Xatuane Jë La Itre Atr Troa Drei Akötresie
1. Nemene la itre boroshür ka mama ngöne la asabele ne distrik, “Epi Pi Traqa Pi La Baselaia i Akötresie!” (qene Faras), nge nemene la eloine la itre jiane huliwa cili?
1 Ame ngöne lo ijine Asabele Ne Distrik hna hape “Epi Pi Traqa Pi La Baselaia i Akötresie!” (qene Faras), hna amamane la lue boroshür ka hnyipixe, lo hna hape Drei Akötresieti Jë Matre Mele Epine Palua ngo ame ketre, hna ujëne ahmaloeëne lo hna hape Écoutez Dieu (Drei Akötresieti Jë). Pine laka tha tru kö la hna cinyihan, hmaloi hi me nyimenyime troa ujën. Ejehi laka ame la kola xötrei amamane lai boroshüre cili, tre, ase hë axeciëne laka tro fe ha ujën ej ngöne la 431 qene hlapa.
2. Drei la ka troa kepe thangane lai itre boroshür celë?
2 Drei la ka troa kepe thangane lai itre boroshüre cili? Tro sa pane ce wange la itre ewekë celë ka traqa pala hi ngöne la fen:
• Ame la kola porotrike hnene la ketre atre cainöj memine ketre atr, ngöne la kola xötrei maine ngöne la kola iwai hmaca, angeic a öhne laka thatreine hnyawa kö e tus hnene lai atr.
• Kola cainöje hnene la atre cainöje kowe la itre atr ka ithanatane la ketre qene hlapa laka co hi maine pë pena kö itus hna ujëne ngön. Maine pena nyimutre catre la itre atre ka ithanatane hi ngo ka thatreine pe e la sipu qene hlapa i angatr.
• Kola qene hume hnene la ketre trejine kowe la ketre simi hnangenyë ne la teritoare hnei angeice hna cainöje ngön.
• Ketre keme maine thine a ajane troa inine la nyipici kowe la nekö i angeic ka co ka tha e tus petre kö.
3. Nemene la hnei epuni hna öhne ngöne la itre götrane asë ne la boroshüre Ecoutez Dieu ?
3 Tune Kaa La Aqane Eköthe La Itre Mekune E Hnine La Lue Boroshüre Celë: Tha tru kö la hna cinyihane hnine la boroshüre Ecoutez Dieu, casi hi la hnëewekë nge ca mekene tusi hi la hna amë e kuhu fene la itre igötranen ej ka amamane la itre mekune ka tru. Pine nemen? Pane mekune jë epun la kola hamën koi epun la ketre boroshür hna cinyihane ngöne la qene hlapa hnei epuni hna thatreine e nge maine jë itre xa mataitus ka nanyi catr koi epun. Tro jë kö epuni lai a kapa, ngacama ka mingöminge la itre iatr? Ohea! Ketre tune mina fe ame la itre atr ka thatreine e tus, tre, canga hmaca ju hi angatr la angatr a goeëne la itre itus ka tiqa hnei hna cinyihan. Celë hi matre, hna eköthe hnyawa la itre iatr ngöne la itre götrane asë, nge hetrenyi fe la itre hatren ka köjane trongëne la itre iatr nyine troa xomiujine hnyawa la itre mekune hna troa ce ithanatan.
4. Nemene la hnei epuni hna öhne ngöne la itre götrane ne la boroshüre Drei Akötresieti Jë Matre Mele Epine Palua?
4 Casi hi la itre iatr hnine la boroshüre Drei Akötresieti Jë Matre Mele Epine Palua memine la hna hape Ecoutez Dieu. Hna kuca la boroshüre Drei Akötresieti Jë Matre Mele Epine Palua matre troa inine la Tusi Hmitrötre memine la itre ka thatreine e tusi hnyawa, maine pena itre ka inine e. Ijije hi tro la atre hamë ini a xome la borosüre cili, ngöne la angeice a inine la Tusi Hmitrötre memine la ketre atr ka hetrenyi la boroshüre Ecoutez Dieu. Ame ngöne la götrane mi e hune la nöjei ini, tre, ca hnyinge ka mama, nge kola sa hnene la lue götrane lai ini. Hna ce amë la itre iatr me itre mekune ka qeje pengöne itre eje me itre xötre hna fejan. Ame e kuhu fene la itre götran, ijije fe troa ce ithanatane la itre mekune hna eköhagene memine la itre xötre hna fejan, nge troa wange lai thenge la hna atreine hnene la hnainin.
