Porogaram Ka Hnyipixe Ne La Asabele Ka Ketre Pengön Ka Caa Drain
Maine tro sa öhne maine dreng la kola hmekë së qa ngöne la ketre ngazo nge thaa trongëne kö së, eje hi lai laka, troa hetre pune ka ngazo koi së. Ka nyipi ewekë catr kö troa nue Iehova troa eatrongë së ngöne la götrane la ua. Kola troa amamane hnyawa lai ngöne la porogaram ne la asabele ka ketre pengön ka caa drain, hna hnëkëne thatraqane la macatre ne huliwa ka troa xulu. Ame la taan, tre hna hape “Wange Hnyawa Kö La Aqane Drenge i Nyipunie.”—Luka 8:18.
Ame ngöne la pane cainöj, tre kola troa amamane hnene la qatre thup ka iwai la aqane eatre koi së enehila la eamo hna hamën ngöne la kola nyiqaane la itre pane mekene la tusi Paulo koi angetre Heberu. Ame ngöne la cainöj ka nyipun hna hape, “Loi e Tro Pala Hi Së a Wangatrun La Ini Qaathei Akötresie,” kola troa xatua së asë troa waipengö së maine easë kö a hane drei Iehova hnyawa, memine la Hupuna i Nyidrë, memine la “hlue ka nyipici me ka inamacan.”—Mat. 24:45.
Nyimutre la itre götrane ne la porogaram hna troa kepe thangane hnyawa hnene la itre hnepe lapa. Ame la ketre, tre hna hape, “Itre Fami Ka Drenge Thenge La Wesi Ula i Akötresie Nge Thaa Hna Thepe Angatre Kö Qa Ngön,” kola troa xatua së troa thupën la itre ewekë ne fen ka troa sewe së troa kökötr ngöne la götrane la ua. Kolo mina fe a troa qaja hnene la itre xaa trejin la itre ewekë hnei angatr hna saze matre troa amë panën la itre ewekë ngöne la götrane la ua. Ame la ketre götrane la cainöj hna hape, “Kola Acatren La Lapaune Ne La Itre Thöth Qa Ngöne La Hnei Angatr Hna Drenge Thenge Hnyawa La Wesi Ula i Akötresie,” kola troa ithanata fe memine la itre thöth ka mele thenge la nyipici ngöne la hna ini, maine ngöne la angatr memine la itre sine ce elo i angatr, maine ngöne la hna cainöje trootro. Ame la ketre cainöj tre hna hape, “Itre Ka Co Ka Drenge Thenge Akötresie Me Hane Kapa La Itre Ini,” kola troa xatua së matre thaa tro kö së a wangacon la hna atreine troa kuca hnene la itre ka co. Kola troa ithanata fe memine la itre nekönatr me itre keme me thine i nyudren, matre troa öhne la eloine la hna inine hnyawa la itre nekönatr la itre jë i Iehova nge ka co petre kö nyudren.
Pine laka Satana a “amenune la fene hnengödrai asëjëihë,” haawe, Iehova a amamane kowe la itre hlue i Nyidrë la gojenyi nyine tro angatr a trongën. (Hna ama. 12:9; Is. 30:21) Maine tro sa drenge hnyawa la itre eamo me trongëne itre eje ngöne la mele së, eje hi lai laka, tro hë së a inamacan, tro mina fe së a madrin atraqatr, nge tro itre eje a eatrongë së kowe la mele ka thaa ase palua kö.—Ite edomë 8:32-35.