TANE MEKUN 20
NYIMA 7 Iehova La Trenge Catreng
Thele Jë La Iakeukawany Qaathei Iehova
“Epi troa atrune la . . . Keme ka tru trenge utipin, me Akötresie ne iakeukawany.”—2 KOR. 1:3.
MEKUN KA TRU
Tro sa xomi ini qa ngöne la aqane akeukawane Iehova la angetre Iudra hna oth a tro Babulona.
1. Pane qejepengöne jë la mele i angetre Iudra e Babulona.
PANE mekune jë la pengöne la angetre Iudra la kola othi angatr a tro Babulona. Hnei angatr hna öhne la kola lep apatrene la traone i angatr. Pine la itre ngazo i angatr, me itre xötrapane i angatr, hna othi angatr kowe la ketre nöj trenyiwa. (2 Aq. Jo. 36:15, 16, 20, 21) Nyipici laka, angatr a kuca la hnei angatr hna ajan e Babulona. (Iere. 29:4-7) Ngo tha ka hmaloi kö la mele i angatr e cili, tha celë kö mel hnei angatr hna ajan. Tune kaa angatr e cili? Hane hi la hna qaja hnene la ketre e angatr: “Hne huni hna lapa ezine la itre hneopegejë ne Babulona. E cili, hne huni hna treije meku Ziona.” (Sal. 137:1) Tru catr la hleuhleu i angatr, matre angatr a ajan troa akeukawanyi angatr. Ngo drei la ka troa akeukawanyi angatr?
2-3. (a) Tune kaa la aqane akeukawane Iehova la angetre Iudra hna oth? (b) Nemene la hne së hna troa ce wang ngöne la tane mekune celë?
2 Iehova la “Akötresie ne iakeukawany.” (2 Kor. 1:3) Madrine Nyidrë troa akeukawan la itre atr ka easenyi koi Nyidrë. Atre hi Nyidrë laka, tro la itre xaa angetre Iudra a kapa la ihaji me bëeke hmaca koi Nyidrë. (Isa. 59:20) Celë hi matre 100 lao macatre qëmeken troa othi angatr, hnei Nyidrë hna upi Isaia troa cinyanyine la tus ka xom la ëje i angeic. Pine nemen? Öni Isaia: “ ‘Aupune jë, aupune jë la nöjeng,’ önine la Akötresi epun.” (Isa. 40:1) Matre jëne Isaia, Iehova a akeukawane la angetre Iudra hna oth.
3 Ame itre xaa ijin, aja i easë fe troa hane akeukawanyi së, tune la angetre Iudra. Ame ngöne la tane mekune celë, tro sa ce wang la köni aqane akeukawane Iehova la angetre Iudra: (1) Nyidrëti a qaja ka hape, tro Nyidrëti a nue la ngazo ne la itre ka ietra, (2) hnei Nyidrë hna hamën la ketre mejiun, nge (3) hnei Nyidrë hna apatrene la itre xoue i angatr. Ame la easa ce ithanatane la tane mekune celë, thele jë troa xomi ini qa ngöne itre trengewekë i Iehova.
IEHOVA A NUE LA ITRE NGAZO SË
4. Nemene la aqane amamane Iehova laka, Akötresie ka tru trenge utipine Nyidrë? (Isaia 55:7)
4 Iehova la “Keme ka tru trenge utipin.” (2 Kor. 1:3) Celë hi matre, ase hë Nyidrëti qaja ka hape, tro Nyidrëti a nue la ngazo ne la angetre Iudra ka ietra. (E jë la Isaia 55:7.) Öni Nyidrë: “Hnene la ihnimi nyipicing ka epine palua, tro ni a utipi nyipo.” (Isa. 54:8) Ngo troa mama tune kaa la utipine i Nyidrë? Ngacama tro la angetre Iudra a xeni pun la itre huliwa i angatr, ngo öni Iehova, tha tro kö angatr a lapa palua e Babulona. (Isa. 40:2) Hnene la itre trengewekë cili hna akeukawane la angetre Iudra ka ietra!
