Progaram Ne Asabele Ne Sirkoskripsio Ka Hnyipixe

Tune kaa la aqane tro sa cile catre qëmekene la itre ka pi draië me icilekeu kowe la nyipi hmi? Tune kaa la aqane tro sa ngaane la itre aqane thele Satana troa huli së hmaca kowe la fene ka nuetriji Akötresie? Itre hnyinge lai ka sisitria hna troa sa jëne la porogaram ne asabele ne sirkoskripsio ka hnyipixe ne la macatre 2009. Ame la taan, tre, “Nganepi La Ngazo Hnene La Loi.” (Rom. 12:21) Pane ce wange jë së la itre hna hnëkë amë hë koi së.

Tro la atre thupëne la distrik a cile fë la itre cainöj, hna hape “Hna Ithuecatre Matre Troa Ngaane La Ngazo Hnene La Loi,” “Thupëne Kö Wanga Sasaithi Tulu Menu Pi La Aqane Mejiune Së!,” “Easenyi Hë Matre Paatre Pi La Nöjei Ngazo!,” nge “Kola Acatrene La Lapaune Së Matre Troa Ngaane La Fen.” Tro la atre thupëne la sirkoskripsio a cile fë koi së la itre cainöj hna hape, “Enehila Hi La Ijine Troa Hlë!,” hna xome qa ngöne Roma 13:11-13, me “Thaa Tro Kö Sa Kucakuca Ngöne La Drai Ne Akötr,” hna xome qa ngöne la Ite Edomë 24:10. Easa mina fe a treqene la cainöje hna troa cile fë hnene la atre thupëne la sirkoskripsio, hna hape “Wanga Atrune Jë La Itre Aja Ne La Sirkoskripsio.” Ame la ketre cainöj ka ithuecatr hna troa cile fë, tre, kola hape “Ijije Kö Tro Nyipunieti a Kuca La Huliwa Ne Cainöj, Jëne La Hna Pionie?” Troa kuca la lue cainöje hna thawa nyimutren, ame la hnapan, tre, hna hape “Cile Catre Jë Qëmekene La Itre Nyinyithiina i Diabolo.” Tro eje a xatua së troa atrepengöne me thipetrije la itre nyinyithiina ka iaö i Diabolo, ngöne la itre götrane la itre jiane huliwa ka hnyipixe, la itre nyine iamadrinë, memine la itre ini. Ame la cainöje hna thawa nyimutren, hna hape “Troa Hetre Trenge Catre Troa Cile Catre Ngöne La Drai Ne Ngazo,” tre, tro eje a amamane koi së la aqane troa trongëne hnyawa la eamo qaathei Akötresie ngöne Efeso 6:10-18.

Ame la kola ngaane la ngazo memine la qaan ej, tre, ka hetre itretrengekeu memine la kola cainöjëne la maca ne la Baselaia. (Hna ama. 12:17) Thaa sesëkötre kö së laka, Satana a nue asë me catre troa lepe apaatrenyi së, itretre Anyipicine i Iehova! (Is. 43:10, 12) Ngo troa tria hnyawa la mekuna i angeic, ke, ka xecie e kuhu hni së troa “ngan la ngazo hnene la loi.” Canga hnëkë jë së troa kepe thangane qa ngöne la nöjei drai ne la asabele ne sirkoskripsio celë.