Hneijine Ne Drai Ne Amekunën—Ketre Ijin Ne Troa Akökötren La Huliwa Ne Cainöj
1. Nemene la thangane la “itre ijine hna sa puin” thei angetre Isaraela?
1 Ame ngöne la macatre, hetre ijine hna sa koi angetre Isaraela matre troa atrun la “ite ijine hna sa puine hnei Iehova.” (Lev. 23:2) Ame ngöne la angatr a xomi ijine troa lapa mekun la ihnimi ne la Akötresi angatr, ene pe hetrenyi la ketre madrine ka tru, nge kola upi angatr troa catre huliwa thatraqane la hmi ka wië.—2 A. l. ite jo. 30:21–31:2.
2, 3. Pine nemen matre ka loi e tro sa akökötren la huliwa së koi Akötresie ngöne la hneijine ne Drai Ne Amekunën, nge eu la tro sa atrun la Drai Ne Amekunën?
2 Ame enehila, kola kökötr ngöne la nöjei macatre la madrine së troa kuca la huliwa i Akötresie ngöne la hneijin ne Drai Ne Amekunën. Ketre ijine lai, easë a mekune hnyawa la etrun la ahnahna hnei Iehova hna hamëne koi së, ene la Nekö i Nyidrëti ka caas. (Ioane 3:16; 1 Pet. 1:18, 19) Ame ngöne la easa thele mekune ngöne la aqane hnimi së hnei Akötresie memine la Hupuna i Nyidrë, ene pe kola upi së troa atrunyi Iehova me isa thele hne së la aqane troa kuca la aja i Nyidrë.—2 Kor. 5:14, 15.
3 Ame ngöne la macatre celë, kola troa atrun la Jidri Ne Pui Ne Xeni Ne La Joxu e drai ka co 24 Maac, thupene la hna lö la jö. Tune kaa la aqane tro sa akökötren la huliwa ne cainöje së ngöne la itre treu Maac, Eiperem, me Mei?
4, 5. (a) Nemene la ka xatuan la itre xaa trejine troa ketr la itre atr ka ala nyim hnene la maca ka loi? (b) Nemene la ewekë ka hetre thangane ka loi hne së hna öhn ngöne la nöje së?
4 Loi e Troa Ketr La Itre Atr Ka Ala Nyimu Catr: Thele jë la itre aqane troa ketr la itre atr ka ala nyimu ngöne la epuni a cainöje trootro. Ijije kö tro epuni a cainöje ngöne la itre hnalapa trootro ngöne lo ijine troa öhne la itre atr ka ala nyimu ngöne la itre hnalapa i angatr, maine e hnyipi heji maine e heji lapa pena? Maine kola ajan hnene la itre atrene la gurup ne Ini Tusi epun troa cainöj qëmekene la troa icasikeu, maine jë tro la atre thupën la ini tusi a thele troa kuca la ketre hnepe icasikeu göi cainöj matre troa huliwa easenyine la hna Ini Tus.
5 Ame la ketre jëne troa ketr la itre atr ka ala nyim, tre ene la troa cainöj ngöne itre götrane gaa tru atr. Ngacama kola huliwa ngöne la drai ka pexej hnene la ketre trejine föe ne Zapo, ngo hnei eahlo hna ajane troa pane xome la huliwa ne pionie ka ixatua. Hnene la ketre qatre thup hna ithuecatr koi eahlo troa cainöj ngöne la itre gojeny ezine la hnë troa xome la tërë, e nöjei drai qëmekene tro eahlo a tro troa huliwa i maseta. Ka lapa thaup eahlo ngo hnei eahlo hna pane elë hune la jole cili, hnei eahlo fe hna catr ngacama kola hnyimasai eahlo hnene la itre atr ka ce xomi tërë me eahlo; matre ame hë thupen, hnei eahlo hna tro fë lapaan la itre zonal kowe la itre atr ka ala 40, itre ka ce xomi tërë me eahlo me itre ka huliwa ngön, me itre ka cilë magazë e cili. Hnei eahlo hna hamën la 235 lao zonal ngöne la treu. Qa ngöne la hnei eahlo hna ce thawa la itre mekun qa hnine la Tusi Hmitrötr memine la itre atr ngöne hi la itre xaa hnepe hawa ngöne la nöjei drai, ene pe hnei eahlo hna nyiqaane kuca la sikisi lao etid.