5. Pine nemen matre tru catre kö la hni ne ole së kowe la utipine Iehova hune la angetre Iudra ekö?
5 Nemene la ini koi së? Aja i Iehova troa nue hnyawane la ngazo ne la itre hlue i Nyidrë. Ame enehila, tru catre kö la hni ne ole së hune la angetre Iudra ekö. Pine nemen? Pine laka, atre hi easë la hnei Iehova hna kuca matre troa nue la itre ngazo së. Eje hi, itre macatre thupen la hna perofetane hnei Isaia, hnei Akötresie hna upe la nekö hnimina i Nyidrë e celë fen, matre nyithupene mel kowe la itre atr ka ngazo. Jëne la huuje cili, Nyidrëti a “köletrij” la itre ngazo së. (It. Hu. 3:19; Isa. 1:18; Efe. 1:7) Tru catre la utipine i Akötresie!
6. Kola akeukawanyi së tune kaa hnene la utipine i Iehova? (Wange ju fe la foto.)
6 Tro la itre trengewekë i Iehova hna qaja ngöne Isaia 55:7, a akeukawan la ketre trejin ka hacefë la ngazo hnei angeic hna kuca ekö. Ngacama asë hë angeic ietra, ngo akötr palahi angeic. Celë hi ka traqa kowe la itre trejin ka xeni pun enehila la itre ngazo hnei angatr hna kuca ekö. Maine hne së hna qaja la ngazo së, me saze la aqane ujë së, ke loi e troa xecie koi së laka, ase hë Iehova nue la itre ngazo së. Nge e cili, Nyidrëti a sipu iën troa thëthëhmine la itre ngazo cili. (Wange ju la Ieremia 31:34.) Matre e tha Iehova hmaca kö a mekun la itre ngazo së ekö, ke the mekune hmaca kö itre ej! Ame la ka nyipiewekë koi Nyidrë, ke ene la hne së hna kuca enehila, ngo tha itre ngazo së ekö. (Ezek. 33:14-16) Easenyi hë tro la Keme së ka tru trenge utipin a apatrene la itre huliwa ka ahacenyi së.
Ame la ka nyipiewekë koi Iehova, ke itre ewekë hne së hna kuca enehila, ngo tha itre ngazo së ekö (Wange ju la paragarafe 6)
7. Maine easa juetrëne la ketre ngazo, nemene la ka troa uku së troa thele ixatua?
7 Tune kaa e easa hacefë la ketre ngazo hne së hna juetrën? Tusi Hmitrötr a upi së troa thele ixatua thene la itre qatre thup. (Iako. 5:14, 15) Nyipici laka, tha ka hmaloi kö troa qaja amamane la ketre ngazo hne së hna kuca. Ngo e tro sa ietra, me mekune hnyawane laka, Iehova me itre atr hnei Nyidrëti hna acil a ajan troa thupë së, me hnimi së me utipi së, tro lai a uku së troa wang la itre qatre thup. Tro sa ce wang la aqane akeukawanyi Arthur,a hnene la utipine i Iehova. Kola huliwa la mekuna i angeic. Öni angeic, “Ca macatre hnenge hna goeë pornographie. Nge hnenge hna dreng la ketre cainöj ka qaja la mekuthetheu. Celë hi ka xatua ni troa qaja la ngazong kowe la föeng me itre qatre thup. Uqa pi ni e thupen. Ngo eni palahi a upezö ni, pine eni kei kowe la ngazo cili. Matre hnene la itre qatre thup hna amekunë ni laka, tha hnei Iehova kö hna nuetriji ni, nge Nyidrëti a haji easë cememine la ihnim. Hnene la itre trengewekë i angatr hna akeukawanyi ni, me saze la aqane waiewekëng.” Ame enehila, ka pionie Arthur me atre ixatua. Kola akeukawanyi easë laka, e ka ietra së tro kö Iehova a utipi së!
