Ketre Huliwa Hna Sajuën Hnei Akötresie
1 Ame thene la itre hlue i Akötresieti enehila, tre ala xalaithe hi la itre ka hetrenyi la atrein, me mo ne fen, maine ka hlemu ngöne la fene celë. Celë hi kepine matre kola thipetrije hnene la itre xaa atr la huliwa ne cainöje së ceitune me ketre ewekë ka pëkö enyipiewekën. (Is. 53:3) Ngo ame la huliwa ne ini qa hnine la Tusi Hmitrötr hne së hna hamën, tre hetre thangane ka loi, ngöne laka, kola iakeukawany me hamë mejiune kowe la itre atr e cailo fen, itre milio la etrun. Tune kaa la aqane traqa kowe lai hnene la itre atr ka pëkö atrein? Hnene hmekuje hi la ixatua i Akötresie hna aijijë angatr. (Mat. 28:19, 20; Ite hu. 1:8) Hna qaja hnei Paulo aposetolo ka hape: “Hnei Akötesie hna iëne la ite ewekë ne la fene hnengödrai ka kucakuca troa ahmahmane la ite ewekë ka egöcat.”—1 Kor. 1:26-29.
2 Ame itre aposetolo memine la itre xaa Keresiano ne la hneijine i Iesu, tre, itre ka “tha ’te tus, me tha hna inin.” (Ite hu. 4:13) Ngo hnei angatre pala hi hna catre kuca la hnëqa i angatr, ene la troa cainöjën la maca ka loi, nge hnei Iehova hna amanathithi angatr. Ngacama hna sewe angatr me icilekeu me angatr, ngo ‘hna cia atraqatr la wesi ula i Iehova, me catr.’ Pëkö ka atreine troa sawa me apaatren la huliwa cili, pine laka, huliwa lai hna sajuën hnei Akötresie. (Ite hu. 5:38, 39; 19:20) Ewekë mina fe lai ka mama ngöne la hneijine së enehila. Ketre thatreine kö la icilekeu ka catrehnine ne la itre ka cilën la itre mus, troa sawa la maca ka loi troa cia me catre kökötr.—Is. 54:17.
3 Atrunyi Akötresieti Jë Hne Së Asë: Hapeue la göhnë së xajawa i Akötresie, easë itre hlue i Nyidrë, tro kö së a pi draië fë la mekun, ene laka easë la itre hna upe hnei Nyidrë? Ohea. Hnei Paulo hna amexeje la huliwa ne cainöj ne la Keresiano, me cinyihane ka hape: “Hetenyi hë huni la tenga mo celë hnine la ite inege dro, mate qa thei Akötesie la etrune la men, ngo tha qa the huni kö.” (2 Kor. 4:7) Hna atrehmekune hnei Paulo laka, angeic a atreine xome la huliwa ne cainöj, qa ngöne hmekuje hi la trenge catr hna hamëne koi angeic hnei Akötresie.—Efe. 6:19, 20; Fil. 4:13.
4 Easë mina fe a atrehmekune laka “ixatua qa thei Akötesie” hmekuje la ka aijijë së troa xome la huliwa ne cainöj. (Ite hu. 26:22) Jëne la maca hna cainöjën e cailo fen, lolo catr la aqane xomi së hnei Iehova matre troa enienijën la itre nöj, celë hi ketre hatrene la ngazo atraqatr ne la iameköti Iehova, laka calemi hë. (Hag. 2:7) Drei la aqane troa atrunyi së qa ngöne laka, easë a troa itre ka “ce huliwa tro me Akötesie” ngöne la ijine menuën la hlapa ngöne la götrane la ua!—1 Kor. 3:6-9.