Paatr 11: Aqane Troa Eatrongëne La Itre Etid Ka Kökötr
Xatuane Jë La Itre Hnainin Troa Iwai Hmaca
1 Ngöne la kola nyiqaane cainöj hnene la hnainin, tro hë angeic a öhne la itre atr ka hetre hni ne ajan kowe la maca ka loi. Tro sa xatua angeice tune kaa troa iwai hmaca me eköth lo aja ne lo itre ka drei angeic?
2 Troa hnëkë troa iwai hmaca ngöne la kola xötrei iöhny. Xatuane jë la hnainin troa wanga atrune lo itre atr hnei angeic hna ithanata memin. (Fil. 2:4) Ini angeice jë troa hane nue angatr troa qeje mekun, me drenge me xome la itre ewekë hna hnehengazon hnei angatr. Nge e hetre hni ne ajane lai atr, nue pi kowe la ka xötrei cainöj troa cinyihane lai itre pane ithuemacany matre troa xatua angeic troa eköth la iwai ka troa xulu.
3 Troa Hnëkë Troa Iwai Hmaca: Wange hmaca ju lo itre hna ithanatan, me amaman kowe la hnainin la aqane troa iën la ketre götran ne la maca ne Baselaia ka troa ketr lai atr. (1 Kor. 9:19-23) Ce hnëkëne jë la ketre hnepe aqane nyiqaane ithanata, laka caa xötr ne la Tusi Hmitrötr hna hamën memine la caa paragaraf e hnine la itus hna troa inin. Ketre, hnëkëne jë la ketre hnying ka troa nyipun la porotrik, me nyi trepene la iwai hmaca hnapin. Amamane jë kowe la ka xötrei cainöj, troa xatuane lai atr troa trotrohnine trootro la Wesi ula i Akötresie jëne la itre iwai hmaca.
4 Ka loi fe troa inin la hnainin troa hmaloi la aqane nyiqaane ithanata. Thupene la hna ibozu, angeic a qaja jë ka hape: “Madrine ni lo iöhnyi nyiso hnapan, nge eni a bëek troa hamën la ithuemacanyi ne la Tusi Hmitrötr göne la [qaja ju la topik].” Amamane ju fe koi angeic la aqane troa ithanata ngacama ketre atre kö la ka fe la qëhnelö.
5 Catre Pi Ixatua: Xatuane jë la hnainin troa amamai tulu ka loi, ene la troa canga bëek troa wang asë lo itre ka drei angeic. Tro sa öhne hmaca la itre atr, e hne së hna tro lapaa troa iwai. Inine jë la hnainin la aqane troa isa pui, memine la enyipiewekën troa aejëne ej. (Mat. 5:37) Inine jë la ka xötrei cainöj troa thiina ka menyik, me iwangatruny, me metrötr ngöne la kola thel la itre atr hna aceitunën me mamoe me akökötren la aja thei angatr.—Tito 3:2.