“Aja Iehova Jë, Nyipunie Ange Ka Hmitöte i Nyidrë Asë”
Kola Troa Amekunëne Hmaca Lo Ijine Meci Iesu e 4 Eiperem
1 Ame ngöne la itre macatre ekö ngöne lo ijine kola musi hnene la itre kominis e Ukeren, hna majemine hnene la itre ka cilën la mus troa alamekën la itre trejine ngöne lo kola easenyi la Pui Ne Xeni Ne La Joxu; angatr a thele la itre hnë troa hnen elanyi la itre icasikeu i angatr. Celë hi pala hi ketre jole lai, pine laka atre hnyawa hi la itre musi la drai ne troa amekunën. Nemene la hna kuca hnene la itre trejin? Hna di la uma ne la ketre trejine föe, ene la hnahag hna xup e kuhu fene lai iuma. Pine laka thaa hna mekune kö hnene la itre musi laka troa icasikeu e cili, haawe, hnene la itre trejin hna ijengekeun la itre sinöe matre troa të hun nge thaa tro kö a hmuhmu. Ngacama jol pine laka angatr a troa lapa cil hune lai ita nge pepetr ke easenyi catre kowe la palafo, ngo ame pe tre pëkö ka troa ajolë angatr, me mekune ka hape ekalesia hi lai a atrune cememin la madrin la Drai Ne Amekunën.
2 Hna amamane hnene la aqane catre drengethenge la itre trejin ne Ukeren kowe lo hna upi së, ene la troa atrune la ijine meci Iesu; laka kola mama hnyawa e cili la elolon la ihnimi angatr koi Akötresie. (Luka 22:19; 1 Ioane 5:3) Ame ngöne la nöjei ijin easë a cile kowe la itre jol ngöne la mele së, epi tro pala hi së a thele ithuecatr ngöne la itre tulu cili, me catre troa hane traqa troa sin la Heji Ne Pui Ne Xeni Ne La Joxu e 4 Eiperem. Qa ngöne lai, tro hë së a amaman laka easë a ce thawa la itre aliene hni ne la atre cinyihan la Salamo ka nyimane ka hape: “Aja Iehova jë, nyipunie ange ka hmitöte i nyidrë asë.”—Sal. 31:23.
3 Xatuane Jë La Itre Xan Troa Akökötren La Ihnimi Angatr Koi Akötresie: Tro mina fe la ihnimi së koi Akötresie a upi së troa könëne la itre xaa atr, troa hane ce atrune me easë la ijine meci Iesu. Hna ithuecatre fe koi së isa ala caas hnene la sinecetrone la Huliwa Ne Baselaia ne Febuare, troa kuca la caa lis ne la itre hne së hna mekune troa hën kowe la Drai Ne Amekunën. Epuni kö a catre thele troa wang asë la nöjei atr hnei epuni hna troa könën? Xomi ijine jë troa qejepengöne la enyipiewekën la ijine cili koi angatr. Nyipi ewekë troa amekunëne hnyawa la drai memine la traem hna sa thatraqane lai Drai Ne Amekunën, nge maine ijij, tre wange ju matre troa hane tro thei angatr, celë hi itre ewekë lai ka troa ithuecatre koi angatr troa hane traqa fe.
4 Loi e tro mina fe së a catre thele troa hane ibozu memine la itre atr hna könën ka traqa koi së, nge loi e tro angatr a madrine la aqane kepe angatr hne së. Tune kaa la aqane tro nyipunie a xatua angatr troa akökötren la ihnimi angatr koi Iehova? Loi e tro fe së a hnëkë hnyawa matre troa sa la itre hnying. Nge troa hnëkë mina fe troa etid memine la itre atr. Loi e troa hë angatr troa hane sin la itre icasikeu ne la ekalesia ngöne la wiik. Troa thele hnyawa fe hnene la itre qatre thup ngöne la ijine cili, troa wange lo itre Keresiano ka nanazij ka traqa troa hane icasikeu. Ijije hi tro angatr a isapui me epuni matre troa wai angatr, me ithuecatre koi angatr troa hane ce cainöj hmaca memine la ekalesia, maine troa ce ithanatane hmaca lo itre mekune hna cile fë ngöne la cainöj ne la Drai Ne Amekunën.—Rom. 5:6-8.
5 Loi e Tro Sa Ajuine La Sipu Ihnimi Së Koi Iehova: Maine tro sa mekune hnyawa la ahnahna, ene la thupene mel, haawe tro ha akökötren e kuhu itre hni së la ihnimi së koi Iehova memine la Hupuna i Nyidrë. (2 Kor. 5:14, 15) Hna qaja hnene la ketre temoë, ka hape: “Eahuni a treqene hnyawa la Drai Ne Amekunën. Ame koi eahui, tre ketre ijine lai ngöne la macatre ka ketrepengöne kö. Eni a mekune hmaca lo itre macatre ka ase hë, 20 lao macatre hë enehila, ngöne lo eni hnine la uma ne fetra, eni a goeëne la ngönetrei i kakaa, nge eni mina fe a olene hnyawa la thupene mele i Iesu. Ketre ini lai laka thaa hna ketre kö la hning lo ijine thaa meci pala kö la kemeng. Atre hi ni la itre xötre ne la Tusi Hmitrötr, memine la aqane troa qejepengöne itre ej! Ngo ame pe la eni a mekune lo pengöne la mec, ene pe eni a madrine atraqatr la ewekë hna troa eatrëne koi së jëne la thupene mele ka sisitria.”—Ioane 5:28, 29.
6 Qa ngöne laka kola troa easenyi trootro la Drai Ne Amekunën, loi e troa hnëkëne hnyawa la itre hni së thatraqane la ijine cili. (2 A. l. ite jo. 19:3) Thele mekune hnyawa ju ngöne la porogaram ne e Tusi Hmitrötr thatraqane la Drai Ne Amekunën, a hna hamën hnine la topik ne la macatre hna hape, Examinons les Écritures chaque jour—2004 me Calendrier 2004. Ame itre xan, tre angatr a madrin troa goeëne hmaca la itus Atr Ka Tru mekene 112-16 ngöne la ijine angatr a etid memine la hnepe lapa i angatr. Ame itre xan tre angatr a thele la itre xaa mekune hna hamën hnene la hlue ka nyipici me ka inamacan, ngöne la itre xaa itus. (Mat. 24:45-47) Ijiji së asë hi troa xome la ahnahna, ene la thupene mel, matre nyine taan ne thithi së. (Sal. 50:14, 23) Ketre, ame ngöne la ijine atrune la Drai Ne Amekunën, epi tro asë hi së a catre troa mekune hnyawa la aqane hnimi së hnei Iehova, me thele la itre aqane troa amamane la ihnimi së koi Nyidrë.—Mar. 12:30; 1 Ioane 4:10.