IEHOVA A HAMË MEJIUNE SË
8. (a) Nemene la mejiune hnei Iehova hna hamën kowe la angetre Iudra hna oth? (b) Thenge la Isaia 40:29-31, nemene la thangane kowe la angetre Iudra ka ietra?
8 Ame kowe la itre atr, ke pëkö ka atreine thapa la angetre Iudra qa Babulona. Tha ka nue kö la angetre Babulona la itre atr hnei angatr hna oth. (Isa. 14:17) Ngo hnei Iehova hna hamë mejiune kowe la nöje i Nyidrë. Ase hë Nyidrëti qaja ka hape, tro hë Nyidrëti a thepe angatr qa Babulona, nge pëkö ka troa sewe Nyidrë. (Isa. 44:26; 55:12) Ame koi Iehova, ceitu Babulona hi me wanamamik. (Isa. 40:15) Ame la kola ufi ej, ke kola patr. Matre tha ka jole kö koi Iehova troa thapa la nöje i Nyidrë qa Babulona. Nemene hë la thangane kowe la angetre Iudra hna oth? Tro lai a akeukawanyi angatr. Ngo tha eje hmekuje kö lai. Öni Isaia: “Tro la itre ka mejiun koi Iehova a xomi trengecatr.” (E jë la Isaia 40:29-31.) Tro la mejiune cili a akeukawane la angetre Iudra, nge “tro angatr a sesë draië kösë hetre iape i angatr, tune la itre aeto.”
9. Pine nemene matre ka xeci kowe la angetre Iudra hna oth laka, tro kö Iehova a eatrëne la hnei Nyidrëti hna qaja?
9 Ka xecie kowe la angetre Iudra hna oth laka, tro kö Iehova a eatrëne la itre hnei Nyidrëti hna thingehnaean. Pine nemen? Ke hetre hna perofetan ka eatre hë. Eje hi, ame ekö, hnene la angetre Asuria hna ngaan la baselaia ne la 10 lao tribu ne Isaraela, me oth la itre atren. (Isa. 8:4) Nge hnene la angetre Babulona hna lep apatrenyi Ierusalema, me oth la itre atren. (Isa. 39:5-7) Hna atimekë Zedekia joxu, me othi angeic a tro Babulona. (Iere. 39:7; Ezek. 12:12, 13) Matre öhne hi hnene la angetre Iudra hna oth laka, eatr asë hi lo itre hnei Iehova hna qaja. (Isa. 42:9; 46:10) Matre ka xecie hnyawa koi angatr laka, ame lo hnei Iehova hna thingehnaean, ene la troa thepe angatr qa Babulona, ke tro kö a eatr!
10. Nemene la ka xatua së troa acatrene la mejiune së ngöne la itre drai ne la pun?
10 Nemene la ini koi së? Ame la easa kucakuca, ke tro la mejiune së a akeukawanyi së, me thue trengecatre së. Ngacama kola elë la ngazo e celë fen, nge kola icilekeu hnene la itre ithupëjia, ngo tha easë kö a dekurag. Iehova a hamën la ketre mejiune ka mingöminge koi së, ene la troa mele palua e celë fen ngöne la paradraiso. Ame e cili, pëhë ithupëjia, nge tro hë sa mele tingeting. Loi e troa mel la mejiune cili e kuhu hni së, me ngöne la itre mekuna së. Ka tune la easa goeën la ketre jardin ka mingöming, qa ngöne la mamala së ka dro. Tune kaa la aqane tro sa “aporopëne lai mamala,” ene la troa acatrene la mejiune së? Loi e tro sa xomi ijine troa lapa mekun la mele së ka mingöming elanyi ngöne la fen ka hnyipixe. E jë la itre itusi së, nge goeëne jë la itre video me dreng la itre nyima ka qejepengöne la mejiune së. Nge qaja jë koi Iehova la itre hna thingehnaean hne së hna ajan troa eatrën.
