Tus Qaathei Collège Central
Drei Lai Tusi Hun Koi Nyipunie Itre Trejin Trahmanyi Me Föe:
DREI la madrine ka tru e troa cinyanyi koi nyipunie! Eahuni a madrine koi nyipunie la ihnim memine la mele hnei epuni hna hujëne pala hi thatraqan la huliwa i Akötresie. Tro kö epuni a öhne jëne cahu Annuaire la etrun memin la eloin la huliwa hna kuca ha ngöne lo macatre ka ase hë. Ase hmaca ha la ketre macatre ne huliwa, nge kola e la itre milio la etrun la itre hawa hna xom troa cainöj me inin la itre atr, a kola ithuecatr koi angatr troa catre easenyi Iehova. Hapeu, thaa ketre ewekë kö la ka sisitria kowe la mele së, ene la troa ce huliwa memin la Akötresie nyine troa atrun, nge Tretretro e koho hnengödrai?—1 Kor. 3:9.
Eahuni a mejiun ngöne la eahuni a goeën la huliwa hna troa kuca elany, laka, tro nyipunie a xötrethenge pala hi la tulu ne la itre hlue i Akötresie hnine la Tusi Hmitrötr, ngöne la aqane catr cainöje i angatr me lapaun atraqatr. Hanawang la ketre ceitun, hnei Paulo aposetolo hna catre kökötre loi pala hi ngöne la ua matre troa sajuën la itre aja ne la Baselaia. Eje hi laka, hnei nyidrë hna cinyihan lo pane tusi nyidrë kowe la ekalesia i Keresiano ne Korinito, hmekune lo macatre tixenuë i nyidrë e Efeso. Hnei nyidrëti hna cinyihan la itre ewekë hnei nyidrë hna canga pane mekun troa kuca, kola hape: “Ase hë thawa koi ni la qëhnelö ka ishaisha, [nyine fe gojenyi kowe la huliwa, MN ], nge alanyimu la itre ithupëjia.”—1 Kor. 16:8, 9.
Hnei Paulo hna mekun troa tro Makedonia me Korinito. Ngo hnei nyidrëti hna wangatrehmekun la ketre hnepe ijin troa pane kuca la ketre huliwa ka lolo, ngöne la itre hnepe traeme ne nyidrëti e Efeso. Ka atreine waiewekë Paulo; hnei nyidrëti hna öhne laka hetre jën troa akökötren me sajuën la itre aja ne Baselaia ngöne la götran e nyidrëti ngön, haawe, nyidrëti a saze porogaram thenge lai. Hna fe angangan koi nyidrë la qëhnelö matre troa huliwa, ene pe hnei Paulo hna canga thel troa lö cili thenge.
Eje hi lai laka, thaa huliwa ka co kö la hna kuca hnei Paulo; nyidrëti a troa cainöjën la maca ka loi, nge kolo fe a troa akökötren la ekalesia ne Efeso. Hnei Paulo hna qaja pë hë thupen kowe la itre qatr trahmany ne la ekalesia ne la traone cili ka hape: “Thaa hnenge hna juetëne la kete ewekë ka nyipi, ngo hna amaman koi nyipunie me ini nyipunie qëmeke ne la nöj, me ngöne la kete uma me kete uma, kola anyipicine koi angete Iuda, me angete Heleni fe, ka hape, troa ietra koi Akötresie, me lapaune koi Joxu shë Iesu Keriso.”—Ite Huliwa 20:20, 21.
Ketre, nyimutre thei nyipunie itre trejin trahmanyi me föe, la itre ka xom la itre huliwa hna amë qëmeke i nyipunie. Ame ngöne lo macatre ne huliwa hnapan, kola e la 798 938 lao trejine ka saze la aqane mele i angatr matre troa hane pionie. Hna tro hnei itre xan e nyipunie matre troa mesinare ngöne la itre can la fene hnengödrai. Nyipunie a catre tro fë la maca ka loi me acil la itre ekalesia. Itre xan e nyipunie a inin la ketre qene hlapa, matre troa hane xatuan la itre atr ka mele ezi nyipunie nge ka ketre qene hlapa kö. Ame itre xan hnei angatr hna wange la aqane mele i angatr matre ijij troa hane huliwa ngöne la ketre teritoar, maine troa cainöj ngöne la ketre götran gaa aja ixatua. Ame itre xan, hna fe gojenyi angatr troa cainöj ngöne la hna ini, maine ngöne hna huliwa, maine itre xaa aqane ka lolo troa anyipicin, tune la troa cainöj jëne telefon. Kola amamane hnyawa hnene la hna melëne hnene la itre trejin ngöne la fene asë, itre thöth me itre qatr, laka, angatr a catre canga thel me xom la itre jën troa hamën la atrehmekun ne la nyipici kowe la itre atr e cailo fen asë.
