Loi e Tro Sa Catre Huliwa i Akötresie Ngöne La Itre Drai Hedredrei
1 Ame la itre drai hedredrei, tre celë hi itre ijine troa xome la itre huliwa ka isapengön. Pine laka loi la drai, haawe, alanyimu the së la itre ka ajan troa saze la itre hne së hna majemine kuca, me troa hane kuca la itre nyine madrin. Ngo thaa tro pi kö sa nue la itre huliwa së qaathei Akötresie.—Fil. 3:16.
2 Hane kö së nyiqaane hnëkë matre troa sine la asabele ka ketrepengön ka caa drain ngöne la itre ijine hedredrei celë? Hane kö së mekune la ketre atrene la ekalesia ka aja ixatua? Celë hi ketre aqane ihnimi lai ka troa hamë manathith koi së me angeice fe.
3 Maine hetre traeme së ngöne la itre ijine mano ka tru i ange ka ini, haawe, hnauëne laka thaa hane wange kö së matre troa akökötren la huliwa ne cainöje së? Nyimutre la itre ka atrehmekune laka ketre ijine ka ijije lai, troa hane xome la huliwa ne pionie ka ixatua. Ketre huliwa lai ka fe gojenyi së kowe la itre xaa hnëqa ka lolo nge ka tru. Ijije fe troa kapa hnene la itre hnepe lapa la nyipi madrin qa ngöne la hnei angatr hne ce cainöj ngöne la itre drai ka pexej. Tune ka së, ijije kö tro sa hane akökötrene la traeme ne tro sa hane cainöje trootro? Pine laka lolo nge qea la itre drai, haawe, loi e alanyimu the së la itre ka thele troa cainöj e heji lapa.
4 Hapeu, easë kö a mekune troa hane mano ngöne la ketre götran? Maine eje hi, tre wange ju matre thaa tro kö a trian la itre icasikeu? Tune kaa matre tro fe së a hane ce cainöj memine la itre trejin e cili götran hne së hna ngenu ngön? Hane ju fe amë lai itre ewekë ka sisitria cili ngöne la itre ijine mano së, matre troa hetre thangane ka loi koi së me kowe la itre xan (Rom. 1:11, 12). Ijije kö tro sa cainöj ngöne la nöjei ijin, ngöne la gojenyi ne easë a tro kowe lai götrane cili? Loi e tro sa xometrongën la Tusi Hmitrötre së memine la itre xaa itusi së. Loi e tro fe sa xome la itre ijine cili matre troa hane wange lo porogarame ne e Tusi Hmitrötre së, me troa inine ej. Mekune hnyawa kö së ka hape, maine nyipi ewekë e itre xaa ijin tro sa mano qa hna huliwa i maseta, ngo thaa tro pi kö sa nue la huliwa nyine tro sa kuca koi Iehova.
5 Nyipici, atraqatr la huliwa hna troa kuca ngöne la hneijine kola hedredrei. Ngo canga tro hi a sawa hnene la itre nyine madrin, la huliwa hne së hna xome lapaan thatraqane la Baselaia. Catre pi së troa kuca matre troa hetre thangane ka loi la itre huliwa hne së hna troa xom ngöne la itre ijine hedredrei. Goeëne hnyawa kö së lo itre nyine troa kuca panën, ene lo itre ewekë ngöne la götrane la ua ka troa hamë mel koi së, nge the nuetrije kö itre ej.—Fil. 1:10.