11. Nemene la ka thue trengecatre kowe la ketre trejin föe ka wezipo catr?
11 Hnene la mejiune i Joy, ketre trejin ka wezipo catr, hna xatua angeic me thue trengecatre i angeic. Öni angeic: “Ame la eni a hleuhleu, eni a qaja la itre aliene hning koi Iehova, ke atre hi ni laka, trotrohni ni hi hnei Nyidrë. Nge Nyidrëti a hamë ni la ‘men atraqatr.’ ”(2 Kor. 4:7) Ketre, Joy a lapa mekun la mele i angeic elanyi ngöne la fen ka hnyipixe laka, “pë hmaca kö atrene la nöj ka troa qaja ka hape: ‘Eni a wezipo.’ ” (Isa. 33:24) Maine tro sa qaja la itre aliene hni së koi Iehova, me lapa mekun la mejiune së, tro së lai a hetre trengecatr.
12. Nemene la ka xatua së troa mejiun kowe la itre hnei Iehova hna perofetan? (Wange ju fe la foto.)
12 Tune la aqane kuca i Iehova ekö kowe la angetre Iudra e Babulona, Nyidrëti a xatua së enehila troa mejiune kowe la itre hna thingehnaean. Pane mekune jë la itre xaa hna perofetan ka eatre hë. Ame enehila, kola musinëne la fen hnene la ketre musi laka, ‘ka catr la sin, nge puje la ketre sin.’ (Dan. 2:42, 43) Kola traqa la “itre sa ngöne ketre götran me ketre götran,” nge easë fe a cainöj “kowe la nöjei nöj.” (Mat. 24:7, 14) Ame la easa öhne la kola eatr la itre hna perofetan enehila, ke kola acatrene la mejiune së laka, tro kö a eatr elanyi la itre xaa hna perofetan.
Kola acatrene la mejiune së, hnene la itre hna perofetan ka eatr enehila (Wange ju la paragarafe 12)
IEHOVA A AKEUKAWANYI SË
13. (a) Nemene la jol hna troa ixelë memin hnene la angetre Iudra la kola nue angatr hmaca? (b) Thenge la Isaia 41:10-13, hnei Iehova hna akeukawanyi angatr tune kaa?
13 Ngacama ka mejiune la angetre Iudra, ngo atre hi angatr laka, tro angatr a cil kowe la itre jol la kola nue angatr hmaca. Eje hi, hnei Iehova hna perofetane laka, tro la ketre joxu ka catr a thapa la itre nöj ka lapa xötreithi Babulona, me lepi Babulona fe e thupen. (Isa. 41:2-5) Tro kö la angetre Iudra a xou? Waea. Itre macatre qëmeken, hnei Iehova hna akeukawanyi angatr me hape: “The xou kö, ke ce eni me eö. The hnehengazo kö, ke eni la Akötresi ö.” (E jë la Isaia 41:10-13.) Kola hapeue la Iehova a qaja ka hape, “eni la Akötresi ö”? Tha Nyidrëti kö amekunë angatr troa atrunyi Nyidrë hmekuj, ke eje hi lai hnei angatr hna kuca. Kolo pe a amekunë angatr laka, tro pala hi Nyidrëti a xatua angatr.—Sal. 118:6.
14. Tune kaa la aqane akeukawane Iehova la angetre Iudra ka xou?
14 Hnei Iehova hna akeukawane la angetre Iudra ka xou. Hnei Nyidrëti hna amekunë angatr laka, ka pë ifegon la trengecatre me inamacane i Nyidrë. Hnei Nyidrëti hna upi angatr troa goeëne la itre wëtresij hnei Nyidrëti hna xup. Nyidrëti a hë itre ej asë, thenge la isa ëjen. (Isa. 40:25-28) Maine atre hi Nyidrë la ëjene la itre wëtresij, nga atre fe hi Nyidrë la isa sipu ëjene la itre hlue i Nyidrë. Nge e Nyidrëti la ka xup la itre wëtresij, hapeu, tha ijiji Nyidrëti kö troa xatua së? Matre tha xou kö la angetre Iudra me hnehengazo.
