Xome Jë La Aqane Mekune i Iesu
1. Nemene la aqane mekune ka eje thei Iesu?
1 Ngacama thaa hne së kö hna hane öhne la Hupuna i Akötresie, ngo jëne la itre hna cinyihane ngöne la mele i Iesu ekö memine la huliwa ne cainöje i nyidrë, canga tro hi së a hane hnimi nyidrë. (1 Pet. 1:8) Hnei nyidrëti hna drengethenge la aja ne la Tretretro i nyidrë, matre hnei nyidrë hna pane nue la göhnë i nyidrëti e hnengödrai me uti pi a tro celë fen. Ame hë la nyidrëti a ngönetrei ne atr, thaa hnei nyidrëti kö hna sipu meku nyidrëti kö, ngo hnei nyidrëti hna thele troa xatuane la itre xan, nge thupene lai hnei nyidrëti hna nue la mele i nyidrë thatraqane la itre atr asë. (Mat. 20:28) Kola upi së hnene la Wesi Ula i Akötresie ka hape: “Loi e ej’ e kuhu ite hni nyipunie la mekune celë, lo ka eje thei Keriso Iesu.” Tune kaa la aqane tro sa xome la tulu i Iesu, ene la troa hane hujëne la mele së?—Fil. 2:5-8.
2. Nemene itupath hna cile kow hnene la itre Keresiano ka nyimutre, nge nemene la ka troa xatua angatr troa qëmeke kow?
2 Maine Easë a Kucakuca: Maine nyipici laka atr ka pexeje Iesu, ngo ame pe tre, hetre ijine nyidrëti a pane kucakuca. Ame ngöne la ketre ijin, ngacama “kucakuca” nyidrë, ngo hnei nyidrëti hna cainöj kowe la ketre föe ne Samaria. (Ioane 4:6) Nyimutre la itre Keresiano ne la hneijine së ka cile kowe la itupathi ka tune lai. Thupene la hna pane huliwa ngöne la wiik, maine jë tro sa pane kucakuca matre pëkö trenge catre së troa hane cainöje trootro. Ngo maine tro sa catre cainöje pala hi, eje hi lai laka tro hë së a isa öhne laka, kola akeukawane la itre hni së hnene la huliwa ne cainöj ne la Keresiano.—Ioane 4:32-34.
3. Tune kaa la aqane tro sa xötrethenge la aqane catre thele Iesu troa inine la itre atr?
3 Ame ngöne la ketre ijin, hnei Iesu memine la itretre drei nyidrë hna tro meköti kowe la ketre göhnë ka sihngödr matre troa pane nango mano. Ngo hna öhnyi angatr hnene la itre atr ka ala nyim me canga nyinyap troa itronyi me angatr. Thaa hnei Iesu kö hna wesitr, ngo hnei nyidrëti pe hna “utipi angat” me thele troa “ini angate la nöjei ewekë ka nyimute.” (Mar. 6:30-34) Maine easë a ajan troa nyiqaan me elemekene hnyawa la itre etid, nyipi ewekë tro sa xome lai aqane ujë cili. Nyipi ewekë tro pala hi sa catr me hetrenyi la ihnimi nyipici kowe la itre atr. Maine pëkö etidi epuni enehila, ngo thaa tro pi kö epuni a cile troa catre thele la itre atr ka ajan troa inine la Tusi Hmitrötr.
4. Tune kaa la aqane troa xatua së hnene la huliwa ne pionie ka ixatua, matre troa xötrethenge la aqane mekune i Keriso?
4 Troa Amë Panën La Itre Aja Së Ngöne La Ua: Tro la huliwa ne pionie ka ixatua a xatua së troa catre kuca la itre huliwa ngöne la götrane la ua. Hna cinyihane hnene la ketre trejine nekö jajiny ka hape: “Hnene la thinene la ketre enehmu i eni hna ithuecatre koi eahuni asë troa ce pionie ka ixatua me eahlo göi caa treu. Atraqatr la madrineng troa ce pionie me eahlo. Eni a madrin troa atrepengöne hnyawa la itre trejine trahmanyi me föe, nge kösë ame koi ni tre hnepe lapange fe hë angatr. Atraqatre mina fe la madrineng, qa ngöne laka nyimu ijin ne hane qeje Iehova ni kowe la itre xaa atr, me ini angatr la itre nyipici ne la Baselaia ka nyipi lolo. Itre ewekë asë lai ka aeasenyi ni catr koi Iehova me kowe la organizasio i Nyidrë.”—Sal. 34:8.
5. Pine nemen matre nyipi ewekë tro sa catre xötrethenge pala hi la aqane mekune i Iesu?
5 Easë asë hi a isi memine la itre aja ka ngazo ne la ngönetrei së, me catre thele troa amadrinë Iehova. (Rom. 7:21-23) Nyipi ewekë tro sa catre thipetrij la aqane mekune ne la fen. (Mat. 16:22, 23) Ijije hi tro Iehova a xatua së troa hun, jëne la uati hmitrötre i Nyidrë. (Gal. 5:16, 17) Ame ngöne la easë a treqene tro Iehova a thepe së kowe la fene ka meköti Nyidrë ka hnyipixe, epi tro pala hi së a xome la aqane mekune i Iesu; ene la troa amë panën la itre aja ne la Baselaia memine la itre aja ne la itre xan, nge pine pë hë la itre sipu aja së.—Mat. 6:33; Rom. 15:1-3.