6. Tune kaa la aqane tro la itre thöth a akökötren la huliwa i angatr ngöne la götrane la ua?
6 Itre Ijine Troa Cainöj: Nyimutre la itre ka cainöj ka ini, hetrenyi la itre ijine mano i angatr ngöne la macatre. Maine jë celë hi itre ijine tro angatre lai a hane xome la huliwa ne pionie ka ixatua. Ketre, ijije hi tro la itre thöth Keresiano a hane akökötren la aqane tro angatr a cainöj ngöne la hna ini. Maine jë tro epuni a sesëkötr la aqane troa pi drei epun hnene la itre sine ce ini me epun, ngöne la kola hamën koi angatr la itre ini hnei epuni hna lapaune kow. Tune kaa matre pane hane thele fe hnei epuni ngöne la itre ijine epuni a ce ithanatan la ketre mekun memine la itre sine ce ini epun me ka hamë ini, matre troa hane cainöje koi angatr? Ame itre xan, hnei angatr hna amamane lo itre kaset video ne la Itretre Anyipici Iehova. Ame itre xan, hnei angatr hna nyiqaane inine la Tusi Hmitrötr memine la itre sine ce ini angatr, me xatua angatr troa kökötre me sa xepu me xome la bapataiso. Celë hi itre aqane tro lai a “atrune la atesiwa i Iehova.”—Sal. 148:12, 13.
7. (a) Tune kaa la aqane thele ijine hnene la ketre trejin trahmanyi troa cainöje kowe la itre xaa atr? (b) Hane kö epuni melëne lai ngöne la epuni a cainöj?
7 Ame ngöne la itre hnei epuni hna kuca ngöne la drai, thele jë la itre jëne troa ithanata memine la itre atr la pengöne la Akötresi së ka shewengönie me itre hna thingehnaean ka lolo. Maine ijij, tre, kola cainöje hnene la ketre trejin o drai kowe la itre atr ka ce ti tërë me nyidrë. Drei la ketre ceitun, ame ngöne la angeic a itreqe ngöne la hna treqe tërë, hnei angeic hna cainöj kowe la ketre nekö trahmany ngöne la nöjei drai, isa faifi menetre pala hi. Ame la thangane lai, hna kapa hnene lai nekö trahmany memine la sine ce tro i angeic troa etid. Hna etidi ngöne la ijine angatr a ti tërë. Ame hë thupen, hna dreng hnene la ketre qatre föe la angatr lapaa porotrik, ene pe eahlo a sipone ju lai trejine trahmany troa hane etidi fe. Eahlo mina fe a hane madrin la etidi eahlo ngöne la itre ijine kola xomi tërë. Qa ngöne lai, hna isa kuca hnene lai trejine trahmanyi la treen lao etid hnine la tërë.
8. Nemene la ketre jëne cainöj ka ijije troa xome hnene la itre trejin ka qatre hë maine sine wezipo pena, matre troa akökötren la aqane tro angatr a hane cainöj?
8 Nge tune kaa kö e hna nyi ifegone ju la hnei epuni hna atreine troa kuca, hnene laka, qatre hë epun maine hna tithi epuni pena hnene la ketre mec? Maine jë hetrenyi pala kö la itre jëne troa akökötren la aqane tro epuni a atrunyi Iehova. Hane kö epuni thele troa cainöj jëne telefon? Maine epuni a luelue ngöne la aqane troa cainöj jëne telefon, qaja jë kowe la atre thupën la ini tus. Maine jë tro nyidrë a wange la itre trejin ka kuca ha lai matre troa xatua epuni troa hane xome la aqane cainöje cili. Maine tro epuni a ce huliwa, ijije hi tro epuni a ihamënekeun la itre ini me ixatuanekeun la itre ewekë matre troa hetre thangane ka loi la hna cainöj. Hetrenyi la itre mekune nyine ixatua göi troa cainöj jëne telefon, itre ej e hnine la Huliwa Ne Baselaia ne Febuare 2001 götrane 5-6.