15. Tune kaa la aqane hnëkëne Iehova la angetre Iudra hna oth?
15 Hnei Iehova hna hnëkëne la nöje i Nyidrë göne la itre ewekë ka troa traqa. Jëne Isaia perofeta, öni Nyidrë: “Lö jë kowe la itre hnahage i epun, nge thinge ju la itre qëhnelö hutrö i epun. Zae ju koi hnepe hawa hi uti hë la kola patre la elëhni.” (Isa. 26:20) Hna pane eatre lai, lo Koreso joxu a thapa la nöje Babulona. Önine la ketre ka inamacan qa Geres ka hape, ame la Koreso joxu a lö e Babulona, ke hnei angeic “hna up [la itre sooce i angeic] troa humuth la itre atr hnei angatr hna öhne e kuhu qëhnelö.” Pane mekune jë la xou ka ej thene la angetre Babulona! Ngo pine laka, hnene la angetre Iudra hna drengethenge la itre hna amekötin hnei Iehova, matre trianyi angatre ju kö hnene la ihumuth cili.
16. Pine nemene matre tha tro kö sa hnehengazo menu göne la itre ewekë ka troa traqa? (Wange ju fe la foto.)
16 Nemene la ini koi së? Calemi hë la akötr atraqatr. Tro la itre atr e celë fen a meci hnei xou. Ngo tha tro kö a xou la nöje i Iehova. Atre hi easë laka, Iehova la Akötresi së. Matre mejiune hi së laka, “calemi hë la iamele koi [së].” (Luka 21:28) Ngacama tro lo itre nöj hna acasine a pi lepi së, ngo tro sa mejiune koi Iehova. Tro Iehova a upe la itre angela matre troa thupë së, me hamëne la itre hna amekötin, jëne mele koi së. Tro sa kapa tune kaa la itre hna amekötine cili? Tro pë së lai a atre ngöne la nyipi ijin. Troa hamën la itre hna amekötine cili ngöne la itre ekalesia, hna nyihatrene hnene la itre hnahag, hnë thupë së. Matre tune kaa la aqane tro sa hnëkë kowe la itre ewekë ka troa traqa? Acatrene jë la aqane imelekeu së memine la itre trejin, nge drengethenge ju la itre hna amekötin qaathene la organizasio. Nge loi e troa xecie koi së laka, easë e hnine la organizasio hna xomiujin hnei Iehova.—Heb. 10:24, 25; 13:17.
E tro sa lapa mekun la trengecatre i Iehova me atreine Nyidrë troa amele së, tha tro kö sa xou ngöne la ijine akötr atraqatr (Wange ju la paragarafe 16)b
17. Nemene la aqane troa akeukawanyi eö hnei Iehova?
17 Nyipici laka, hna traqa la itre jol kowe la angetre Iudra, ngo hnei Iehova pala hi hna akeukawanyi angatr. Tro fe Iehova lai a kuca tune koi së. Ngacama easa ixelë memine la itre jol, ngo catre jë së thel la iakeukawany thei Iehova. The thëthëhmine kö laka, ka tru trenge utipin Iehova, nge loi e tro palahi a mele la mejiun e kuhu hni së. Iehova la Akötresie së, matre tro sa xoue nemen?
NYIMA 3 Trenge Catre Hun, Mejiune Hun, Me Hna Troa Qale Kow
a Hna saze la itre ëj.
b ITRE FOTO: Kola icasikeu hnene la ketre neköi gurup ka mejiun kowe la trengecatre i Iehova memine la atreine Nyidrë troa thupëne la itre hlue i Nyidrë e cailo fen.