Thaa sihngödri kö koi së laka Iehova a goeë së, nge Nyidrëti a madrin la aqane catre thele nyipunie troa kuca la aja i Nyidrë. Tusi Hmitrötr a qaja ka hape: “Ke tha thina ka tha meköti kö Akötesie mate troa thëthëhmine la huliwa i nyipunie, memine la ihnimi hnei nyipunie hna amamane kowe la atesiwa i nyidrë.” (Heb. 6:10) Catre pi troa xom la itre ijin ka aijijë nyipunie troa sajuën la hmi ka wië. Ame itre xan e nyipunie, tre, maine jë atreine hi tro nyipunie a akökötren la huliwa ne cainöje i nyipunie. Ijiji së asë hi troa kuca matre troa hetre thangan ka loi la huliwa së.
Thaa tro jë kö a pë icilekeu ngöne la easë a kuca la hnëqa ne cainöje së. Mekune hi së lo hna qaja hnei Paulo thupene lo hnei nyidrë hna amexej lo qëhnelö hna fe angangan koi nyidrë, hna cinyihan hnei nyidrë ka hape: “Ala nyimu la ite ithupëjia.” Ame koi Paulo, tre, ame la itre ka icilekeu, ke ene lo itretre Iudra me itre wanaithihlë, angatr a icilekeu meköti koi nyidrë, nge ame itre xan, tre, angatr a eköthe juetrën la itre mekun ka ngazo matre troa humuthi nyidrë.—Ite huliwa 19:24-28; 20:18, 19.
Ceitune hi lai memine la aqane ujë ne la itre atr enehila. Pine laka, easë a easenyi kowe la pun la fene celë, haawe, thaa tro kö sa sesëkötr la kola catrehnin la icilekeu. Eje hi laka, “ka tru tenge elëhni” Satana, nge angeic a nue asë la elëhni angeic kowe la itre ka nyihlue i Akötresie. (Hna ama. 12:12) Thaa tro pi kö së a thëthëhmin laka ame Satana, tre, angeic la “tane la fene hnengödrai.” Hnei Iesu hna qaja kowe la itretre drei nyidrë ka hape: “Maine ite sine ne la fene nyipunie, maine tro la fen a hnine la itre sine ne ej; ngo ngöne laka tha itre sine ne la fene nyipunie, ngo hnenge hna ië nyipunie qa la fen, celë hi laka methinë nyipunie hnene la fen.”—Ioane 14:30; 15:19.
Thaa tro pi kö së a nue la ketre me ketre troa ananazijën la lapaune së koi Akötresie, maine kuca matre tro sa kucakuca troa cainöj. Atre hi së laka, tro pala hi a hetrenyi la itre atr ka troa cile koi së me thele troa eköth la itre mekune ka ngazo matre troa icilekeu me easë. Ngo ngacama tru la itre jol me icilekeu, catre pi së troa cainöjën la maca ka loi, nge easë a mejiune laka, tro kö Iesu elanyi a waja aficanyi Satana memine la itre atre i angeic, ngöne la ijine hna sa hnei Iehova. Thatreine kö ekö la itretre icilekeu me Paulo troa sewe angeic troa cainöj; troa tune mina fe enehila kowe la itretre nyihlue i Iehova. Ngacama tru la elëhni Satana nge kola imethinë hnene la fen, ngo ame pe tre, eje hune la nöje i Iehova la uati hmitrötre i Nyidrë, nge ka catr la men ne ej. Drei la madrin e troa atre laka, kola elë la itretre cainöjën la maca ka loi, 6 304 645 la etrun!
Eahuni a thithi matre tro pala hi nyipunie a catre xome la itre ijin, troa hane sajuën la itre aja ne la Baselaia i Iehova ka mingöming. Thaa sihngödre kö la ihnimi huni koi nyipunie isa ala caas, nge easë a catre kuca la aja i Iehova Akötresie Ka Pucatin Asë “hnene la hni ka cas”.—Zef. 3:9.
Itre trejin me nyipunie,
Collège Central Ne La Itretre Anyipici Iehova