Ketre Hna Amekötin Thatraqane La Itre Keresiano
1. Nemene la hna amekötin ka hnyipixe hna xome ngöne lo macatre 1938, nge nemene la aliene lai?
1 Ame ngöne lo macatre 1938, hetrenyi la ketre hna amekötin ka hnyipixe hna xome hnene la organizasio i Iehova. Hetrenyi la itre ekalesia hna könën troa hane sine la itre asabele hna hnen ngöne la ketre nöj, lo hna hëne enehila, ka hape, itre asabele ne sirkoskripsio. Nemene la aliene la itre asabele cili? Kola sa hnene la zonal Informateur (Huliwa Ne Baselaia enehila) ne Januare 1939, ka hape: “Ketre götrane ka sisitria la itre asabele cili ngöne la Organizasio i Iehova, ke, itre ej a hamë ixatua göne la aqane troa xome la huliwa ne la Baselaia i Nyidrë. Ka nyipi ewekë catre la itre ini hna hamëne koi së ngöne la itre ijine cili, ke, itre ej a xatua së troa eatrëne hnyawa la huliwa hna ahnithe koi së.” Ame la easa goeëne la aqane elë la etrune la itretre cainöjëne la Baselaia qaane lo macatre 1938, laka 58 000 la etrun ekö nge 7 000 000 hë ngöne la macatre 2009, tre, kola mama hnyawa laka hetre thangane catre la itre asabele ne sirkoskripsio göi troa xatuane la itretre cainöje troa “xome hnyawa la huliwa hna ahnithe koi angatr”!
2. Nemene la itre ithuemacanyi hna troa hamëne ngöne la asabele ne sirkoskripsio ne la macatre ne huliwa ka troa xulu?
2 Taan La Asabele Ne Sirkoskripsio Ne La Macatre Ka Troa Xulu: Easa treqene hnyawa la porogarame ne la asabele ne sirkoskripsio ka troa nyiqaane ngöne la treu Semitrepa, memine la itre ithuecatre hnene eje hna troa hamë së. Ame la taane la asabele cili, tre, hna xome qa ngöne Ioane 15:19, kola hape, “Tha Ite Sine Ne La Fene Nyipunie.” Nemene la itre xaa cainöj hna troa kepe thangane hnyawa hnene la itre hlue Keresiano? Ame e Mecixen, tro sa drenge la ketre cainöj, hna hape, “Kola Thupë Së Tune Kaa Hnene La Hna Cainöj Ngöne La Drai Ka Pexej?” Atraqatre mina fe la madrine së troa drenge la ketre cainöj ka köni götran, hna hape “The Tro Pi Kö a Löthi Së Hnene . . . ” “La Öni Ka Ses,” me “La Föe Ne Gojenyi Ka Sisitria,” me hnene la “Angetre Itö.” Ame e Sabath, tro sa drenge la ketre cainöj hna thawa nyimutren, hna hape, “Hnimi Iehova Ju, Ngo Thaa Fene Kö.” Hetrenyi la itre xaa cainöj hna hape, “Catre Pi Troa ‘Itre Trehnyiwa Me Itretre Hunuma Trootro,’ ” me “Catre Jë! Ase Hë Nyipunie Apone La Fen.”
3. Nemene la itre manathithi hne së hna troa kapa qa ngöne la hna sine la asabele ne sirkoskripsio?
3 Thupene la hna sine la ketre asabele ne sirkoskripsio, hnene la ketre trejine föe ka nango huli hmitre ngöne la huliwa ne cainöj, hna cinyihane ka hape, hnene la porogarame hna uku eahlo troa waipengöne hmaca la mele i eahlo, me hamë trenge catre i eahlo hmaca troa “cainöj me thaa thele kepin!” Ka xecie hnyawa e kuhu hni së, laka, tro la asabele ne sirkoskripsio ne la macatre ne huliwa ka troa xulu, a xatua së asë troa hnimi Iehova, nge thaa tro pe a hnime la fen. (1 Ioane 2:15-17) Loi e troa xecie e kuhu hni së, laka, easë a troa hane sine me drenge hnyawa la porogarame cili, matre tro sa hane kepe thangane hnyawa la hna amekötine ka lolo cili thatraqane la itre Keresiano!