Madrine Jë Me Hnëkë Koi Drai Ne Amekunën
1. Nemene la nyine tro sa kuca ngöne la hnepe ijine qëmekene tro sa atrune la Drai Ne Amekunën?
1 Ame e Draimenu 26 Maac, tre celë hi ketre drai ne madrine koi së, ke Drai Ne Amekunëne laka, hnei Akötresieti hna hamëne koi së la jëne mel. (Is. 61:10) Elanyi jë kö la ijine troa atrune la drai cili, ngo maine ka madrine hë së enehila, tro hë sa hnëkë hnyawa kowe la ijine cili. Nemene la nyine tro sa kuca?
2. Nemene la ka uku së troa hnëkë thatraqane la Drai Ne Amekunën?
2 Hnëkë Jë: Ame la Pui Ne Xeni Ne La Joxu, tre ketre huliwa ka tru, ngo ame pe, tha ka tru ejolene kö. Ngo loi e troa canga hnëkë matre tha tro kö sa thëthëhmine la itre nyine kuca ka nyipi ewekë. (Ite edomë 21:5) Ka tune la hawa memine la troa iëne hnyawa la hnen, memine la itre hatren. Nyipi ewekë fe troa nyidrawane me hnëkëne hnyawa la hnë icasikeu. Nge ame lo trejine ka troa cile fë la cainöj, tre loi e tro angeic a hnëkë hnyawa. Nge tro fe lo itre ka troa tro fë lo itre hatren, me itre xa ka trene qa, a e hnyawa la itre hna amekötine thatraqane lai. Ase hë nyiqaane aeatrëne la itre xa hna amekötin; nge ma co pë hë la itre xa hnepe nyine tro pala kö a kuca. Easa hnëkë hnyawa kowe la drai cili ka tru, ke easa ajane troa olene la hna hamëne koi së la thupene mel.—1 Pet. 1:8, 9.
3. Nemene la nyine tro sa kuca, matre troa hnëkëne la hni së kowe la Pui Ne Xeni Ne La Joxu?
3 Hnëkëne Jë La Hni Nyipunie: Nyipi ewekë troa hnëkëne la hni së, matre tro sa trotrohnine la kepine la easa atrune la Drai Ne Amekunën. (Ezera 7:10) Qa ngöne lai, loi e tro sa isa xomi ijine troa pane e lo itre mekene tusi hna upi së troa e, matre tro sa lapa mekune la aqane trongene la itre drai tixenuë i Iesu e celë fen. Ame la easa lapa mekune la aqane ujë i Iesu ka mama ngöne la itre xötr, tre hetre trenge catre së jë hi troa hane nyitipu nyidrë.—Gal. 2:20.
4. Ame la nyipunieti a mekune la itre thangane ka xulu qa ngöne la hna hamëne la thupene mel, nemene la ka thue madrine i nyipunie?
4 Kola sajuëne la musi cile i Iehova hnene la mec i Keriso. Kolo fe a thepe së qa ngöne la ngazo me mec. (1 Ioane 2:2) Kola aijijë së troa imelekeu hnyawa me Akötresie, me hetrenyi la mele ka tha ase palua kö. (Kol. 1:21, 22) Kolo fe a ithuecatre koi së troa nyipici kowe la hne së hna sa xepu koi Iehova, me catre xötrethenge Keriso. (Mat. 16:24) Epi troa kökötre trootro la madrine i nyipunie ngöne la nyipunieti a hnëkë, uti hë la troa sine la Drai Ne Amekunën!