TOPIK NE LA TREU: “CAINÖJËNEJË LA WESI ULA I NYIDË NGE CATE JË.”—2 TIM. 4:2.
Wange Ju La Isa Aqane Troa Catre Cainöj!
1. Nemene la hna ini së hnene la tulu i Davita?
1 Tha hnei Davita Joxu kö hna nue la ketre ewekë troa ananazijë nyidrë. Ame ekö la Davita a pi xup lo ēnē i Iehova, tre tha hna aijijë nyidrëti kö troa kuca lai huliwa cili. Ngo hnei Davita hna hnëkën asë la itre jia ne huliwa, matre hmaloi pe koi Solomona troa xup la ēnē. (1 Ite jo. 8:17-19; 1 A. l. ite jo. 29:3-9) Haawe, tha hnei Davita kö hna wang atrune la itre huliwa ka tha ijije kö koi nyidrë troa aeatrën, loi pe la ka ijij. Tro sa nyitipu Davita tune kaa ngöne la hna cainöj?
2. Nemene la nyine tro sa kuca?
2 Kuca Ju La Ka Ijij: Hnene la itre xan hna ahmaloeëne la mele i angatr matre ijij troa pionie lapa, maine pionie ka ixatua pena. (Mat. 6:22) Ijiji epuni kö troa hane tui angatr? Thithi jë nge waipengöne jë la mele i epun, ke “ase hë thawa koi [epun] la qëhnelö ka ishaisha, me hete huliwan.” Ange hane lö jë kowe lai qëhnelö cili!—1 Kor. 16:8, 9.
3. Nemene la itre xa hnepe huliwa ka ijije troa kuca, e tha ijije kö troa pionie?
3 Ngo ue tha ijiji epuni ju troa pionie? The wang acone kö la itre xa huliwa ka ijije troa kuca. Maine ka huliwa i maseta epun, wange ju la ijine ka loi troa cainöje kowe la itre atr ka tha ce hmi kö me easë e cili hna huliwa. Maine tha enije catre hë epun, qa ngöne laka ka wezipo epun maine qatre catre hë, cainöje ju kowe la itre atr ka traqa troa thupë epun. Mekune kö laka, maine 15 lae menetr ne epuni a cainöj ngöne la treu, ijije hë troa nyialiene la rapore i epun. Ame hë la kola nyialie i rapor, mekune kö fejane la traeme ne epuni a porotrike memine la itre atr e cahu hna tro, memine la etrune la itre sine itus hna hamën, me itre tarak, memine fe lo itre pepa ne ihë göi Drai Ne Amekunën me asabele. Ame hë la epuni a fejan asë la etrune la itre hnepe huliwa cili, tro epuni lai a sesëkötre ka hape, tru pi hë la huliwa hnei epuni hna kuca!
4. Nemene hë la hnei epuni hna troa kuca?
4 Wange ju la aqane tro sa isa catre cainöjëne la maca ka loi. Nge tro kö së lai a madrin, ke atre hi së laka, ase hë së ketre kuca la hne së hna atreine thatraqane la Baselaia.—Mar. 14:8; Luka 21:2-4.