Ijije Kö Tro Nyipunieti a ‘Pane Hmaca Makedonia Eë’?
1. Nemene la ka upi Paulo me itre sine tronge i nyidrë troa tro Makedonia?
1 Ame ngöne lo macatre 49 M.K., Paulo aposetolo a tro qa Suria Anetioka, matre troa xejë hmaca lo hnaluene tronge i nyidrë ceitu me ketre mesinare. Ase hë nyidrëti mekune troa wange la ekalesia ne Efeso memine fe la itre xa traon ne Asia. Ngo hnei nyidrëti hna kapa la ketre hna amekötin qathene la uati hmitrötr, a kola hë nyidrë troa ‘pane hmaca Makedonia eë.’ Atraqatre la madrine i nyidrë memine la itre sine tronge i nyidrë troa drengethenge la ihë cili, ene pe hnei angatre hna kapa la manathithi celë, ene la troa acile la pane ekalesia ngöne la götrane cili. (Ite hu. 16:9, 10; 17:1, 2, 4) Ame enehila, nyimutre la itre nöj e cailo fen ka aja ixatua göi troa menuëne la hlapa. (Mat. 9:37, 38) Hapeu, ijiji epuni kö troa hane ixatua?
2. Pine nemene matre nango jole kowe la itre xan troa tro kowe la ketre nöje trehnyiwa?
2 Maine jë epuni a ajane troa tui Paulo ene la troa ketre mesinare, ngo ngazo pe, tha ijiji epuni kö troa tro kowe la ketre nöje trehnyiwa. Drei la ketre ceitun, maine jë tha ijiji epuni kö troa hane sine lo ini ne Gileada, pine la macatre i epun, maine ketre trejine föe epuni ka tha faipoipo kö, maine pena hetre nekö i epuni petre kö ka co. Maine jë tha hnei epuni pala kö hna hnëkë troa tro kowe la ketre nöj, pine laka nango luelu epun troa inine la ketre qene hlapa. Maine jë pena, epuni la ketre atr ka saze nöj pine la itre ejolene la mani, ene pe jole koi epuni troa bëeke hmaca kowe la ketre nöj. Ngo thupene la hnei epuni hna wangatrune lai ngöne la thith, tro hë epuni a öhne laka, ngacama jol ngo ijije hi tro epuni a tro kowe la ketre nöj ka aja ixatua.
3. Pine nemene matre tha nyipi ewekë kö troa sine la ini thatraqane la itre mesinare, e ajane së troa hetre thangane ka lolo la huliwa ne cainöje së ngöne la ketre nöje trehnyiwa?
3 Hapeu Ketre Hna Amekötin La Troa Inine Troa Mesinare? Nemene la ka aijijë Paulo me itre sine tronge i nyidrë troa hetre thangane ka loi la huliwa i angatr? Hnene laka hnei angatre hna lapaune koi Iehova me kowe la uati hmitrötre i Nyidrë. (2 Kor. 3:1-5) Hawe, ngacama nango jole koi epuni troa kapa la ketre ini ka ketre pengön, ngo ijije fe hi troa hetre thangane ka lolo la huliwa ne cainöje i epun ngöne la ketre nöje trehnyiwa. Ketre, the thëthëhmine kö epuni laka, kola xatua epuni hnene la itre ini hnei epuni hna kapa qa ngöne lo Ini Ne Cainöj Qathei Akötresie me Icasikeu Ne La Huliwa. Nge maine aja i epuni troa sine lo Ini ne Gileada, maine ketre ini pena, tre, tro ha xatua epuni troa eatrëne la aja cili hnene la hna tro kowe la ketre nöj me tupathe la huliwa ne mesinare; tro hë epuni lai a öhne la itre ewekë hnei epuni hna troa melëne elany, ngöne la epuni a troa kapa la itre xa ini kö.
4. Pine nemene matre tha tro kö la itre qatr a mekun ka hape, tha ijiji angatre kö troa cainöje ngöne la ketre nöje trehnyiwa?
