto, memine lo itre ka amamai göhnë hnine la iuma ne drai. (Heb. 13:17) Ame ngöne la itre hnepe menetr qëmekene troa nyiqaane la icasikeu, loi e troa lapa qëmeken hnene la perezida, ngöne lo ijine kola ahone lo miuzik ne la Baselaia nyine troa könëne la itre atr troa isa lapa göhnen. Loi e tro asë hi së a isa lapa göhnen qëmekene ngöne la ijine cili matre troa nyiqaane hnyawa la porogaram. (1 Kor. 14:33, 40) Tro caasi hi a ami hatrene la itre icea thatraqane hmekuje hi la itre ka ce tro me nyipunie hnine la loto ka caas, me ce mele me epun hnine la hnalapa.—1 Kor. 13:5; Fil. 2:4.
3. Nemene la itre hna hnëkën göi xeni hnaipajö, nge nemene la thangane lai?
3 Kola sipon matre loi e troa hane nyipi ewekëne lo itre hna hnëkën göi xen ngöne la hnë asabele, maine pena, tre, troa xomi kemej matre thaa tro kö a bëeke hmaca kowe la hnalapa. Kolo hi lai a aijijë së troa pane hane porotrik memine la itre trejin, nge ketre, matre ame la kola nyiqaane la icasikeu ngöne la hnaipajö, tre, easë fe hë e hnine la uma a lapa itreqe.
4. Pine nemen matre ketre jole la troa heetr me iseji hnyawa?
4 Troa Qahmihmi, Me Nyi Hnyawane La Aqane Heetr Me Isej: Maine jë troa ketre jole koi së la easë a mekune la aqane heetre së me aqane iseji së. Kola ukune la itre atr hnene la fene i Satana troa pi mama, me ngazo la thiina, me xome la itre aqane mel ka ketre pengöne catr nge ka thaa ihmeku kö memine la hne së hna majemine melën. (1 Ioane 2:15-17) Qa ngöne lai, ame ngöne la easë a axeciëne la itre mekun göi troa heetr me isej, nyipi ewekë tro sa wangatrune la itre eamo qa hnine la Tusi Hmitrötr matre troa “xelene la thina ka thaa ijiji Akötesie me nöjei aja ne la fen, ngo tro sha lapa mekun . . . ngöne la mele celë.” (Tito 2:12) Thaa tro pi kö së a athixötrëne la itre xaa atr hnene la aqane heetr me iseji së, ngacama itre trejine ju hë me easë maine itre xaa atr pena.—1 Kor. 10:32, 33.
5. Nemene la itre hnying ka troa xatua së troa isa wang la aqane heetre së me iseji së?
5 Ame ngöne la easë a hnëkë troa kovasio, tre, loi e tro sa isa hnyinge ka hape: ‘Hapeue la hnaheetreng, ka lolo kö maine ej a troa hule la lue meke ne la itre atr troa goeë ni? Eni kö a metrötrëne la itre xaa atr hnene la aqane heetreng? Hapeu, uti ipië pala ha la hune iheetreng matre mama hi la imanong, maine hopatre catre ej matre mama hi la hning? Hapeu la hnaheetreng, hmelele catr la imano matre mama hi la ngönetreing, maine coco pala ha matre kola fedr kowe la ngönetreing? Ka porope kö la hnaheetreng, nge thaa pui ngazo kö ej?’—Rom. 15:2, 3; 1 Tim. 2:9.
6. Tune kaa la aqane troa xatua së hnene la itre xan troa thupëne hnyawa la aqane heetre së me iseji së?
6 Ijije hi tro sa kepe thangane ka loi qa ngöne la itre mekune nyine ixatua hna hamëne koi së hnene la itre Keresiano ka macaj. Loi e tro la itre föe a hnyingëne kowe la itre trahmanyi angatr maine ka loi hi maine ka ngazo la hnaheetre i angatr. Nyipi ewekë mina fe tro la itre keme me thin a xatuane la itre nekö i angatr thöth, ngöne la aqane tro angatr a heetr. Ketre, ijije fe tro la itre trejine föe ka qatre hë hna metrötrën a “inine la ite föe hmae troa mekune amekötin . . . me pë ethan” ngöne la aqane heetr me iseji angatr, “mate tha qaja angazone kö la wesi ula i Akötesie.” (Tito 2:3-5) Kola amamane mina fe hnine la itre itusi së la itre iatr nyine troa xatua së troa qahmihmi, me troa heetre hnyawa.
7. Tune kaa la aqane tro sa hnëkëne la itre hni së thatraqane la ini hne së hna troa kapa?
7 Kola Treqe Së Troa Pui Ne Xen Ngöne La Ua: Hnei Iehosafata joxu hna “hnëkëne la hni [nyidrëti] troa thele Akötesieti.” (2 A. l. ite jo. 19:3) Tune kaa la aqane tro sa hnëkëne la hni së qëmekene la kovasio? Kola amaman hnene la itre hna cinyihan ngöne la pune la itre zonal La Tour de Garde ne 22 Mei me Réveillez-vous ! 8 Juun, la xeni ngöne la götrane la ua hna troa hamën. Tune kaa matre xomi ijine hnei nyipunie göi troa mekune hnyawa la itre hna cinyihane cili, me nyiqaane akökötrene la ajan troa drenge elanyi la xeni ne la ua hna troa hamën hnei Iehova ngöne la ijine kovasio? Ame la troa hnëkëne la itre hni së, tre, ene mina fe la troa sipo Iehova troa xatua së troa trotrohnine la ini hne së hna troa kapa me trongën elany.—Sal. 25:4, 5.
8. Nemene la aja së, nge pine nemen?
8 Easë asë hi a ajan troa atre hnyawa la Wesi Ula i Akötresie, me atrehmekune laka jëne ej, ijije hi tro sa kökötr me hetrenyi la mel. (1 Pet. 2:2) Qa ngöne lai, loi e tro sa sin la Kovasio Ne Distrik së hna hape, “Ce Tro Jë Me Akötresie” me ‘ce atrune la ëje i Iehova.’—Sal. 34:3.
[Hna eköhagen götran 3]
Itre Jëne Troa Atrune La Ëje i Akötresie
◼ Troa Canga Hnëkë
◼ Troa Amamane La Ihnimi Së Kowe La Itre Xan
◼ Troa Hnëkëne La Itre Hni Së