5. Eue la ijine troa tro fë la itre boroshür, nge tune kaa?
5 Nemene La Aqane Huliwane Itre Ej: Ijije hi tro epuni a tro fë la boroshüre ngöne la itre hnalapa trootro e kola mama koi epuni laka ka loi hi troa hamën, ngacama tha treu ne tro kö a tro fë ej. (Wange ju la itre mekune hna eköhagen “Troa Tro Fë Itre Eje Tune Kaa.”) Ijije hi tro epuni a hamëne ngöne la kola iwaihmaca me qaja kowe lai atr ka hape epuni a pi amamane la ketre ewekë, nge liine pi lai boroshür.
6. Tune kaa la aqane tro epuni a inine la Tusi Hmitrötre memine la ketre atr jëne la lue boroshüre celë?
6 Pine laka pëkö hnyinge hna fejane ngöne la boroshüre Ecoutez Dieu, haawe, tha tro kö a ce ithanatane tune lo hna majemine kuca ngöne la kola ce wange la itus Ini Tusi Hmitrötr. Ame ngöne la itre nöje ka nyimutre, madrine catre la itre atr troa drenge la itre edromë. Haawe, xome jë la itre iatr matre troa qaja la itre edromë qa hnine la Tusi Hmitrötr. Qeje pengöne jë la itre iatr. Ithanata jë cememine la hni ka madrin. Sipone jë kowe lai hnainine troa qaja la hnei angeice hna goeëne maine mekune i angeice pena. E jë la itre xötre e cahu fene la götran, nge ce ithanatane jë me angeice la itre mekune cili. Hnyinge jë matre tro angeice a hane ithanata, matre xecie koi së ka hape trotrohnine hi angeic. Maine angeice a xome la boroshüre Drei Akötresieti Jë Matre Mele Epine Palua, ce e jë la itre mekune hna cinyihan, memine la itre xötre ngöne la epuni a ce wange la ca iatr.
7. Tro sa xatuane tune kaa la hnainine matre tro angeice a kökötre ngöne la ua?
7 Xatuane Jë La Hnainine Troa Kökötre Ngöne La Ua: Easa mejiune laka tro ha akökötrene la aja thene la hnainine troa inine e hnyawa, matre tro kö angeice a ketre sipu atrepengöi Iehova. (Mat. 5:3; Ioane 17:3) Celë hi matre maine epuni a ce ithanatane la boroshüre Ecoutez Dieu, tro pë hë epuni a isa wange ka hape tro fe epuni a inine la hnainin troa e tus, me inine fe me angeic e thupen lo boroshüre Drei Akötresieti Jë Matre Mele Epine Palua. Nge traqa ju fenesi ce ithanatane la lue boroshür, ngo ame pe tha ijiji angeice pala kö troa xome la bapataiso. Loi e tro epuni a inine pena ha la itus Ini Tusi Hmitrötr maine ketre itus ka ijije troa xatua angeice troa trotrohnine hnyawa la Tusi Hmitrötr.
8. Pine nemene matre hetre hni ne ole së kowe la lue jia ne huliwa ka hnyipixe celë thatraqane la huliwa ne cainöj?
8 Nyipi ewekë tro la itre atr a drenge la Atre Musi e koho hnengödrai me e celë fen, e aja i angatre troa mele epine palua. (Is. 55:3) Ketre ame la aja i Iehova, tre tro “la nöjei ate asëjëihë,” a drei Nyidrë, ene fe hi lo itre ka thatreine e tus. (1 Tim. 2:3, 4) Hetre hni ne ole së kowe la lue jia ne huliwa ka hnyipixe celë matre troa inine la itre atr troa drei Akötresie.
[Na eköhagen götran 3]
Troa Tro Fë Itre Eje Tune Kaa
Amamane jë kowe la atr la götrane 2 koi 3, nge qaja jë ka hape: “Aja i epuni kö troa mele ngöne la ketre fene ka tune la? [Nue pi troa sa.] Kola thingehnaeane hnene la Tusi Hmitrötr ka hape easenyi hë tro Akötresieti a amingömingöne la fen, matre hnë ka tingeting, nge gaa pë atr ka puafala me wezipo. Hanawange la nyine tro sa kuca matre tro sa hane mele e cili. [E jë la Isaia 55:3, lo hna sija e koho hune la götrane 3.] Eje a upi së troa easenyi Akötresie, me ‘drei’ Nyidrë. Ngo tro sa drei Akötresie tune kaa?” Fe jë kowe la götrane 4 koi 5, nge ce ithanatane jë la mekune ka sa. Maine tha ijije kö la traem, hamë angeice pi la boroshür, nge isa pui ju matre troa bëeke me ce ithanatane la mekune ka sa.