4 Itre Qatr: Ame la itre qatre ka macaje ngöne la götrane la ua nge ka egöcatre pala kö, tre, ijije hi tro angatr a hamë ixatua ka tru catr ngöne la itre nöj ka aja ixatua. Hapeu, ka reterete hë epun? Ame la itre atr ka kepe mada ngöne la itre nöj ka puafala, tre, tha tru menu kö la manie i angatr. Ngacama co catre kö la thupene mo ngöne la nöje hnei angatre hna cainöje ngön hune lo sipu nöje i angatr, ngo ame pe ijije hi lai troa sajuëne la itre aja i angatr, me nyithupene la itre ka nyipi ewekë thatraqane la mel ka tune la itre drösinöe.
5. Qaja jë la hna melëne hnene la ketre trejin ka reteret ka tro troa mele ngöne la ketre nöj trehnyiwa.
5 Hanawange la ceitun ne la ketre trejine trahmany ka reterete hë me ka qatre thup me pionie ngöne la ketre nöj ka ithanatane la qene Papale; hnei nyidrëti hna tro kowe la ketre götrane e Asia, matre troa xatuane la ketre gurup ka qene Papale nge ka ala naen, me hane cainöje kowe la itre atr ka ihamë ngöne la nöje cili. Kola cainöje hnene la gurupe cili kowe la ala 30 000 lao trehnyiwa ka mele e cili. Tha traqa ju kö koi lue macatre, nge kolo ha elë koi 50 la etrun la itre ka sine la itre icasikeu. Kola cinyihane hnene la trejine cili ka hape: “Nyimutre la itre manathithi ka tru hnenge hna kapa qa ngöne la hnenge hna tro troa mele ngöne la nöje cili. Goi tha ijije fe la itre hawa troa qaja la itre manathithi cili hnenge hna melën!”
6. Qaja jë la hna melëne hnene la ketre trejine föe ka tha faipoipo kö ka tro troa mele ngöne la ketre nöj ka aja ixatua.
6 Itre Trejine Föe Ka Tha Faipoipo Kö: Lolo la aqane nyihlue i Iehova hnene la itre trejine föe; angatre a troa cainöjëne la maca ka loi ngöne la itre nöj ka aja ixatua. (Sal. 68:11) Hnene la ketre trejine föe ka tha faipoipo kö hna eköthe amë la aja celë, ene la troa cainöj ngöne la ketre nöje trehnyiwa; ngo kola hnehengazo angeic hnei keme me thine i angeic. Qa ngöne lai, hnei angeice hna iëne la ketre nöj ka pëkö ejolene ngöne la götrane la politik me manie, me cinyanyi kowe la filial matre troa hamëne la itre ithuemacany nyine ixatua. Traqa ha koi sikisi lao macatre ne mele angeice ngöne la nöje cili, nge nyimutre pala hi la itre manathithi hnei angeice hna kapa. Angeic a qaja ka hape: “Ame ngöne lo nöjeng, tre xalaithe hi la itre ijine eni a troa nyiqane inine la Tusi Hmitrötr memine la itre atr. Ngo pine laka eni hë enehila a cainöje ngöne la ketre nöj ka aja ixatua, hawe, nyimutre la itre ini Tusi Hmitrötr hnenge hna xomiujin, nge maca trotro hë la aqane hamë ining.”
7. Qaja jë la hna melëne hnene la ketre fami ka tro troa mele ngöne la ketre nöje trehnyiwa.
7 Itre Hnepe Lapa: Maine hetre nekö i epun, tre, hapeu tro kö lai a sewe epun troa tro kowe la ketre nöj, matre troa cainöjëne la maca ka loi? Ngacama ketre fami ka lue nekönatr, laka, ca ka eitre lao macatre nge ame ketre, tre, treen, ngo hnei angatre hna mekune troa tro kowe la ketre nöj. Kola cinyihane hnene la thin ka hape: “Atraqatre la hni ne ole i nyiho, pine laka hnei nyiho hna hiane la lue nekö i nyiho e celë, e nyipine la itre pionie hut me itre mesinare. Nyimutre la itre manathithi hne huni hna kapa qa ngöne la hne huni hna tro troa nyihlue ngöne la ketre nöj ka aja ixatua.”
