Ketre Zonal Réveillez-vous ! Ka Ketrepengöne Hna Troa Tro Fë Ngöne La Treu Nofeba!
1 Nyimutre la itre atr ka hnyinge hnyawa ngöne la enyipiewekëne la Tusi Hmitrötr. Maine nyipici laka hna cinyihane ej hnei itre atr, ngo hnauëne matre hëne kö ka hape Wesi Ula i Akötresie? Nemene la itre kepine matre loi e tro ni a mejiune kowe la Tusi Hmitrötr troa eatrongëne la itre jëng? Maine eni a e me inine la Tusi Hmitrötr, tune kaa la aqane troa hetre thangane elanyi la traem me trenge catre hnenge hna xome kowe lai? Nemene Tusi Hmitrötr nyine tro ni a xom? Celë hi itre xaa hnyinge lai hna troa sa ngöne la zonal Réveillez-vous ! ne Nofeba ka ketrepengön; ame la taan, tre, “Ijije Kö Tro Epuni a Mejiune Kowe La Tusi Hmitrötr?”
2 Ame la aja së, tre, ene la troa haöth la teritoare së hnene la hna hamëne trongëne la Réveillez-vous ! celë. Maine ijij, tre, ce cainöje jë ngöne la itre hnalapa trootro memine la ekalesia ngöne la nöjei mecixeni ne la treu Nofeba. Amamane jë lai zonale celë kowe la itre sinee së, me itre ka lapa easenyi së, me itre sine huliwa së, me itre ka ini së, me itre sine ini së, memine la itre hne së hna lapaa wange hmaca. Xometrongëne jë itre ej ngöne la easë a itö me ngenu. Hnene la itre qatre thupe hna hnëkëne matre troa nyimu zonal e hnine la ekalesia, nge matre ijije kowe la itre atrene troa tro fë itre ej.
3 Inine Jë La Tusi Hmitrötr Memine La Itre Atr: Maine easë a hamëne la ketre zonal, ijije hi tro sa eköthe la ketre jëne troa inine la Tusi Hmitrötr, qëmekene troa nyipune la porotrike së memine lai atr. Maine jë tro epuni a qaja ka hape, “Ame la wiike hnapin, tre, eni a ajane troa amamane koi epuni la aqane sa i Tusi Hmitrötr la hnyinge celë, ‘Nemene la aja i Akötresieti kowe la fen?’ ” Thupene lai bëeke fë jë la itus Ini Tusi Hmitrötr matre troa iwai hmaca, me amamane kowe lai atr la itre götrane 4 koi 5, maine wange ju pena la itre paragaraf 1 koi 3 ne la mekene 3. Maine pena, tre, qaja jë ka hape, “Ame ngöne la wiike hnapin, tre, eni a ajane troa ithanatane la ketre hna perofetane hnei Tusi Hmitrötr ka eatre hnyawa enehila.” Ame ngöne la epuni a iwai hmaca, tre, amamane jë kowe lai atr la mekene 9 ne la itus, nge ce wange ju la itre paragaraf 1 koi 3. Maine qaja jë pena kowe lai atr ka hape: “Jole kowe la itre xaa atr ka ala nyimu troa trotrohnine la hnei angatr hna e hnine la Tusi Hmitrötr. Ame la eni a troa traqa hmaca, tre, eni a ajane troa amamane koi epuni la aqane tro epuni a trotrohnine hnyawa la Tusi Hmitrötr.” Ame la kola iwai hmaca, nyiqaane ithanatane jë la itus Ini Tusi Hmitrötr, nge iamacanyine jë la aqane troa etid.
4 Tusi Hmitrötre hmekuje hi la ka qatrenge la “ite hna cinyihane ka hmitöt,” ka atreine troa “ainamacanë [së] kowe la mel.” (2 Tim. 3:15) Qa ngöne lai, loi e tro asë hi së a thele troa catre tro fë la zonale celë, Réveillez-vous ! matre troa xatuane la itre atr troa lapaune kowe la Tusi Hmitrötr!