Kola Sa La Itre Hnyinge i Nyipunie
◼ Drei la ka troa nyi aliene me hamëne ngöne Ëternet la itre ithuemacanyi ka troa aijijë së troa sipo itus, maine ketre ewekë pena?
Ame ngöne la pune la itre itusi së, hetrenyi la ketre götrane nyine tro sa nyi aliene me iupi fë kowe la filial matre troa sipo itus maine troa wai së pena hnene la Itretre Anyipicine i Iehova. Ngo ijije mina fe tro sa sipo ini Tusi Hmitrötr hna jëne lo site ne la Sasaitri hna hape, www.watchtower.org Itre hna amekötine lai matre troa xatuane la itre atr troa hane atre la nyipici. Ngo hna traqa la itre jole qa ngöne laka nyimutre la itretre cainöj ka xome la itre jia ne huliwa cili, matre troa sipone kowe la filial, troa traqa wange maine hamë itusi pena kowe la itre sinee i angatr maine itre xa atr pena.
Hnene la itre atr ka kapa la itre itus ngo tha hna sipone pe, hna eetre kowe la filial. Ame koi angatr, kola angazo angatre hnene la organizasio së, qa ngöne laka kolo pala hi a iupi fë koi angatre la itre maca ka ala nyimu hna jëne ëternet. Ame lo itretre cainöj hna upe troa wange la ketre atr ka tha hane kö sipone troa iwai, tre, hna wesitrë angatre pine traqa menu troa wai angatr, ngo tha hna hëne pe. Qa ngöne lai, maine kola aja itus maine itre xa ewekë pena hnene la itre atr ka hetre hni ne ajan, tre, ketre qanyi angatre kö cinyanyi jëne ëternet, ngo tha qanyine kö la itretre cainöj troa kuca koi angatr. Ame la kola öhne hnene la filial laka, hnene la ketre trejine hna iupi fë maca me sipone troa wange la ketre atr, tre, kola thipetrije la maca cili hnene la filial.
Matre, tune ka la aqane tro sa xatuane la ketre sinee së maine ketre atr pena, ngöne la götrane la ua? Maine angeice a ajane troa kapa la itre itusi së, tune ka matre troa kuci ahnahnane lai, me iupi fë koi angeic? Maine angeice a ajane troa wai angeice hnene la Itretre Anyipicine i Iehova, ngo thatre kö së la aqane troa thuemacane la itre qatre thupe ne la ekalesia ne la nöje i angeic, hawe, loi e tro sa nyi aliene la sine pepa celë, hna hape, Veuillez suivre l’intérêt (S-43); thupene lai, loi e tro sa hamëne la pepa cili kowe la seketere ne la ekalesia, nge tro pë hë nyidrëti a iupi fë kowe la filial. Ngo maine hna akalabusine la ketre atr ka hetre hni ne ajan, maine angeice pena ngöne la ketre pital, tha tro pi kö sa sipo kowe la filial thatraqai angeic. Ngo tro pe sa ithuecatre koi angeice troa ithanata kowe la itre trejine ka ihamë ngöne la itre iuma cili, maine ketre sipu cinyanyi kö kowe la filial.