8. Hapeu ijije kö troa tro kowe la ketre nöj nge tha nyipi ewekë kö troa inine la ketre qene hlapa? Qeje pengöne jë.
8 Itre Jol Göi Qene Hlapa: Hapeu, epuni a cile troa tro kowe la ketre nöj hnene laka, epuni a troa inine troa ithanatane la ketre qene hlapa? Maine jë hna ithanatane la qene hlapa i epun ngöne la itre xa nöj ka aja atr ka cainöjëne la Baselaia. Hnene la lue trefëne ka qene Papale hna tro kowe la ketre nöj ka qene Sepania, matre troa cainöje kowe la itre atr ka saze nöj, laka ala nyimu thei angatre la ka qene Papale. Thupene la hna kapa la itre ithuemacany qathene la filial, göne lo ala sevene lao ekalesia ka qene Papale nge ka aja ixatua, hnei nyidroti hna iëne la ketre ekalesia me alua sine la itre icasikeu e cili. Ame la nyidroti a bëeke hmaca kowe la hnalapa i nyidro, hnei nyidroti hna itö ewekë acon ngöne la treu, me ami manie uti koi ca macatre. Ame la nyidroti a öhne laka ijiji nyidroti hë troa tro, tre, hnene la itre trejine ne la nöje cili hna xatua nyidro troa thele uma ka lolo me ka co thupen.
9, 10. Nemene la nyine troa wangatrune hnene la itre atr ka saze nöj, nge pine nemen?
9 Itre Ka Saze Nöj: Hapeu, hnei epuni kö hna saze nöj qëmekene troa atre la nyipici? Maine jë ame enehila, kola aja itre atr ka cainöj ngöne la nöje hna hnaho epuni ngön. Hapeu, ijije kö tro epuni a bëeke hmaca kowe la nöje i epun, matre troa hane ixatua? Hmaloi catre ju kö koi epuni troa canga öhnyi huliwa me hnalapa, hune la ketre atr ka xulu qa ngöne la ketre nöj. Ketre, ka ithanatane hë epuni la qene hlapa e cili. Nge ketre, canga hmalahnine hi la itre atr troa drenge la maca ne Baselaia hnei epuni hna tro fë, hune la troa tro fë hnene la ketre trehnyiwa.
10 Hnene la ketre trahmany ka kötre qa Alebani a tro Italia hna öhne la ketre huliwa ka lolo, me hane iupi fë manie kowe la hnepe lapa i angeic e Alebani. Thupene la angeice a atre la nyipici, hnei angeice hna nyiqane inine la qene hlapa cili kowe la ketre gurup ne pionie hut qa Italia ka troa nyihlue ngöne la itre nöj ka aja ixatua. Kola cinyihane hnene la trejine cili, ka hape: “Angatr a tro troa cainöj ngöne la nöj hnenge hna tro trij. Ngacama thatre kö angatr la qene hlapa cili, ngo atraqatre la madrine i angatr troa tro cili. Ame ni, tre, ka qene Alebani, nge atre hnyawa hi ni la itre hna majemine kuca ngöne la nöje cili. Eni pena a ue celë e Italia?” Hawe, hnene la trejine celë hna bëeke hmaca a tro Alebani, me hane ixatua troa cainöjëne la maca ka loi. Angeic a qaja enehila ka hape: “Hapeu, watripë hë lo huliwang me manieng e Italia? Ohea. Ase hë ni öhn e Alebani la ketre huliwa ka nyipi lolo. Ame koi ni, ame la huliwa ka sisitria catr nge ka hamë manathithi ka epine palua, tre, ene la troa nyihlue Iehova cememine la hni ka pexej!”
11, 12. Nemene la nyine troa kuca hnene la itre atr ka mekune troa tro kowe la ketre nöje trehnyiwa?
