Loi e Troa Qaja Kowe La Itre Atr “La Lai Ne La Fen”
1. Nemene la lai atraqatr hna ahnithe hë e hnine la Wesi Ula i Akötresie, nge nemene la hna hnëkën matre troa amamane hnyawa la lai cili?
1 Hnei Iehova hna perofetane jëne Isaia perofeta, ka hape: “Ame la nöjei hna trongëne la melöhlem, tre, kola wange la lai atraqatr, nge angat’ itete lapane la hlapa ahnune la meci, tre, hudrumë hë hui angatr la lai.” (Is. 9:2) Kola mama la “lai atraqatr” celë, ngöne la aqane ujë ne la sipu Hupuna i Akötresie, ene Iesu Keriso. Hnene la huliwa ne cainöje i nyidrë memine la itre eloine hna kapa qa ngöne la mel hnei nyidrëti hna huujën, ene pe kola ithuecatr kowe la itre atr ka etheng ngöne la götrane la ua. Celë hi lai ka nyipi ewekë kowe la itre atr enehila ngöne la hneijine ka jidri celë. Ame la Jidri Ne Pui Ne Xeni Ne La Joxu, tre celë hi ketre ijine ka ketrepengöne kö koi së, ka troa amamane hnyawa la “lai ne la fene hnengödrai.” (Ioane 8:12) Ame ngöne lo macatre hnapan, itre milio la etrune la itre atr ka amamane la lapaune i angatr, hnene la hna ce me easë me drengethenge la hna amekötine hnei Iesu, hna hape: “Kucajë la nyine mekune koi ni.” (Luka 22:19) Ame ngöne la kola easenyi trootro la Drai Ne Amekunën, tune kaa la aqane tro sa wanga atrune hnyawa la lai atraqatr hnei Iehova hna ahudrumen enehila?—Fil. 2:15.
2. Nemene la aqane tro sa akökötrene la hni ne ole së kowe la thupene mele, ene la mel hna huujën hnei Iesu, nge nemene la thangan ej elany?
2 Loi e Troa Kökötr La Hni Ne Ole Ngöne La Itre Hni Së: Ame la hneijin ne la Drai Ne Amekunën, tre, celë hi ketre ijine tro sa sine thel me mekune hnyawa lo etrune la ihnimi Iehova me Iesu, ngöne laka, hna hamëne la thupene mel thatraqane la nöjei atr asë. (Ioane 3:16; 2 Kor. 5:14, 15) Maine tro sa sine thel tune lai, tro ha kökötre catr la hni ne ole së kowe la ijine ka sisitria nge ka hmitrötre cili. Loi e tro asë hi la nöje i Akötresie a thele ijine troa e me sine thel la itre xötr hna hnëkëne kowe la Drai Ne Amekunën, ka eje e hnine la topik ne la drai hna hape Scrutons les Écritures chaque jour. Maine tro sa mekune hnyawa la itre thiina i Iehova ka lolo ka draië catr, nge ka mama jëne lai thupene mel, haawe, tro ha atraqatre la madrine së troa nyihlue i Nyidrë Akötresi së. Maine tro sa mekune hnyawa la aliene la thupene mele koi së isa ala caas, eje hi lai laka, tro ha akökötrene la ihnimi së koi Akötresie me kowe la Hupuna i Nyidrë. Ketre, tro ha upi së troa catre thele troa kuca la aja i Nyidrë.—Gal. 2:20.
3. Tro sa amamane tune kaa la hni ne ole së kowe la Drai Ne Amekunën?
3 Maine tro sa akökötren la hni ne ole së kowe la hnei Iehova hna hnëkën nyine iamele, tro hë la madrine së a hane hetre thangane kowe la itre hnainin, me itre atr hne së hna wange hmaca, me itre sinee së, me itre ka lapa easenyi së, me itre sine ini së, me itre sine huliwa së, me itre xane ju kö hne së hna könën kowe lai ijine ka ketrepengöne cili. (Luka 6:45) Qa ngöne lai, loi e tro sa pane catre troa hane hë angatre asë, me hamëne koi angatr la pepa ne ihë koi Drai Ne Amekunën matre thaa tro kö angatr a thëthëhmine lai. Loi e troa cinyihane wengën ngöne la ketre pepa la itre atr hne së hna könëne pala hi, matre thaa tro kö sa thëthëhmi angatr; troa nyixane lai ngöne la nöjei macatre. Maine tro sa huliwa tune lai, me kuca asë la hne së hna atrein troa könëne la nöjei atr ka hni ka ajan, haawe, easë hi lai a amamane hnyawa la etrune la ole së koi Iehova Akötresie “la ahnahna i anganyidë hna tha’ teine qaja asë.”—2 Kor. 9:15.
