Kola Sa La Itre Hnyinge I Nyipunie

◼ Ijije kö troa cainöj maine ini tus jëne Ëternet kowe la ketre trehnyiwa ngöne la ketre nöj?

Ame la itre xa trejin, hnei angatr hna jëne ëternet matre troa ini tus memine la itre atr ka mele ngöne la itre nöj ka nyi ifegone la huliwa ne cainöj, nge ala xalaithe fe hi la itre ka cainöje e cili. Nyipici laka, hetre thangane ka loi pi hë. Ngo hetre itre jol hna öhne ngöne la kola icinyanyikeu maine ithanata pena jëne ëternet memine la itre trehnyiwa. Ngacama tha huliwa ka ngazo kö la troa ithanata memine la itre atr ka hetre hni ne ajan jëne ëternet, ngo troa thupën hnene la itre trejin, ke ame ngöne la itre xa ijin, tre, thatre kö së ka hape, easa ithanata me itre atr ka ngazo, tune la ka iamenumenu. (1 Kor. 1:19-25; Kol. 2:8) Ketre, ame ngöne la itre nöj ka hnöthe me wathebone la huliwa ne cainöj, ijije hi tro la itre musi a drenge la kola ithanata me öhne la kola icinyanyikeu la itre atr. Celë hi matre troa thupën wanga troa hetre ethane kowe la itre trejin ka mel e cili. Haawe, loi e troa thupën hnene la itre trejin matre, ame ngöne la kola huliwan la ëternet, tha tro pi kö a thele ngöne la itre xa nöj la itre atr hne së hna pi cainöje kow.

Maine easa ngenu ngöne la ketre nöj nge cainöje jë hi së kowe la ketre atr, tha tro kö sa thele troa hë me cinyanyi hmaca koi angeic ngöne la easa bëeke kowe la nöje së. Loi e tro pe sa amamane koi angeic la sit jw.org matre troa kapa la itre xa ithuemacany maine aqane tro angeic a hëne la filial ne la nöj. Loi e tro fe sa upi angeic troa hane tro kowe la Uma Ne Baselaia ka easenyi qa cili hnalapa i angeic. Ame ngöne la itre xa nöj, pëkö Uma Ne Baselaia. Maine angeic a ajane troa wai angeic hnene la itre trejin ne la nöje i angeic, loi e tro sa nyialiene la sine pepa hna hape Veuillez suivre l’intérêt (S-43), hamëne jë kowe la seketere, nge tro pëhë angeic a iupi fë jëne jw.org ngöne lo götran hna hape, “Ekalesia”. Tro pëhë la filial ne la nöj hna mele ngön hnene lai atr a wai angeic, ke, angatre kö la ka ijij troa hamë ixatua ngöne la götrane la u.—Wange ju la Huliwa Ne Baselaia ne Juun 2014 g. 5 me Huliwa Ne Baselaia ne Nofeba 2011 g. 2.

Maine kola tro kowe la ketre nöj hnene la ketre atr hne së hna wange lapaan maine easë pena a ini tus memine la ketre atr ka mele ngöne la ketre nöj nge hne së hna atre jëne ëternet, loi e tro sa xötrethenge hnyawa caha itre hna amekötin. Ngo tha tro kö sa canga nue lai atr nge pë petre kö ka wai angeic. Nge maine kola mele hnene la ketre atr ngöne la ketre nöj nge hna nyifegone maine wathebone la huliwa ne cainöj, loi e troa thupën la aqane troa xome la itre xötr ne la Tusi Hmitrötr, hna troa ithanatane jëne tus, me telefon, maine itre xa ewekë ju kö.—Mat. 10:16