Itre Boroshür—Itre Jia Ne Huliwa Ka Nyipiewekë Thatraqane La Troa Cainöje Trootro
1 Ame la atr ka maca, ke, hetrenyi thei angeice la nöjei jiane ne huliwa ka isa pengöne hmekune la itre hnëqa i angeic. Hetrenyi the së la nöjei boroshüre ka nyimu pengön, nge jëne itr’ej, tro së angetre cainöjëne la Baselaia, a xatuane la itre atr ka ajane la itre ewekë ne la ua. (Ite Edo. 22:29) Qëmekene la ketre qëhnelö, ma ketre atr ka wezipo la hnei epuni hna öhn. Ngöne la ketre hnalapa, epuni pena ha öhne la atr ka thele catrëne la musi ka meköt, maine ketre atr pena ka thele la sipu aliene la mel. Nemene la aqane tro së a kuca matre tro la itre boroshüre a xatuane la itre atr celë?
2 Ngöne la kola hamëne la boroshüre “Dieu Se Soucie-t-il Vraiment De Nous?,” ke, ijije tro së a qaja ka hape:
◼ “Hnene la itre xaa atr ka goeëne me mekune la itre akötre me iangazo ngöne la fene hnengödrai, hna upe ka hape Akötresie la qaane la nöjei ewekë celë. Angatr’a mekune ka hape, maine nyipici laka ame Akötresie, ke, ka pucatin’asë, nge maine nyidrëti fe a kukehni së, ke, ijije tro hi nyidrëti a apatrene la itre akötre së. Hapeue la mekune i nyipë? [Nue pi troa sa.] Kola amamane ngöne Salamo 72:12-14 laka Akötresieti a kukehni së. Tha zö i nyidrëti kö la kola akötre me iangazo enehila. Hnei nyidrëti hna thingehnaeane ka hape tro nyidrëti a apatrene la itre atr ka ngazo. “Kola amamane hnene la boroshüre Dieu se soucie-t-il vraiment de nous? la hnei nyidrë hna troa kuca, memine la aqane tro së a kepe thangan.” Thupene lai, sisedrëne jë epuni la porotrike jëne la itre mekune qa hnine la götrane 27, paragarafe 22.
3 Maine epuni a hamëne la boroshüre “Itre ua ne la itre ka meci hë,” ke, qaja ju ka hape:
◼ “Nyipici, hna majemine hnene la itre atr troa hnyingë pengöne la mec. Ngo hapeu, tro hi a mele koi 70 maine 80 lao macatre, nge thupene lai, kola meci hmaca? Maine pena, hetre mele kö thupene la mec? Nemene la mekune i nyipë? [Nue pi troa sa.] Ame e celë ngöne Hna Amamane 21:3, 4, ke, easë a öhne la mejiune ka sheminge i Akötresie thatraqane la atr.” Thupene la hna e la xötr, ke, amamane jë la iatr ngöne la götrane 31, nge qejepengöne jë la mele ka troa eje ngöne la paradraiso.
4 Ame göne la boroshüre “Mus,” ke, nyiqaane jë tune la:
◼ “Kola akötre la fene ngöne la nöjei ijin. Nemene jë la kepine hnei epuni hna hane mekun? [Nue pi troa sa.] Tusi Hmitrötr’a qejepengöne ka hape thatreine kö la atr troa sipu amekötine hnyawa la jë i angeic. [E jë Ate Cainöj 8:9.] Hna amamane fe hnene la hna cinyihane celë ka hape thatreine kö la itre atr troa acile la ketre musi ka tingeting, me ka hut. Akötresieti hmekuje hi la ka ijij. Goeëne hnyawaane ju la hnei Tusi Hmitrötre hna qaja göne la itre ewekë hna troa kuca hnene la Baselaia i Akötresie.” [E jë Mika 4:3, 4.] Nyipune ju tune la: “E ajane epuni troa trotrohnine la aqane tro la Baselaia i Akötresie a hamëne la paradraiso, ke, tro la boroshüre celë a xatua epun, eni a nue koi nyipië, 50 F. la thupen.”
5 E kola hamëne la boroshüre “Mele e celë fen,” ke, qaja jë ka hape:
◼ “Alanyimu la itre atr ka mekune ka hape tro angatr’a mele e koho hnengödrai, ngo nemene la hnei epuni hna hane mekune göne la mele ka tha ase palua kö e celë fene hnengödrai? [Nue pi troa sa.] Tusi Hmitrötr’a qaja axeciëne koi së ka hape troa traqa la mele ka tha ase palua kö, nge kolo fe a qaja koi së la aqane tro së a hane aeatrëne la mele cili.” E jë Ioane 17:3. Nge thupene lai, amamane jë hë la iatr 49, nge hnyinge jë ka hape: “Hapeue, ajane fe kö epuni troa hane mele ngöne la fene ka tune la?” Hamëne ju lai boroshür, nge isapui ju kowe la ketre ijine iwaihmaca.
6 Nyimu taane ka ijije hna qejepengöne hnene la itre boroshür, nge itr’ej’a sa la itre hnyinge ne la itre atr, me hamë ixatua. Loi e tro së a maca la aqane tro së palahi a huliwaane la itre jia ne huliwa celë, matre xatuane la itre atre hni ka loi troa “wangate hmekune la nyipici.”—1 Tim. 2:4.