4. Nemene la ka xatua së troa akökötren la aqane tro sa cainöj e treu Maac me Eiperem?
4 Loi e Tro Sa Akökötrene La Aqane Tro Sa Catre Cainöj: Ijije kö tro nyipunieti a akökötrene la aqane tro nyipunieti a cainöj e treu Maac me Eiperem? Maine tro sa catre ce thawa memine la itre xan la “maca ka loi ka lolo i Keriso,” tre, tro ha amanathithi së hnei Akötresie. Iehova la Qaan la nöjei ewekë asë ka alaine la mele së ngöne la götrane la ua, öni Nyidrëti ka hape: Loi e troa “hudume la lai qa hnine la jid.” (2 Kor. 4:4-6) Maine jë ka loi e tro la itre qatre thup a thele troa eköth la itre xaa icasikeu göi cainöj ngöne itre hnalapa trootro, ngöne itre xaa ijin me itre xaa götran, matre troa xatuane la itre trejine ka ajan troa cainöje aqeany. Kolo lai a qaja la troa cainöj ngöne la itre gojenyi e hmakanyi sine jidr, maine troa cainöje pena ngöne la itre hnë salem, maine jëne telefone pena e hnaipajö maine e heji lapa. Maine easë a ajan troa kökötre la aqane cainöje së, loi e tro sa atreine tulu ewekë ngöne la itre hawa hne së hna mekune troa kuca, nge loi e tro sa catre huliwa troa eatrëne itre ej. Ame kowe la ka ala nyim, angatr a hamën la ewekë ka sisitria koi Iehova, ene la hna hane xome la huliwa ne pionie ka ixatua.—Kol. 3:23, 24.
5. Tune kaa la aqane kepe thangane ka loi hnene la itre trejine qa ngöne lo kola pane acon la itre hawa nyine troa kuca hnene la itre pionie ka ixatua?
5 Ijiji Nyipunieti Kö Troa Hane Pionie Ka Ixatua? Sevene hë lao macatre enehila, qaane lo kola pane nango acone la hawa nyine troa eatrën hnene la itre ka pionie ka ixatua. Hna aijijën la itre trejine ka ala nyimu catr, troa madrine me kapa la itre manathithi qa ngöne la hna pionie ka ixatua. Hane kö epuni tupath troa pionie ka ixatua? Ame itre xan, hnei angatr hna majemine xom la huliwa cili ngöne la nöjei macatre. Nyimutre la itre trejine ka ce xome ngöne la itre ekalesia la huliwa ne pionie ka ixatua, nge celë hi ketre huliwa lai ka hamë manathithi kowe la ekalesia ngöne la macatre. Ijije kö tro epuni a hane hnëkë kowe la ketre treu, matre troa hane pionie ka ixatua ngöne lo hneijinene la Drai Ne Amekunën? Ame la ketre treu ka lolo koi itre xan, tre, Eiperem, pine laka, faifi lao mecixeni me sabath.