11 Aqane Troa Eatrëne Lai: Qëmekene tro Paulo memine la itre sine tronge i nyidrë a tro Makedonia, hnei angatre hna mekune troa pane tro ngöne la götrane kuë, ngo “hnei Uati Hmitöte hna shewe angate” ene pe bëeke hmaca jë angatr a tro kolopi. (Ite hu. 16:6) Ame la angatr a traqa easenyi Bithunia, tre, sewe angatre ju hi e cili hnei Iesu. (Ite hu. 16:7) Iehova pala hi a elemekene la huliwa ne cainöj jëne Iesu. (Mat. 28:20) Qa ngöne lai, maine epuni a mekune troa tro kowe la ketre nöj, catre jë thithi koi Iehova me thele ixatua qathei Nyidrë.—Luka 14:28-30; Iako. 1:5; wange ju la itre mekun hna eköhagen hna hape, “Troa Atre Tune Ka Ka Hape, Ame La Nöj Hne Së Hna Mekune Troa Tro Kow, Tre, Ka Aja Ixatua.”
12 Hnyingëne jë kowe la itre qatre thupe i epun me itre xa Keresiano ka macaj, maine mekune ka loi la hnei epuni hna xom. (Ite edomë 11:14; 15:22) E jë la itre mekun hna cinyihane ngöne la itre itusi së göne la troa nyihlu ngöne la ketre nöje trehnyiwa, nge thele xa ithuemacanyi jë göne la itre nöj hnei epuni hna mekune troa tro kow. Hapeu, ijije kö tro epuni a pane ihamë ngöne la nöje cili, me nango lapalapa e cili? Maine ka xecie hë koi epun troa tro kowe la ketre nöj, xome jë la aderesi ne la filial ne la nöje cili ka eje ngöne la Annuaire, nge cinyanyi jë kowe ej matre troa kapa la itre xa ithuemacany. Ngo the canga iupi fë kö kowe la filial; pane hamëne pi kowe la itre qatre thupe i epun, matre tro angatr a hamë itre xa mekun qëmekene troa iupi fë la tusi cili.—Wange ju la itus Organisés pour faire la volonté de Jéhovah, götrane 111-112.
13. Troa xatua epuni tune ka hnene la filial, ngo nemene la hnëqa i epun?
13 Tro hë la filial a iupi fë koi epun la itre xa ithuemacany göne la nöj, matre troa xatua epuni troa axecië mekun. Ngo tha hnëqa ne eje kö troa hamë epuni la itre pepa ka aijijë epun troa lapa me tro hmaca qa ngöne la nöj. Itre ewekë lai nyine tro epuni a wange hnyawa qëmekene troa tro kowe la ketre nöj. Ketre, hnëqa i epuni fe troa hëne la itre “ambassade” (ka nyi trenge ewekë ngöne la ketre nöje trehnyiwa), matre troa hetre ithuemacany göne la itre hna amekötin thatraqane la viza, memine la itre pepa göi huliwa. Ame la itre ka tro kowe la itre xa nöj, tre, loi e tro angatr a ketre thele troa sajuëne la itre aja i angatr ngöne la götrane la ngönetrei, me ngöne la götrane la itre pepa göi mus.
14. Nemene la itre ewekë nyine troa thupëne hnyawa, ngöne la kola mekune troa ihamë maine tro pena ngöne la ketre nöj hna wathebone troa cainöje ngön?
14 Itre Nöj Hna Wathebone Troa Cainöje Ngön: Ame ngöne la itre xa nöj, kola hmi juetrë hnene la itre trejine trahmanyi me föe. (Mat. 10:16) Ame la itretre cainöj ka ihamë maine ka tro pena troa mele ngöne la itre nöje cili, tre, canga tro hi angatr a nyi ejolene la huliwa ne cainöj me angazone la mele ne la ite trejin e cili. Maine epuni a mekune troa tro kowe la itre nöje cili, kola sipo epuni troa pane cinyanyi kowe la filial hna jëne la lapa ne la itre qatre thup.
15. Tune ka la aqane tro la itre atr ka tha ijije kö troa tro kowe la ketre nöj, a akökötrene la huliwa ne cainöje i angatr ngöne la sipu nöje i angatr?