9. Tune kaa la aqane tro sa xatuan la itre hnainin troa hane nyiqaane ce cainöj memine la ekalesia kowe la itre atr ka ala nyim?
9 Tro la itre atr ka xötrei atre la nyipici a hane akökötren la aqane tro angatr a atrunyi Iehova, e hnei angatr hna hane sin la Drai Ne Amekunën. Ijije hi tro sa xatua angatr matre thaa tro kö angatr a xou troa hane cainöj ngöne la nöjei ijin; maine jë tro sa hane qaja koi angatr la itre ewekë hna melën hnene la itre xan ngöne la hna cainöje trootro, me troa ini angatre trootro troa qejepengön la Tusi Hmitrötr me cilëgölin la lapaune i angatr. (1 Pet. 3:15) Maine kola qaja hnene la ketre hnainin la aja i angeice troa nyiqaane hane tro fë la maca ka loi, ce ithanatane jë memine la atre thup perezida. Tro pë hë nyidrë a icasikeu memine lai hnainin matre troa atrehmekun maine ijiji angeice fe hë troa hane ce cainöj memine la ekalesia kowe la itre atr ka ala nyim. Drei kö la madrine e kuhu hni Iehova troa goeën la itre ka xötrei atre la nyipici, a hane cilëgölin la Musi cile i Nyidrë ka eje e koho hnengödrai me e celë fen!—Ite edomë 27:11.
10. (a) Tune kaa la aqane troa xatua së hnene la ketre tulu ne cainöj troa hane pionie ka ixatua? (b) Hnei epuni kö hna hane hnëkë troa hane pionie ka ixatua ngöne macatre hnapan, hmekune lo hneijin ne Drai Ne Amekunën? Hna tune kaa?
10 Ijije Tro Epuni a Hane Pionie Ka Ixatua? Loi e troa wangatrune hnyawa la itre hawa ka 50 hna amekötine kowe la trejine ka pionie ka ixatua. (Mat. 5:37) Kolo lai a hape, nyipi ewekë troa kuca la 12 lao hawa ne cainöj ngöne la nöjei wiik. Hapeue la tulu ne huliwa ne pionie ka ixatua hna hamën ngöne la götrane 5, hetrenyi jë fe kö la ka ihmeku memine la aqane mele i nyipunie? Maine pëkö, tre, ijije kö troa hnëkëne la ketre porogaram ka aijijë epuni troa hane pionie ka ixatua ngöne la treu Maac, Eiperem, maine Mei? Sipo Iehova jë troa xatuan la aja i epun troa akökötren la huliwa ne cainöje i epun.—Ite edomë 16:3.
11. Tune kaa la aqane tro la itre qatre thup memine la itre drikona a hane xatuan la itre ka pionie ka ixatua?
11 Tro la itre qatre thup memine la itre drikona a hane xatuan la aja ka eje thei epun troa atrunyi Iehova ngöne hneijin ne Drai Ne Amekunën. Nyimutre jë thei angatr la itre ka troa xome la huliwa ne pionie ka ixatua. Tro la itre qatre thup a hnëkë matre troa kuca la itre xaa icasikeu göi cainöje trootro, maine e hnaipajö hej, maine e nöjei heji lapa ngöne la wiik, me ngöne la itre mecixeni me sabath, e ijij. Ame göi hnen me ijine troa kuca la itre icasikeu cili, tro la itre qatre thup a ce ithanatan memine la itre trejin ka hnëkë troa pionie maine itre ka wangatrun pena la huliwa cili, matre troa iën la itre ka troa elemeken la itre icasikeu cili. Tro la itre qatre thup a hnëkë matre troa hetre ka cainöje pala hi ngöne la itre drai me traeme hnei epuni hna amë thatraqane la huliwa. Qa ngöne lai, atreine hi troa acatrene hnyawa la itre tulu ne huliwa, nge troa atraqatre la itre ewekë ka loi hna troa kuca.—Ite edomë 20:18.