6. Nemene la itre hna hnëkëne thatraqa së ka lolo catr?
6 Hapeue la ekalesia i epun, kolo kö a troa wange ej hnene la atre thupën la sirkoskripsio ngöne la treu Maac maine Eiperem? Celë hi ketre ijine lai ka lolo koi epun. Tune lo hna ahnithe hë, ame ngöne lo macatre ne huliwa 2006, ame asë hi la itre trejine ka pionie ka ixatua hmekune lo kola iwai hnene la atre thupëne la sirkoskripsio tre, tro fe angatr a hane sin la icasikeu thatraqane la itre pionie; hna nue koi angatr lo itre pane menetre, 30 la etrun. Eje hi lai laka, tro la ithuemacanyi ngöne la ua, me ka ixatua hna hamën ngöne la ijine icasikeu cili, a xatuan la itre pionie ka nyimutre troa akökötrene la huliwa i angatr matre troa hane pionie lapaa. Ketre, ame ngöne la treu Maac, troa eje the së la madrine troa xatuane la itre atr troa hane öhne la lai ngöne la ua, jëne la hna ini ngöne la itusi ka hnyipixe, Nemene La Nyipi Ini Hna Hamën Hnei Tusi Hmitrötr? Hapeu matre troa nyiqaane inine la Tusi Hmitrötr memine la itre atr ngöne la itusi ka hnyipixe?
7, 8. (a) Nemene la ka troa xatua së troa kuca la ketre porogaram göi troa pionie ka ixatua? (b) Nemene la aqane troa ixatua hnene la itre atrene la fami ka ce huliwa, nge nemene la manathithi hna kapa hnene la itre fami asë?
7 Ame ngöne la easa goeën la 50 lao hawa nyine troa kuca hnene la itre pionie ka ixatua, loi e tro sa catre eköthe la ketre porogaram ka troa aijijë së troa ahudrumene la lai ne la nyipici; maine troa 12 lao hawa ne cainöj ngöne la wiik. Ithanatane jë la porogarame cili memine la itre ka hane hë xome ekö la pionie, me kowe fe la itre xaa trejin. Maine jë tro ha hane xatua angatre fe troa hane pionie. Maine troa eköthe hnyawa hnene la itre trejine thöth memine la itre qatr la porogarame i angatr, haawe, tro ha mama hnyawa laka thaa ka jole menu kö e troa eatrëne la hna ajane ka lolo cili. Thithi fë jë la ewekë cili. Thupene lai, maine ijij tre, eköthe jë la porogarame i epun, nge xome jë la huliwa ne pionie ka ixatua!—Mal. 3:10.
8 Nyimutre la itre fami ka öhne laka, maine hna ce thë hnyawa hnene la itre atren la fami troa pionie la ketre, haawe, atreine hi troa eatrëne lai mekun. Hnene la ketre fami hna ce axeciën tro asë hi la faifi lao atren ka xome hë la bapataiso a pionie ka ixatua. Ame la lue xaa nekön ka thaa bapataiso petre kö, tre, hnei nyidroti hna catre thele troa akökötrene la huliwa ne cainöje i nyidro. Tune kaa la aqane kepe thangane la fami la trenge catre hnei angatre hna kuca? Hnei angatre hna cinyihane ka hape: “Drei la ketre treu ka lolo catr, nge drenge hi huni laka, hna acatrene hnyawa la aqane imelekeu huni itre atrene la fami. Eahuni a olene koi Iehova la elolone la manathithi hne huni hna kapa!”
9. Tro sa ahudrumene tune kaa la lai së ngöne la hneijin ne la Drai Ne Amekunën?
9 Hapeu, tro kö a ithuecatr elanyi la huliwa ka ketrepengön hne së hna troa kuca e treu Maac me Eiperem, nge tro kö ej a aeasenyi së catr kowe la Tretretro së e koho hnengödrai? Troa traqa kow, e hne së hna isa catre troa akökötrene la ihnimi së koi Akötresie memine la Hupuna i Nyidrë, me akökötrene la aqane tro sa xome la huliwa ne cainöj. Epi tro la aja së a tune la aja ne la atre cinyihane la Salamo, kola nyimane ka hape: “Ke tro nyidëti a cile ngöne la ime maca ne la ate pë ewekë, mate troa amele angeice qa thene la itete hnyingëne la u i angeic.” (Sal. 109:30) Tro Iehova a amanathithine la aqane catre cainöje së ngöne la hneijin ne la Drai Ne Amekunën. Haawe, catre pi së troa ahudrumene la lai atraqatr, matre troa tru catre pala hi la itre atr ka lö pi qa ngöne la jidr me “hetenyi la lai ne la mel.”—Ioane 8:12.