Truelofe Lao Kepine Troa Cainöj
Pine nemene matre easa cainöj me inine la maca ka loi? Ka nyipi ewekë catre kö troa xatuane la itre atr ka hni ka ajane troa xötrëne la gojenyi ne mel? (Mat. 7:14) Celë hi pane kepine lai, ngo tha celë kö la ka nyipi ewekë. Kola e la 12 lao kepine matre tro sa xome la huliwa ne cainöj; nemene la kepine ka nyipi ewekë catr?
1. Ame la easa cainöj, tre, jëne mele hi lai kowe la itre atr.—Ioane 17:3.
2. Jëne tro mina fe lai a hmekëne la itre atr ka ngazo.—Ezek. 3:18, 19.
3. Kolo fe lai a eatrëne la hna perofetane hnei Tusi Hmitrötr.—Mat. 24:14.
4. Kolo mina fe a mama e cili la thiina ka meköti Iehova. Pëkö ka troa qaja elanyi ka hape, tha hane ju kö Iehova nue jëne la itre atr ka ngazo troa ietra qëmekene troa apatrenyi angatr.—Ite hu. 17:30, 31; 1 Tim. 2:3, 4.
5. Ame fe la easa cainöj, tre, kolo hi lai a aijijë së troa xome la hnëqa së, ene la troa xatuane la itre atr ngöne la götrane la ua, ke, itre atr hna itöne hnene la madra i Iesu.—Rom. 1:14, 15.
6. Easa hane cainöj, wanga zöi së jë fe la meci ne la itre atr.—Ite hu. 20:26, 27.
7. Ame la easa cainöj, jëne mele fe hi lai koi së.—Ezek. 3:19; Rom. 10:9, 10.
8. Jëne tro mina fe së lai a amamane la ihnimi së kowe la itre atr.—Mat. 22:39.
9. Jëne tro fe a amamane laka easa drengethenge Iehova memine la Hupuna i Nyidrë.—Mat. 28:19, 20.
10. Ame la easa cainöj, tre, easë fe hi lai a hane hmi koi Akötresie.—Heb. 13:15.
11. Easë hi lai a amamane la ihnimi së koi Akötresie.—1 Ioane 5:3.
12. Ame la easa cainöj, easë hi lai a hane ahmitrötrëne la ëje i Iehova.—Is. 43:10-12; Mat. 6:9.
Tha celë hmekuje kö la itre kepine matre easa xome la huliwa ne cainöj. Ame mina fe la easa cainöj, easë hi lo a acatrene la lapaune së, nge kola aijijë së tro sa hane ce huliwa me Akötresie. (1 Kor. 3:9) Ngo ejehi lai laka, ame la kepine ka nyipi ewekë catre matre easa cainöj, tre, ene la kepine naba 12. Maine troa drei së hnene la itre atr, maine xele pena, ngo huliwa ne cainöj a troa ahmitrötrëne la ëje i Akötresie, me hetre nyine sa hnei Iehova kowe lo atre jelengazo Nyidrë.(Ite edomë 27:11) Eje hi laka, hetrenyi la itre kepine ka upi së troa ‘catre inine la itre atr me cainöjëne la maca ka loi.’—Ite hu. 5:42.