12. Nemene la ka upi së troa atrunyi Iehova ngöne la nöjei ijine asë?
12 Loi e Atraqatre Le Hne Së Hna Kuca: Maine thaa ijije kö tro epuni a hane pionie ka ixatua, thaa tro kö a thëthëhmine ka hape, Iehova a kapa la trenge catr me aqane nue së la mele së ‘thenge la hna heteny, ngo tha thenge kö la ka tha hetenyi kö.’ (2 Kor. 8:12) Nyimutre la ewekë ka upi së troa amamane la hni ne ole së koi Iehova. Celë hi matre hna cinyihan hnei Davita ka hape: “Tro pala kö ni a ole koi Iehova o ijin ; tro pala kö la qeng’ a atrunyi nyidë.” (Sal. 34:1) Epi troa eje mina fe la aja ka catre cili the së ngöne la hneijine la Drai Ne Amekunëne celë.
[Hna eköhagen götran 3]
Nemene La Aqane Tro Epuni a Akökötren La Huliwa i Epun?
◼ Cainöje jë ngöne la ijine kola öhne la itre atr ngöne la itre hnalapa i angatr
◼ Cainöje jë ngöne la itre götrane gaa tru atr
◼ Cainöje jë ngöne la hna huliwa maine ngöne hna ini
◼ Cainöje jë jëne telefon
◼ Xome jë la huliwa ne pionie ka ixatua
[Hna eköhagen götran 5]
Porogarame Ne Pionie Ka Ixatua—Itre Aqane Troa Kuca La 12 Lao Hawa Ne Cainöje Trootro Ngöne La Nöjei Wiik
Itre Hmakany—Thupene Hmi Koi Mecixen
Maine jë troa nyihnan la ketre drai hnene la drai sabath.
Drai Ijin Hawa
Thupene Hmi Hmakany 2
Drai Menu Hmakany 2
Drai Hnacian Hmakany 2
Drai Ka Co Hmakany 2
Drai Ka Tru Hmakany 2
Mecixen Hmakany 2
Etrun Hawa: 12
Lue Drai Ka Pexej
Maine jë troa iën la lue drai ne la wiik. (Thenge la itre drai hna troa iën, maine jë troa kuca hmekuje hi la 48 lao hawa ngöne la treu.)
Drai Ijin Hawa
Drai Hnacian Drai Ka Pexej 6
Mecixen Drai Ka Pexej 6
Etrun Hawa: 12
Lue Hej Nge Mecixen Me Sabath
Troa iën la lue heji ngöne la wiik.
Drai Ijin Hawa
Thupene Hmi Hej 1 1⁄2
Drai Hnacian Hej 1 1⁄2
Mecixen Drai Ka Pexej 6
Sabath Sine La Drai 3
Etrun Hawa: 12
Köni Hnaipajö Me Mecixen
Maine jë troa nyihnan la ketre drai hnene la drai sabath.
Drai Ijin Hawa
Thupene Hmi Hnaipajö 2
Drai Hnacian Hnaipajö 2
Drai Ka Tru Hnaipajö 2
Mecixen Drai Ka Pexej 6
Etrun Hawa: 12
Sipu Porogarameng
Etrun la hawa ngöne la nöjei ijin.
Drai Ijin Hawa
Thupene Hmi
Drai Menu
Drai Hnacian
Drai Ka Co
Drai Ka Tru
Mecixen
Sabath
Etrun Hawa: 12