Nyipi Ewekë La Wesi Ula i Akötresie Nyine Inin
1. Nemene la tane la asabele ne sirkoskripsio ne la macatre 2014, nge nemene la hnyinge hna troa sa ngöne la ijine cili?
1 Pëkö atre hamë ini ka sisitria catre kö hune la ‘Atre Ini’ së, ene Iehova. (Is. 30:20, 21) Ngo Iehova a ini së tune kaa? Hnei Nyidrëti hna aijijë së troa kapa la itus ka sisitria kö hune la itre itusi asë, ene la Tusi Hmitrötr, lo Wesi Ula i Nyidrë. Ngo nemene la eloine la ini Nyidrë kowe la ngönetrei së, me mekune së, me hni së, me mele së ngöne la ua? Troa sa la hnyinge celë ngöne la ijine asabele ne sirkoskripsio ne la macatre 2014. Drei la tan, “Nyipi Ewekë La Wesi Ula i Akötresie Nyine Inin,” hna nyitrepene hnene la tus i 2 Timoteo 3:16.
2. Nemene la ka troa xatua së troa atrehmekune la itre mekune ka sisitria ne la asabele?
2 Thele Jë Troa Atre La Itre Mekune Ka Sisitria: Hane hi cahu itre hnyinge ka troa xatua së troa atrehmekune la itre mekune ka sisitria ne la asabele:
• Nemene la thangane la ini Akötresie kowe la mele së? (Is. 48:17, 18)
• Maine easa thele jëne troa saze la mele së göi troa huliwa koi Iehova ngöne la drai ka pexej, nemene la nyine tro sa atrehmekune hnyawa? (Mal. 3:10)
• Nemene la nyine tro sa kuca, e atrehmekune ju hi së laka, “isapengöne kö” la ketre ini memine la hna qaja hnei Tusi Hmitrötr? (Heb. 13:9)
• Tro sa nyitipune tune kaa la aqane “ini” Iesu? (Mat. 7:28, 29)
• Pine nemene matre loi e tro la itre ka hamë ini e hnine la itre ekalesia a ketre ini angatre kö? (Rom. 2:21)
• Nemene la eloine la Wesi Ula i Akötresie? (2 Tim. 3:16)
• Nemene la thangane la hna “jumejume” la nöjei nöj asë? (Hag. 2:6, 7)
• Nemene la ka xeci koi Iehova göne la pengö së? (Efe. 5:1)
• Pine nemene matre nyipi ewekë tro sa catr, e aja së troa thupëne hnyawa la hna ini së hnei Iehova? (Luka 13:24)
3. Pine nemene matre nyipi ewekë tro sa sin me qatixenyëne hnyawa la itre ini hna hnëkëne koi së ngöne la ijine celë ka ijij?
3 Ame ngöne la qaane la tus i 2 Timoteo mekene 3, qëmekene tro sa traqa kowe lo itre ithanata ka nyitrepene la tane la asabele së, hnei Paulo hna qejepengöne la hneijine ka jol, ene la itre drai hnapin. Öni nyidrë: “Ame la nöjei ate thina ka ngazo me itete iaö, tro pala kö angat’ a ngazo, kola amenun, me hna amenu.” (2 Tim. 3:13) Maine tha ajane kö së troa hane amenu së, nyipi ewekë tro sa drenge me trongëne la hna ini së hnei Akötresie! Haawe, epi the tro kö sa nue la ketre ewekë troa sewe së troa sin me qatixenyëne hnyawa la itre ini hna hnëkëne koi së ngöne la ijine celë ka ijij.