Porogaram Ne Asabele Ne Sirkoskripsio Ka Hnyipixe

Iehova hmekuje hi la nyine troa atrun. Nemene la aqane tro sa atrunyi Iehova? Nemene la itre ewekë ka ajolë itre xan ngöne la götrane cili? Nemene la itre manathithi hna kapa hnene la itre ka atrunyi Akötresie enehila? Tro la porogaram ne asabele ne sirkoskripsio ne la macatre ne huliwa 2008 a hamëne la itre mekune ka ijije troa sa la itre hnyinge celë. Ame la taane la porogarame ne asabele, tre, “Kuca Asë Jë Nyine Atrunyi Akötresie.” (1 Kor. 10:31) Pane mekune jë së la itre hna hnëkëne amë hë koi së ngöne la lue drai ne ini ka troa xulu, nge ka sisitria catr ngöne la ua.

Tro la atre thupëne la distrik a cile fë la lue taane cainöje hna hape, “Pine Nemene Matre Troa Atrunyi Akötresie?” me “Loi e Troa Itre Tulu Ngöne La Aqane Tro Sa Trongëne La Itre Hna Amekötine Hnei Akötresie.” Tro fe angeice a tro fë la cainöje kowe la ka ala nyim, hna hape, “Drei La Itre Atr ka Atrunyi Akötresie?,” memine la cainöje tixenuë, “Caasi Hi La Aqane Atrunyi Akötresie e Cailo Fen.” Tro fe angeice a xomiujine la Ini Ne Cainöj Qaathei Akötresie. Tro la atre thupëne la sirkoskripsio a cile fë la itre taane cainöje hna hape, “Ajane Jë Troa Atrunyi Akötresie,” “Wangatrune Ju La Itre Aja Ne La Sirkoskripsio,” me “Catre ‘Cile Huti Kö Ngöne La Nyipici,’ ” lo hna eköthe hune la 2 Peteru 1:12. Ketre, tro fe sa atre la aqane tro la “Huliwa Ne Pionie a Atrunyi Akötresie.” Troa kuca la lue cainöje hna thawa nyimutren, lue nyine thele mekun, ame la hnapan, tre, “Atrunyi Akötresieti Jë Ngöne La Nöjei Götrane La Mele i Epun,” kola troa wange hnyawa la ejuine la aliene la trenge ewekë ngöne la 1 Korinito 10:31. Nge ame la hnaaluen, “Nyihluei Iehova Jë Matre Troa Atrunyi Nyidrë,” kola troa qaja la itre götrane ka nyimutre ne la hmi së. Tro fe sa kapa la itre mekune ka tru ne La Tour de Garde, memine la topike ne la drai hna ithanatan ngöne la drai Sabath. Ketre ijine fe lai troa xome la bapataiso hnene la itre atr.

Ala nyimu la itre atr ka xele ma atrehmekunyi Akötresie. Nyimutre fe la itre hna amenune hnene la itre mekuna i atr, ene pe thaa mekune hë la etru i Iehova me emingömingö i Nyidrë. (Ioane 5:44) Ngo ka xecie hnyawa koi së laka, nyipi ewekë catre troa xomi ijine troa wange la aqane troa “Kuca Asë Jë Nyine Atrunyi Akötresie.” Hnëkë jë së troa sine asë la porogaram, me kepe thangane qa ngön.