15 Maine Tha Ijije Kö Troa Tro Trije La Nöj: Maine tha ijiji epuni kö troa tro kowe la ketre nöj, the kucakuca kö. Maine jë hetrenyi la ketre “qëhnelö ka ishaisha, me hete huliwan” hna thawa koi epun. (1 Kor. 16:8, 9) Ame la atre thupëne la sirkoskripsio, tre, maine jë atre hi nyidrë la itre xa götran ka aja ixatua, nge ka tha nanyi kö qathei epun. Ketre, ijije fe tro epuni a xatuane la ketre ekalesia maine ketre gurupe pena ka ithanatane la ketre qene hlapa kö. Maine pena, ijije tro epuni a thele troa akökötrene la huliwa ne cainöje i epun e hnine la ekalesia i epun. Ngacama nyimutre la itre ewekë ka ajolë epun, ngo ame la ka sisitria, tre, ene la troa hmi koi Akötresie cememine la hni ka pexej.—Kol. 3:23.
16. Tro sa ujë tune ka kowe la itre atr ka mekune troa nyihlue ngöne la ketre nöj?
16 Hapeu, atre hi epun la ketre Keresiano ka macaj ngöne la götrane la ua, nge ka mekune troa nyihlue ngöne la ketre nöje trehnyiwa? Nga xatua angeice jë me hamë ithuecatr! Ame lo Paulo a tro qa Suria Anetioka, tre, kolo hnakönine traone lai ka tru catr e Roma (thupei Roma me Alasanedria). Pine laka ketre teritoare lai ka tru catr, ene pe sisitria la ixatua hna hamëne hnei Paulo kowe la ekalesia ne Anetioka, ngo eje hi lai laka tro ha akötre koi angatr, e tro nyidrëti a tro triji angatr. Ngo tha hna qaja kö hnei Tusi Hmitrötr ka hape, hna kucakuca hnene la itre trejin pine laka koilo hë Paulo. Ohea, kola mama hnyawa laka, tha hnei angatre kö hna hnehengazone la sipu traone i angatr, ngo angatre pe a wangatrehmekune laka, “ame la hlapa, te, fene hnengödrai.”—Mat. 13:38.
17. Nemene la itre kepin matre loi e tro sa ‘pane hmaca Makedonia eë’?
17 Nyimutre la itre manathithi hna kapa hnei Paulo memine la itre sine tronge i nyidrë, qa ngöne la hnei angatre hna kapa la ihë celë, ene la troa tro Makedonia. Pine laka qa i angatr Makedonia ngöne la traon e Filipi, ene pe hnei angatre hna öhnyi Lidia, nge ame e cili, “hnei Joxu [“Iehova,” MN] hna fēpi la hni nyido troa qatixenyëne la nöjei ewekë hnei Paulo hna qaja.” (Ite hu. 16:14) Pane mekune jë së la madrine ka eje thei Paulo me itre sine tronge i nyidrë, ngöne la kola bapataiso hnei Lidia me hnepe lapa i eahlo! Ame ngöne la itre nöj ka nyimutre, hetrenyi la itre atr ka tui Lidia laka, itre ka hni ka meköt, nge ka tha hane pala kö drenge la maca ne la Baselaia. Maine tro epuni a pane hmaca “Makedonia” eë, eje hi lai laka, tro hë epuni a melëne la manathithi celë, ene la troa öhne la itre atr cili me hane xatua angatr.
[Hna eköhagen götran 5]
Troa Atre Tune Ka Ka Hape, Ame La Nöj Hne Së Hna Mekune Troa Tro Kow, Tre, Ka Aja Ixatua
• Pane goeëne ju lo Annuaire hne së hna xötrei kapa. Thupene lai, ame thene la itre atrene la nöje cili, goeëne hnyawa ju la etrune la itretre cainöj.
• Xome jë la Index matre troa thele la itre hna cinyihan me itre hna melën ngöne la nöje cili.
• Wange ju lo itre trejin ka ihamë hë maine ka hane mele ekö ngöne la nöje cili.
• Maine epuni a mekune troa tro kowe la ketre nöje ka ithanatane la sipu qene hlapa i epun, hawe, goeëne jë ngöne ëternet la etrune la itre atr ka ithanatane la qene hlapa i epun.